Izai 3:1-26
3 Parski gete! vre Segner, Zeova Sef bann larme,Pe tir dan Zerizalem ek dan Zida tou kalite led ek tou seki zot bizin,Tou dipin ek tou delo,
2 Bann zom for ek bann gerye,Bann ziz ek bann profet, bann dimounn ki predir lavenir ek bann ansien,
3 Bann sef,* bann dimounn inportan, ek bann konseye,Bann ki konn bien fer mazik ek bann longanis profesionel.
4 Mo pou fer bann garson vinn zot prins,Ek se bann dimounn ki touletan sanz lide* ki pou diriz zot.
5 Bann dimounn pou fer dominer avek zot kamarad,Sakenn pou fer dominer ar so prosin.
Bann garson pou atak bann vie dimounn,Ek bann dimounn ki pena linportans pou mepriz bann dimounn ki lezot respekte.
6 Sakenn pou trap so frer dan lakaz so papa ek pou dir:
“To ena enn manto, alor vinn nou sef.
Diriz sa plas ki’nn detrir la.”
7 Me sa zour-la li pa pou dakor ek li pou dir:
“Pa mwa ki pou swagn zot dimal;*Mo pena ni manze ni linz dan mo lakaz.
Pa fer mwa vinn sef lor sa pep-la.”
8 Zerizalem inn tonbe,Ek Zida inn tonbe,Parski zot inn rebel kont Zeova par zot bann parol ek zot bann aksion;Zot pa montre respe dan so prezans ki ranpli ar laglwar.
9 Zot figir mem kondann zot,Ek zot pa onte pou koz lor zot bann pese, parey kouma bann abitan Sodom;Zot pa esey kasiet sa.
Maler lor zot, parski zot pe amenn zot prop maler!
10 Dir bann dimounn drwat ki tou pou pas bien pou zot;Pou rekonpans zot pou seki zot fer.*
11 Maler lor sa kikenn ki move la!
Li pou gagn maler,Parski kouma li’nn fer ar lezot, koumsa mem pou fer ar li!
12 Me konsernan mo pep, so bann sef pe fer dominer ar li,Ek se bann fam ki pe diriz li.
Mo pep, to bann sef pe fer twa tourn an ron,Ek bann-la pe kree konfizion pou ki to pa kone ki semin to bizin pran.
13 Zeova pe prepar li pou akize;Li pe debout pou pronons so santans lor bann pep.
14 Zeova pou ziz bann ansien ki dan so pep ek so bann prins.
“Zot finn bril karo rezin,Ek seki zot inn kokin ar bann pov, li dan zot lakaz.
15 Kouma zot inn oze kraz mo pepEk fer dominer ar bann pov?” ala seki Segner Siprem,* Zeova Sef bann larme dir.
16 Zeova dir: “Parski bann tifi Sion zot arogan,Zot marse latet ot,*Zot fer zes avek zot lizie, kas-kas lerin kan zot marse,Fer lasenn ki dan zot seviy* sone,
17 Zeova pou osi fer bann tifi Sion gagn bann lakok* lor zot koko latet,Ek Zeova pou fer zot vinn sov.
18 Sa zour-la Zeova pou tir bann kitsoz ki rann zot zoli: zot bann lasenn seviy,Zot bann bando ek zot bann bizou dan form lalinn,
19 Zot bann zanon,* zot bann brasle, ek zot bann vwal,
20 Zot bann foular pou latet, zot bann bizou pou lipie, ek zot bann sintir,Zot bann flakon parfin, ek zot bann talisman,
21 Zot bann bag pou ledwa ek zot bann pouli,
22 Zot bann long rob pou bann lokazion spesial,Zot bann rob ki zot mete lao zot bann linz, zot bann manto, ek zot bann sak,
23 Zot bann ti laglas ek zot bann linz an lin,*Zot bann tok* ek zot bann vwal.
24 Olie parfin delwil balzam,* pou ena enn loder gate;Olie enn sintir, pou ena enn lakord;Olie enn zoli kwafir, zot latet pou sov;Olie enn linz ki ser, zot pou ena enn linz an latwal sak;Ek olie ki zot zoli, zot pou ena enn sikatris.*
25 To bann zom pou mor ar lepe,Ek to bann zom for pou mor dan lager.
26 Bann lantre lavil pou an-dey ek tris,Ek Sion pou asize anba.”
Not
^ Ouswa “sef lor bann group 50 dimounn.”
^ Ouswa “pa stab.”
^ Ouswa “geri zot.”
^ Lit., “zot pou manz frwi zot bann aksion.”
^ Ouswa “Souverin Segner.”
^ Lit., “redi zot likou kan zot marse.”
^ Setadir, payal.
^ Ouswa “lakrout.”
^ Ouswa “zanon apandan.”
^ Ouswa “bann linz andan.”
^ Ouswa “tirban.”
^ Get Lexplikasion Bann Mo.
^ Setadir, enn mark brile lor lekor enn esklav ouswa enn prizonie.
