Izai 33:1-24
33 Maler lor twa, sa kikenn ki detrir la, me ki pa’nn detrir;Twa ki enn tret, me ki personn pa’nn trayir!
Kan to pou fini detrir lezot, pou detrir twa.
Kan to pou fini trayir lezot, pou trayir twa.
2 A Zeova, montre nou to faver.
Nou met nou lespwar dan twa.
Vinn nou lebra* toule gramatin,Wi, vinn nou delivrans kan nou dan difikilte.
3 Kan bann pep tann tapaz, zot sove.
Kan to leve, bann nasion disperse partou.
4 Pou rasanble zot bann dibien parey kouma bann sotrel voras rasanble;Bann dimounn pou sot lor la parey kouma bann larme sotrel.
5 Zeova pou gagn laglwar,Parski li res lao dan lesiel.
Li pou ranpli Sion ar lazistis ek ladrwatir.
6 Li fer sir ki to lavi stab;So trezor se: enn gran delivrans, sazes, konesans, ek enn gran respe pou Zeova.
7 Gete! Zot bann zom ki ena kouraz pe kriye lor semin;Bann mesaze lape pe plore avek enn gran sagrin.
8 Bann gran semin vid;Personn pa pe marse lor bann semin.
Li’nn kas lalians;Li’nn mepriz bann lavil;Li* pa respekte personn.
9 Pei-la an-dey* ek li pe degrade.
Liban pe gagn onte; li’nn pouri.
Saronn inn vinn kouma enn dezer,Ek Basann ek Karmel pe debaras zot ar zot bann fey.
10 Zeova dir, “Aster-la mo pou leve.
Aster-la mo pou donn momem laglwar;Aster-la mo pou montre mo grander.
11 Zot bann move dimounn, zot bann plan ek zot bann travay dan vid. Sa kouma lerb sek ek lapay.
Zot prop lespri pou bril zot net kouma enn dife.
12 Ek bann pep pou vinn parey kouma laso ki’nn brile;
Parey kouma bann pikan ki’nn koupe, pou bril zot ar dife.
13 Zot ki bien lwin, ekout seki mo pou fer!
Ek zot ki pre, rekonet mo pwisans!
14 Bann ki fer pese dan Sion, dan enn gran laper;Bann ki rebel kont Bondie* pe tranble:
‘Kisann-la parmi nou kapav viv kot ena enn dife ki bril tou?
Kisann-la parmi nou kapav viv avek bann laflam ki zame pa tengn?’
15 Enn dimounn ki kontign fer seki zis,Ki dir seki drwat,Ki refiz bann kitsoz ki gagne dan enn fason malonet, ouswa par frod,Ki refiz pran brayb,Ki ferm so zorey kan tann koz lor disan ki pou verse,Ek ki ferm so lizie pou evit trouv seki move.
16 Li pou res dan bann oter;Li pou rod enn proteksion* ki sir dan bann fortres an ros,Li pou gagn dipin,Ek zame li pa pou mank delo.”
17 To lizie pou trouv enn lerwa dan so laglwar;Zot pou trouv enn pei ki bien lwin.
18 Ek dan to leker to pou reflesi lor* sa kitsoz ki fer twa per la, ek to pou demann tomem:
“Kot sekreter-la?
Kotsa sa kikenn ki ti pez tax la?
Kotsa sa kikenn ki ti abitie kont bann latour la?”
19 To pou nepli trouv sa pep ki insolan la,Enn pep ki so langaz tro difisil* pou konpran,Ek to pa konpran kan zot koze parski zot gaga.
20 Get Sion, lavil nou bann fet!
To lizie pou trouv Zerizalem kouma enn plas ki trankil pou reste,Kouma enn latant ki pa pou bouze.
Zame personn pa pou tir bann pike sa latant-la,Ek personn pa pou kas okenn so bann lakord.
21 Me laba, Zeova, sa Kikenn Ki Gran ek Manifik la,Pou vinn pou nou enn landrwa kot ena bann larivier, ek bann gran kanal,Kot okenn bato ki ena bann ram pa pou ale,Ek kot okenn gran bato pa pou pase.
22 Parski Zeova li nou Ziz,Se Zeova ki donn nou bann lalwa,Zeova li nou Lerwa;Se Limem ki pou sov nou.
23 To bann lakord pou las;Zot pa pou kapav ni tini lema bato, ni larg so lavwal.
Sa lepok-la, pou partaz gran kantite dibien ki’nn gagne dan lager;Mem bann ki bwate pou pran enn gran parti sa bann dibien-la.
24 Ek okenn abitan pa pou dir: “Mo malad.”
Lepep ki res dan sa pei-la pou gagn pardon pou so fot.
Not
^ Ouswa “lafors.”
^ Pe fer referans ar enn lennmi.
^ Ouswa kitfwa, “pe sek.”
^ Lit., “Bann aposta.”
^ Ouswa “oter.”
^ Lit., “rapel.”
^ Lit., “profon.”
