Izai 34:1-17
34 Vinn pre pou tande, zot bann nasion,Ek ekout bien, zot bann pep.
Ki later ek seki ena ladan ekoute,Wi, pei-la ek tou seki li prodir.
2 Parski Zeova ankoler kont tou bann nasion,Ek li bien ankoler kont tou zot larme.
Li pou detrir zot net;Li pou fer zot gagn enn lamor kriel.
3 Pou zet zot bann kadav deor,Ek loder zot bann kadav pou monte;Bann montagn pou fonn akoz zot disan.*
4 Tou bann larme dan lesiel pou pouri,Ek pou anroul lesiel parey kouma anroul enn roulo.
Tou zot bann larme pou sek ek tonbe,Parey kouma enn fey sek tonbe depi enn pie rezinEk parey kouma enn fig ki’nn fletri tonbe depi enn pie fig.
5 “Parski dan lesiel mo lepe pou mouye.
Li pou desann pou ziz Edom,Enn pep ki mo’nn deside pou detrir net.
6 Zeova ena enn lepe; lepe-la pou kouver avek disan.
Li pou kouver avek lagres,Avek disan bann zenn mouton ek bann kabri,Avek lagres rognon bann mouton.
Parski Zeova inn prepar enn sakrifis dan Bosra,Enn kantite disan pou verse dan pei Edom.
7 Bann toro sovaz pou desann avek zot,Bann zenn toro ansam avek bann ki for.
Zot pei pou bengn dan disan,Ek zot lapousier pou plin ar lagres.”
8 Parski Zeova inn fixe enn zour kot li pou tir vanzans,Enn lane kot li pou demann bann kont pou ditor ki’nn fer kont Sion.
9 So* bann larivier pou sanze pou vinn koltar,Ek so lapousier pou vinn kouma souf,Ek so later pou vinn kouma koltar ki pe brile;
10 Sa pa pou tengn ni dan lanwit ni dan lazourne;So lafime pou kontign monte pou touletan.
Pei-la pou res abandone, zenerasion apre zenerasion;Zame personn pa pou pas ladan ankor pou touletan.
11 Pei-la pou vinn pou bann pelikan ek bann tang,*Ek bann ibou long zorey ek bann korbo pou res dan pei-la.
Avek enn difil ki mezire ek enn plon,* Bondie pou mezir sa pei-la,Pou montre ki li pou vinn vid ek ki li pa pou vo nanye.
12 Personn parmi so bann dimounn ki sorti dan enn gran fami pa pou vinn lerwa,Ek tou so bann prins pou disparet.
13 Bann pikan pou pouse dan so bann latour ki bien solid,Bann pie pikan ek bann move-zerb ki ena pikan pou pouse dan so bann fortres.
Bann lisien sovaz* pou res laba,Ek li pou vinn enn lanklo pou bann otris.
14 Bann zanimo ki viv dan dezer pou zwenn bann zanimo ki irle,Ek bann kabri sovaz* pou kriye zot kamarad.
Wi, bann zwazo ki aktif aswar pou res laba ek zot pou gagn enn plas pou repoz zot.
15 Laba, bann serpan-fles pou aranz zot nik ek ponn dizef,Ek zot pou kouve ek zot pou rasanble bann dizef-la anba zot lonbraz.
Wi, laba bann zwazo milan* pou rasanble, sakenn avek so per.
16 Rod dan liv Zeova ek lir li for:
Pena enn parmi zot ki pou manke;Pena enn parmi zot ki pa pou ena so per,Parski se labous Zeova ki’nn donn sa lord-la,Ek se so lespri ki’nn rasanble zot ansam.
17 Se Limem ki’nn fer tirazosor pou zot,Ek so prop lame inn mezir plas ki’nn donn zot.*
Sa pou vinn pou zot pou touletan;Zot pou res laba zenerasion apre zenerasion.
Not
^ Ouswa “zot disan pou koule lor bann montagn.”
^ Kitfwa sa fer referans ar Bosra, kapital Edom.
^ Mo ebre ki’nn servi isi kitfwa fer referans ar enn mamifer ki kouma enn gro lera ki ena bann long pikan ki li servi pou protez limem. Ek li resanble enn tang.
^ Lit., “bann ros.”
^ Li enn lisien ki ena enn long lagel bien pwint ek enn lake bien touf ek ki resanble enn renar.
^ Ouswa kitfwa, “bann demon ki resanble kabri.”
^ Enn zwazo ki resanble enn leg.
^ Lit., “inn partaz sa pou zot avek enn difil ki mezire.”
