Izai 14:1-32
14 Parski Zeova pou montre mizerikord* anver Zakob, ek ankor enn fwa li pou swazir Izrael. Li pou etabli zot* dan zot pei, ek bann etranze pou zwenn ansam avek zot ek bann-la pou res ansam avek bann desandan Zakob.
2 Ek bann pep pou pran zot ek retourn zot kot zot, ek bann-la pou vinn bann serviter ek bann servant pep Izrael dan pei Zeova; ek zot pou fer bann ki ti fer zot vinn prizonie vinn zot prizonie, ek zot pou diriz bann ki ti fors zot pou travay.*
3 Zour ki Zeova pou soulaz twa ar to bann lapenn, ar to bann langwas, ek ar lesklavaz bien dir ki ti inpoz lor twa,
4 to pou resit sa proverb-la kont* lerwa Babilonn:
“Gete kouma sa kikenn ki ti pe fors lezot pou travay* la inn fini!
Gete kouma bann dominer ki li ti pe fer inn fini!
5 Zeova inn kas baton sa kikenn ki move la,Baton bann ki dirize,
6 Sa kikenn ki avek gran koler pe kontign tap bann pep la,Sa kikenn ki avek koler pe fer bann nasion soumet ar li la ek pe kontign persekit zot.
7 Aster-la, later antie pe viv dan lape, san okenn problem.
Bann dimounn pe kriye dan lazwa.
8 Mem bann pie zenevriye ek pie sed ki sorti Liban,Kontan pou twa.
Zot dir, ‘Depi ki to’nn tonbe,Okenn bisron pa’nn vinn koup nou.’
9 Mem Tom* ki anba, dan enn gran lazitasion,Pou akeyir twa kan to vini.
Akoz twa, li pe lev tou bann ki’nn mor,*Tou bann sef* ki ti pe fer dominer lor later.
Li pe fer bann lerwa tou bann nasion leve depi zot tronn.
10 Zot tou pe koze ek pe dir twa,‘Eski twa osi to’nn vinn feb parey kouma nou?
Eski to’nn vinn kouma nou?
11 Finn fer to grander desann dan Tom,*Ansam avek lamizik to bann instriman ki ena lakord.
Bann moutouk inn tale anba twa koumadir enn lili,Ek bann lever pe kouver twa kouma enn dra.’
12 Gete kouma to finn tonbe depi lesiel,Twa ki briye, garson soley ki leve!
Gete kouma finn tir twa lor later,Twa ki’nn gagn laviktwar lor bann nasion!
13 To’nn dir dan to leker, ‘Mo pou mont dan lesiel.
Mo pou lev mo tronn pli lao ki bann zetwal Bondie,Ek mo pou asiz lor montagn kot fer renion,Dan bann parti pli lwin dan Lenor.
14 Mo pou mont pli lao ki bann niaz;Mo pou fer mwa vinn parey kouma sa Kikenn Ki Pli Lao la.’
15 Okontrer, pou fer twa desann dan Tom,*Dan parti pli profon dan sa trou-la.
16 Bann ki trouv twa pou fixe twa;Zot pou examinn twa bien ek dir,‘Eski se limem sa zom ki ti pe fer later tranble la,Ek ki ti pe fer bann rwayom tranble?
17 Eski se limem ki’nn fer later vinn kouma enn dezer,Ek ki’nn gagn laviktwar lor bann lavil?
Eski se limem sa zom ki’nn refiz les bann prizonie retourn kot zot la?’
18 Tou bann lezot lerwa bann nasion,Wi, zot tou, pe alonze dan laglwar,Sakenn dan so tom.*
19 Me twa, finn zet twa ek pa finn donn twa enn tom,Parey kouma enn bourzon* ki bann dimounn deteste,Finn kouver twa ar bann dimounn mor ki’nn gagn kout lepe,Ki’nn zete dan enn trou kot ena bann ros,Parey kouma enn kadav lor ki nou marse.
20 To pa pou zwenn zot dan enn tom,Parski to’nn detrir to prop pei,To’nn touy to prop pep.
Zame ankor pa pou koz lor desandan bann ki fer lemal.
21 Prepar enn plas pou touy so bann garson,Parski zot bann anset koupab,Pou ki zot pa leve ek kontrol later,Ek ranpli lemond avek zot bann lavil.”
22 Ala seki Zeova Sef bann larme dir: “Mo pou lev kont zot.”
Zeova dir: “Ek mo pou tir dan Babilonn tou nom, tou bann ki reste, bann desandan, ek zanfan zot bann zanfan.”
23 Ala seki Zeova Sef bann larme dir: “Mo pou fer li vinn lakaz bann tang,* ek enn landrwa kot ena lamar, ek mo pou balie li avek enn balie ki pou detrir li net.”
24 Zeova Sef bann larme inn fer sa serman-la:
“Seki mo ti ena lintansion fer, samem pou arive,Ek seki mo finn deside, samem pou realize.
25 Mo pou kraz bann Asirien dan mo pei,Ek mo pou pil lor bann-la dan mo bann montagn.
Mo pou tir fardo ki bann-la inn met lor mo pep,Ek mo pou tir pwa ki bann-la inn met lor zepol mo pep.”
26 Ala seki finn deside* kont later an-antie,Ek ala lame ki’nn leve kont* tou bann nasion.
27 Parski Zeova Sef bann larme limem ki’nn desid sa,Ek kisann-la kapav anpes sa arive?
Li lev so lame,Ek kisann-la kapav fer li bes so lame?
28 Dan lane ki Lerwa Akaz ti mor, ti anons sa mesaz-la:
29 “Filisti an-antie, fode pa ki to dan lazwaParski baton sa kikenn ki ti pe tap twa la inn kase.
Depi rasinn serpan-la, enn serpan anpwazone pou sorti,Ek so desandan pou kouma enn serpan ki ena venin, ki rapid.*
30 Pandan ki premie-ne bann ti-dimounn pou manzeEk ki bann pov pou dormi an sekirite,Mo pou touy to rasinn avek lafaminn,Ek pou touy seki reste parmi twa.
31 Kriye ek plore, A laport! Kriye, A lavil!
Zot tou pou dekouraze, A Filisti!
Parski enn lafime pe sorti depi Lenor,Ek parmi tou bann lennmi, personn pa pe res an-aryer.”
32 Kouma zot bizin reponn bann mesaze sa nasion-la?
Zot pou dir bann-la ki Zeova inn poz fondasion pou Sion,Ek ki bann ti-dimounn parmi so pep pou al rod proteksion dan sa lavil-la.
Not
^ Get Lexplikasion Bann Mo.
^ Ouswa “donn zot repo.”
^ Ouswa “zot bann sef esklav.”
^ Ouswa “boufonn.”
^ Ouswa “sef esklav.”
^ Lit., “bouk.”
^ Lit., “bann ki pena lafors dan lamor.”
^ Ouswa “Seol,” setadir, tom kot tou dimounn ale. Get Lexplikasion Bann Mo.
^ Ouswa “Seol,” setadir, tom kot tou dimounn ale. Get Lexplikasion Bann Mo.
^ Ouswa “Seol,” setadir, tom kot tou dimounn ale. Get Lexplikasion Bann Mo.
^ Lit., “lakaz.”
^ Ouswa “brans.”
^ Mo ebre ki’nn servi isi kitfwa fer referans ar enn mamifer ki kouma enn gro lera ki ena bann long pikan ki li servi pou protez limem. Ek li resanble enn tang.
^ Lit., “konsey ki’nn konseye.”
^ Ouswa “ki’nn pare pou tap.”
^ Ouswa “enn serpan anpwazone ki anvole.”
