Izai 13:1-22
13 Enn mesaz kont Babilonn ki Izai garson Amoz ti gagne dan enn vizion:
2 “Met enn signal lor enn poto lor enn montagn kot pena ros.
Apel zot, fer sign ar zot lame,Pou ki bann-la kapav rant par laport bann dimounn ki sorti dan bann gran fami.
3 Mo finn donn bann ki mo’nn swazire* enn lord.
Mo’nn demann mo bann gerye pou vini pou exprim mo koler,Sa fer zot ena lazwa ek ena lorgey.
4 Ekoute! Ena enn gran lafoul dan bann montagn;Se koumadir enn gran pep!
Ekoute! Bann rwayom ek bann pep ki’nn rasanble ansam,Pe fer tapaz!
Zeova Sef bann larme pe rasanble enn larme pou lager.
5 Zeova ek bann zarm so koler,Pe sorti depi enn pei bien lwin,Depi lot bout lesiel,Pou amenn enn destriksion partou lor later.
6 Kriye ek plore, parski zour Zeova bien pre!
Li pou vini kan Tou-Pwisan pou amenn destriksion.
7 Ala kifer tou bann lame pou vinn feb,Ek leker tou bann zom pou ranpli ar laper.
8 Lepep dan enn gran panik.
Zot pe gagn kontraksion ek douler,Parey kouma enn madam ki pe gagn zanfan.
Sakenn pe get so kamarad ar laper.
Lor zot figir ena enn gran langwas.
9 Gete! Zour Zeova pe vini,Avek laraz ek enn gran koler.
Sa zour-la pou bien kriyel,Ek pou fer pei-la vinn enn kitsoz ki fer per,Ek pou touy tou bann dimounn ki fer pese dan pei-la.
10 Parski bann zetwal ki dan lesielEk zot bann konstelasion* pou nepli briye;Soley pou vinn nwar kan li leve,Ek lalinn pou nepli donn so lalimier.
11 Mo pou demann bann dimounn lor laterPou rann kont pou bann move kitsoz ki zot fer,Ek mo pou demann bann move dimounnPou rann kont pou zot bann erer.
Mo pou aret lorgey bann vantar,Ek mo pou rabes larogans bann ki violan.
12 Mo pou fer bann imin vinn pli rar ki lor ki’nn rafine,Ek bann dimounn vinn pli rar ki lor Ofir.
13 Ala kifer, mwa, Zeova Sef bann larme,Mo pou fer lesiel tranble,Ek later tranble pou ki li sorti dan so plasParski zour mo gran koler, mo koler pou kouma enn dife ki pe brile.
14 Parey kouma enn gazel ki pe sove parski enn saser pe lasas liEk parey kouma enn troupo ki pena personn pou rasanble li,Sakenn pou retourn ar so pep;
Sakenn pou sove pou al dan so pei.
15 Bann lennmi pou transpers ninport kisann-la ki zot trouve,Ek zot pou touy avek lepe ninport kisann-la ki zot trape.
16 Bann lennmi pou masakre zot zanfan devan zot lizie,Pou kokin tou seki ena dan zot lakaz,Ek pou viol zot bann fam.
17 Mo pe avoy kont zot bann abitan Medi,Ki konsider larzan kouma enn nanye ditou,Ek ki pa interese ar lor.
18 Bann-la zot lark pou kas zot bann zennzan bout-bout;Bann-la pa pou montre okenn pitie pou bann ti-baba ki dan vantEk okenn konpasion pou bann zanfan.
19 Ek Babilonn, rwayom ki ena plis laglwar ki tou lezot rwayom,Bote ek fierte bann Kaldeen,Pou vinn parey kouma Sodom ek Gomor kan Bondie ti detrir zot.
20 Zame personn pa pou res laba,Ni personn pa pou viv dan sa plas-la zenerasion apre zenerasion.
Okenn Arab pa pou pik so latant dan sa plas-la,Ek okenn berze pa pou amenn so troupo laba.
21 Bann zanimo ki viv dan dezer pou dormi laba;Zot bann lakaz pou ranpli avek bann ibou.
Bann otris pou res laba,Ek bann kabri sovaz* pou sot-sote laba.
22 Bann zanimo sovaz pou irle dan so bann latour,Ek bann lisien sovaz* pou irle dan so bann gran-gran pale.
So ler pe koste, ek li pa res boukou zour.”
Not
^ Lit., “ki mo’nn sanktifie.”
^ Lit., “ek zot bann Kesil.” Kitfwa pe fer referans ar Orion ek bann konstelasion ki otour.
^ Ouswa kitfwa, “bann demon ki resanble kabri.”
^ Li enn lisien ki ena enn long lagel bien pwint ek enn lake bien touf ek ki resanble enn renar.
