Izai 10:1-34
10 Maler pou bann ki etabli bann lalwa pou fer ditor,Ki touletan ekrir bann lalwa pou fer lezot dominer,
2 Ki refiz donn bann pov zot drwa,*Ki anpes bann ti-dimounn parmi mo pep gagn lazistis,Ki pran tou seki bann vev ena,Ek depouy bann orfelin!*
3 Ki to pou fer zour ki pou bizin rann bann kont,*Kan destriksion pou vini depi bien lwin?
Ver kisann-la to pou sove pou al rod led,Ek kotsa to pou kit to bann dibien?*
4 Pa pou ena okenn lezot swa apart azenou devan bann prizonieOuswa tom parmi bann kadav.
Akoz tousala, so koler pa’nn diminie,Ek so lame ankor leve pou tap zot.
5 “Gete! bann Asirien,Se baton ki mo servi pou exprim mo kolerEk mo pe servi baton ki dan zot lame pou kondane!
6 Mo pou avoy zot kont enn nasion ki’nn rebel kont Bondie,*Kont enn pep ki’nn fer mwa bien ankoler;Mo pou donn bann Asirien lord pou pran tou zot bann dibien ek pou ras tou ar zot,Ek pou mars lor zot parey kouma mars dan labou lor sime.
7 Me zot pa pou ena sa lintansion-la,Ek dan zot leker zot pa pou pans dan sa fason-la;Parski lintansion zot leker se pou detrir tou,Se pou detrir boukou pep, pa zis enn tigit.
8 Parski zot dir,‘Eski tou nou bann prins pa bann lerwa?
9 Eski Kalno pa kouma Karkemis?
Eski Amat pa kouma Arpad?
Eski Samari pa kouma Damas?
10 Mo lame inn pran bann rwayom ki pou bann bondie ki pena valer,Ki ti ena pli boukou zidol ki Zerizalem ek Samari!
11 Eski mo pa pou fer parey ar Zerizalem ek so bann zidol,Kouma mo’nn fer ar Samari ek so bann bondie ki pena valer?’
12 “Kan Zeova pou fini tou so travay lor Montagn Sion ek dan Zerizalem, Li* pou pini lerwa Lasiri akoz so leker insolan, ek so regar fier ek arogan.
13 Parski li dir, ‘Mo pou fer sa avek lafors mo lameEk avek mo sazes, parski mo ena sazes.
Mo pou tir bann frontier ant bann pep,Mo pou pran tou zot trezor,Ek kouma enn kikenn ki pwisan mo pou fer zot bann abitan soumet ar mwa.
14 Mo lame pou pran bann kitsoz ki bann pep ena,Parey kouma enn zom avoy so lame dan enn nik;Mo pou rasanble later antie,Parey kouma enn kikenn rasanble bann dizef ki’nn abandone!
Personn pa pou bat so lezel ouswa ouver so labous ouswa fer kwi-kwi.’”
15 Eski enn lars kapav fer vantar ar sa kikenn ki pe servi li pou koupe la?
Eski enn lasi kapav fer gran-nwar ar sa kikenn ki pe servi li la?
Eski enn baton kapav bouz sa kikenn ki pe lev li la?
Ouswa eski enn baton kapav lev lao sa kikenn ki pe trap li la?
16 Akoz sa vre Segner, Zeova Sef bann larme,Pou fer zot bann zom ki gro, deperi,Ek li pou alim enn dife anba zot laglwar.
17 Lalimier Izrael pou vinn kouma enn dife,Ek sa Kikenn Ki Sin dan Izrael la pou vinn enn laflam;Dan enn sel zour li pou bril ek devor so bann move zerb ek so bann touf pikan.
18 Bondie pou detrir net zoli lafore ek zoli verze Lasiri;Li pou vinn parey kouma enn zom malad ki pe deperi.
19 Pou res telman tigit pie dan so lafore,Ki enn zanfan pou kapav ekrir ki kantite ena.
20 Sa zour-la bann ki ankor dan IzraelEk bann desandan Zakob ki ankor vivan,Pou nepli kont lor sa kikenn ki ti tap zot la;Me avek fidelite zot pou kont lor Zeova,Sa Kikenn Ki Sin dan Izrael la.
21 Zis enn tigit ki’nn reste,Enn tigit ki’nn reste parmi bann desandan Zakob, ki pou retourn ver Bondie For.
22 Parski mem si to pep, A Izrael,Zot kouma bann lagrin disab dan bor lamer,Zis enn tigit parmi zot ki reste ki pou retourne.
Inn fini desid pou detrir zot net,Ek pinision* pou kouver zot.
23 Wi, desizion pou detrir zot net ki Segner Siprem,* Zeova Sef bann larme, inn pranPou realize dan pei-la an-antie.
24 Alor, ala seki Segner Siprem, Zeova Sef bann larme, dir: “Pa per, mo pep ki pe res dan Sion, akoz bann Asirien ki ti abitie tap zot avek baton ek lev zot baton kont zot, parey kouma Lezip ti fer.
25 Dan bien tigit letan kondanasion-la pou fini; mo koler pou detrir zot.
26 Zeova Sef bann larme pou bat zot avek enn fwet, parey kouma li ti fer kan li ti gagn laviktwar lor Madian pre ar ros Oreb. Ek so baton pou lor lamer, ek li pou lev li parey kouma li ti fer avek Lezip.
27 Sa zour-la pou tir pwa ki zot ti met lor to zepol,Ek fardo ki zot ti met lor to likou,Ek fardo-la pou kase akoz delwil-la.”*
28 Zot inn ariv Ayat;Zot inn pas par Migronn;Zot inn kit zot bagaz Mikmash.
29 Zot inn travers delo;Zot inn pas lanwit dan Geba;Rama tranble, bann abitan Gibea, lavil kot Sail sorti, inn sove.
30 Kriye ek irle, A bann tifi Galim!
Ekout bien, A Laysa!
A pov Anatot!
31 Madmena inn sove inn ale.
Bann abitan Gebim inn rod enn plas pou kasiet.
32 Sa zour-la zot pou aret dan Nob.
Zot pou lev zot koutpwin pou menas montagn tifi Sion,Kolinn Zerizalem.
33 Gete! Vre Segner, Zeova Sef bann larme,Pe koup bann brans ki pe fer enn gran tapaz kan zot tonbe;Li pe koup bann pli gran pie,Ek li pe zet anba bann gro pie.
34 Li pe koup bann touf dan lafore avek enn zouti an metal,*Ek Liban pou tonbe par enn kikenn ki for.
Not
^ Ouswa “anpes bann pov rod lazistis dan lakour.”
^ Ouswa “bann zanfan ki pena papa.”
^ Ouswa “zour pinision.”
^ Ouswa “laglwar.”
^ Ouswa “ki aposta.”
^ Lit., “Mo.”
^ Lit., “lazistis.”
^ Ouswa “Souverin Segner.”
^ Kitfwa se delwil ki ti servi pou dife, ouswa delwil ki ti servi pou vers lor latet bann dimounn ki ti vinn lerwa dan Izrael.
^ Ouswa “enn lars.”
