Izai 21:1-17
21 Enn mesaz kont dezer ki parey kouma lamer:*
Li pe vini kouma enn siklonn ki sorti dan Lesid ek ki pe balie tou,Depi dezer, depi enn pei ki fer per.
2 Inn fer mwa gagn enn vizion ki difisil pou siporte:
Sa kikenn ki tret la pe fer tret,Ek sa kikenn ki detrir la pe detrir.
Monte, A Elam! Atake, A Medi!
Mo pou fer aret tou bann soupir ki ena akoz li.
3 Se akoz sa ki mo dan enn gran langwas.*
Gro douler pe trap mwa,Kouma enn fam ki pe gagn zanfan.
Mo tro dan lapenn pou mo tande;Mo tro boulverse pou mo trouve.
4 Mo leker pe afebli; mo pe tranble ar laper.
Mo ti pe atann kan pou koumans fer nwar, me aster-la mo pe tranble.
5 Met latab ek fer plas pou asize!
Manze-bwar!
Leve bann prins, vers delwil lor boukliye!
6 Parski ala seki Zeova ti dir mwa:
“Ale, met enn gardien ek li bizin dir seki li trouve.”
7 Ek li ti trouv enn kales lager avek bann seval,Enn kales lager avek bann bourik,Enn kales lager avek bann samo.
Li ti pe get bien, li ti pe fer bien atansion kan li ti pe gete.
8 Lerla li ti kriye kouma enn lion:
“A Zeova, toutlong lazourne, mo dibout lor latour kot veye,*Ek touleswar mo res dan plas kot mo veye.
9 Get seki pe vini:
Bann zom dan enn kales lager avek bann seval!”
Lerla li ti kriye ek ti dir:
“Li’nn tonbe! Babilonn inn tonbe!
Li’nn zet tou so bann zidol anba ek li’nn kraz zot!”
10 A mo pep ki’nn gagn bate kouma bat dible,Twa garson* ki’nn gagne dan plas kot mo bat dible,Mo’nn dir twa seki mo’nn tande ar Zeova Sef bann larme, Bondie Izrael.
11 Enn mesaz kont Douma:*
Kikenn pe kriye mwa depi Seir:
“Gardien, komie letan reste avan ki ariv gramatin?
Gardien, komie letan reste avan ki ariv gramatin?”
12 Gardien-la ti dir:
“Gramatin pe vini mem la, ek lanwit osi.
Si zot ena pou poz kestion, poz kestion.
Revini ankor!”
13 Enn mesaz kont laplenn ki dan dezer:
A zot bann vwayazer Dedann ki avek zot samo,Zot pou pas lanwit dan lafore, dan laplenn ki dan dezer.
14 Ek zot, bann abitan pei Tema,Al kit delo ar sa kikenn ki swaf la,Ek amenn dipin pou sa kikenn ki pe sove la.
15 Parski zot inn sove devan bann lepe, devan lepe ki’nn pare pou atake,Devan lark ki’nn pare pou tir fles, ek devan lager ki san pitie.
16 Parski ala seki Zeova ti dir mwa: “Dan lespas enn an, parey kouma bann lane enn travayer,* Kedar pou perdi tou so laglwar.
17 Parmi bann solda Kedar, bien tigit zom ki konn tir lark ki pou reste, parski Zeova, Bondie Izrael inn koze.”
Not
^ Li paret ki sa fer referans ar rezion kot ansien Babilonn ti ete.
^ Lit., “mo bann laans ranpli ar douler.”
^ Ouswa “latour degard.”
^ Ouswa “sereal.”
^ Vedir “Silans.”
^ Ouswa “konte bien parey kouma enn travayer fer”; setadir, dan exakteman enn an.
