Izai 19:1-25
19 Enn mesaz kont Lezip:
Gete! Zeova inn mont lor enn niaz ki rapid ek li pe vinn dan Lezip.
Bann bondie ki pena valer dan Lezip pou tranble devan li,Ek bann Ezipsien pou perdi kouraz.
2 “Mo pou fer bann Ezipsien lev kont bann Ezipsien,Ek sakenn pou lager ar so kamarad,Sakenn kont so frer ek kont so vwazin,Lavil kont lavil, rwayom kont rwayom.
3 Ek lespri bann Ezipsien pou boulverse,Ek mo pou devir zot bann plan anba-lao.
Zot pou rod led ar bann bondie ki pena valer,Ar bann longanis, bann ki koz avek bann mor,* ek bann ki predir lavenir.
4 Mo pou livre Lezip dan lame enn met ki pena pitie,Ek enn lerwa ki fer dominer pou diriz lor zot,” ala seki vre Segner, Zeova Sef bann larme dir.
5 Delo lamer pou sek,Ek pou nepli ena delo dan larivier ek li pou sek.
6 Ek bann larivier pou santi pi;Delo bann kanal Nil dan Lezip pou bese ek pou sek net.
Bann rozo ek bann long lerb pou pouri.
7 Bann plant lor bor Larivier Nil, kot Larivier Nil zwenn lamer,Ek tou later kot inn sem bann lagrin lor bor Larivier Nil pou sek.
Divan pou pran tou pou ale, ek zot pou nepli existe.
8 Bann peser pou tris,Bann ki pe zet lamson dan Larivier Nil pou plengne,Ek bann ki pe zet zot file dan delo pou diminie tigit-tigit.
9 Pou fer bann ki servi lin pou fer latwalEk bann ki fer latwal blan* gagn onte.
10 Bann ki fer latwal dan Lezip pou santi zot kraze;Tou so bann travayer pou dan lapenn.
11 Bann prins Zoann zot bet.
Bann konseye Faraon ki ena plis sazes pou donn bann konsey ki pena sans.
Kouma to kapav dir Faraon:
“Mo enn desandan bann dimounn ki ena sazes,Enn desandan bann lerwa lontan”?
12 Kotsa to bann zom ki ena sazes ete?
Les bann-la dir twa si zot kone seki Zeova Sef bann larme inn deside konsernan Lezip.
13 Bann prins Zoann inn azir dan enn fason bet;Bann prins Nof* inn anbet zotmem.
Bann sef tribi Lezip inn met bann Ezipsien dan lerer.
14 Zeova inn avoy lor zot enn lespri konfizion;Ek inn met bann Ezipsien dan lerer dan tou seki zot fer,Parey kouma enn soular ki pe balote dan so vomi.
15 Ek bann Ezipsien pa pou reisi fer nanye,Ki li latet ouswa lake, ki li bourzon ouswa long lerb.*
16 Sa zour-la Lezip pou vinn kouma bann madam ki pe tranble ek ki per, parski Zeova Sef bann larme inn lev so lame kont zot pou menas zot.
17 Ek pei Zida pou vinn enn kitsoz ki fer Lezip gagn per. Kan zot pou tann koz lor li, zot pou dan enn gran lafreyer akoz desizion ki Zeova Sef bann larme inn pran kont zot.
18 Sa zour-la pou ena sink lavil dan pei Lezip ki pou koz langaz ki koze dan pei Kanaan, ek zot pou fer serman ki zot pou res fidel ar Zeova Sef bann larme. Enn lavil pou apel Lavil Destriksion.
19 Sa zour-la pou ena enn lotel pou Zeova omilie pei Lezip ek enn kolonn pou Zeova kot so frontier.
20 Pou servi sa kouma enn sign ek enn temwin pou Zeova Sef bann larme, dan pei Lezip; parski zot pou kriye Zeova akoz bann dimounn ki fer dominer, ek li pou avoy enn sover, enn dimounn inportan, ki pou sap zot.
21 Ek Zeova pou fer bann Ezipsien konn li, ek sa zour-la bann Ezipsien pou konn Zeova. Zot pou fer bann sakrifis ek zot pou donn bann kado. Zot pou fer Zeova enn promes ek zot pou respekte sa.
22 Zeova pou pini Lezip, li pou pini li ek geri li. Zot pou retourn ar Zeova ek li pou reponn zot bann siplikasion ek li pou geri zot.
23 Sa zour-la pou ena enn gran semin ki sorti Lezip pou al Lasiri. Lerla, Lasiri pou vinn dan Lezip ek Lezip dan Lasiri, ek Lezip pou servi Bondie ansam avek Lasiri.
24 Sa zour-la Izrael pou vinn trwaziem ansam avek Lezip ek Lasiri. Li pou enn benediksion pou later,
25 parski Zeova Sef bann larme pou’nn beni li, ek pou dir: “Benediksion pou Lezip, mo pep, pou Lasiri, travay mo lame, ek pou Izrael, mo leritaz.”
Not
^ Ouswa “medium.”
^ Lit., “Fer latwal blan avek enn zouti ki fer latwal.”
^ Ouswa “Memfis.”
^ Ouswa kitfwa, “brans palmis ouswa rozo.”
