Izai 40:1-31
40 Zot Bondie dir, “Konsol mo pep, konsol zot.
2 Koz ar leker* Zerizalem,Ek anons li ki travay dir ki li ti oblize fer inn fini,Ki’nn fini pey pou so bann pese.
Se ar lame Zeova ki li’nn gagn pinision ki li ti bizin* pou tou so bann pese.”
3 Enn lavwa pe kriye dan dezer:
“Ouver* semin Zeova!
Ouver enn gran semin ki kler dan dezer pou nou Bondie.
4 Konble tou bann vale,Fer tou bann montagn ek bann kolinn vinn plat.
Bann terin ki pa nivo bizin vinn nivo,Ek bann terin kot ena ros bizin vinn enn laplenn.
5 Pou revel laglwar Zeova,Ek tou dimounn pou trouv sa,Parski Zeova inn dir sa ar so labous.”
6 Ekoute! Kikenn pe dir: “Kriye!”
Enn lot demande: “Ki mo bizin kriye?”
“Tou dimounn parey kouma lerb ver.
Tou zot lamour fidel parey kouma fler dan karo.
7 Lerb ver sek,Bann fler fletri,Parski Zeova soufle lor la avek so souf.*
Vremem, bann dimounn zot zis bann lerb ver.
8 Lerb ver sek,Bann fler fletri,Me parol nou Bondie li dire pou touletan.”
9 Mont lor enn montagn ki bien ot,Twa fam ki pe amenn enn bon nouvel pou Sion.
Kriye avek enn lavwa bien for,Twa fam ki pe amenn enn bon nouvel pou Zerizalem.
Pa gagn per pou kriye bien for.
Dir bann lavil ki dan Zida: “Ala to Bondie.”
10 Gete! Segner Siprem* Zeova pou vini avek pwisans,Ek so lebra pou dirize pou li.
Gete! Rekonpans ki li done avek li,Ek lapey ki li done, devan li.
11 Parey kouma enn berze, li pou pran swin* so troupo.
Avek so lebra, li pou rasanble bann ti mouton,Ek li pou sarye zot lor so lestoma.
Avek prekosion li pou gid bann mouton ki ankor pe donn zot bann tipti bwar.
12 Kisann-la ki’nn mezir tou delo dan so lame,Ek inn pran mezir* lesiel avek larzer so lame?*
Kisann-la ki’nn ramas tou lapousier later dan enn mezir,Ouswa inn pez dan enn balans bann montagnEk bann kolinn?
13 Kisann-la ki’nn mezir* lespri Zeova?
Ek kisann-la kapav vinn so konseye ek ansegn li?
14 Avek kisann-la li’nn al rod konsey pou konpran?
Ouswa kisann-la ki ansegn li ki ete semin lazistis?
Ouswa kisann-la ki ansegn li konesans?
Ouswa kisann-la ki montre li kouma pou bien konpran bann kitsoz?
15 Gete! Bann nasion parey kouma enn gout delo dan enn seo,Ek parey kouma enn kous lapousier lor enn balans.
Gete! Li lev bann zil parey kouma enn ti kous lapousier.
16 Mem bann pie dan Liban pa ase pou ki enn dife kontign brile,Ek so bann zanimo sovaz pa ase pou fer enn sakrifis ki brile.
17 Devan li, tou bann nasion kouma enn kitsoz ki pa existe;Li konsider zot kouma enn nanye ditou, kouma enn kitsoz ki pa reel.
18 Ar kisann-la zot kapav konpar Bondie?
Ar ki kitsoz zot pou dir li resanble?
19 Enn artizan fer enn zidol,*Dimounn ki travay metal rekouver li ar lor,Ek li fer bann lasenn an-arzan.
20 Enn dimounn swazir enn pie kouma enn ofrand,Enn pie ki pa pou pouri.
Li al rod enn bon artizanPou fer enn zidol skilpte ki pa pou devire.
21 Eski zot pa kone?
Eski zot pa’nn tande?
Eski pa’nn dir zot sa depi koumansman?
Eski zot pa’nn konpran depi ki’nn poz fondasion later?
22 Ena enn Kikenn ki res lao serk* later,Ek bann ki res lor la zot kouma bann sotrel.
Li pe tal lesiel kouma enn latwal ki bien fin,Ek li ouver li kouma enn latant pou reste.
23 Li fer bann dimounn ki ena enn gran pozision perdi zot pouvwar,Ek li fer bann ziz* lor later nepli ena valer.
24 Apenn finn plant zot,Apenn finn sem zot,Apenn ki zot finn pran rasinn dan later,Zot inn sek kan inn soufle lor zot,Ek divan inn pran zot inn ale parey kouma lapay.
25 Sa Kikenn Ki Sin la dir: “Ar kisann-la zot pou konpar mwa pou ki li vinn egal ar mwa?
26 Lev zot lizie ek get lesiel.
Kisann-la ki’nn kree tou sa bann kitsoz-la?
Se sa Kikenn ki fer zot sorti kouma enn larme la, sakenn dapre so nimero;Li apel zot tou par zot nom.
Avek tou sa kantite lenerzi aktif ki li ena la ek so lafors ki inpresionan,Pena enn parmi zot ki manke.
27 A Zakob, kifer to pe dir, ek A Izrael, kifer to pe dir,‘Zeova pa pe trouv seki pe ariv mwa,Ek mo Bondie pa pe fer lazistis pou mwa’?
28 Eski to pa kone? Eski to pa’nn tande?
Zeova Kreater later depi enn kote ziska lot kote, li Bondie pou touletan.
Zame li pa fatige ni perdi lafors.
Nou pa kapav konpran* so lintelizans.
29 Li donn lafors seki fatigeEk li donn pwisans an-abondans bann ki mank lafors.*
30 Bann garson pou fatige ek zot pou nepli ena lafors,Ek bann zenom pou kogne ek tonbe,
31 Me bann ki ena lespwar dan Zeova pou regagn lafors.
Zot pou mont dan ler koumadir zot ena lezel, parey kouma bann leg.
Zot pou galoupe ek zot pa pou perdi zot lafors;Zot pou marse ek zot pa pou fatige.”
Not
^ Ouswa “Koz dan enn fason rekonfortan ar.”
^ Ouswa “gagn doub seki li ti bizin.”
^ Ouswa “Prepar.”
^ Ouswa “lespri.”
^ Ouswa “Souverin Segner.”
^ Ouswa “gid.”
^ Ouswa “kalkil dimansion.”
^ Distans ki ena ant enn pous ek ti ledwa kan enn lame ouver. Get Bann Detay B14.
^ Ouswa kitfwa, “ki’nn konpran.”
^ Ouswa “enn stati ki’nn fer avek bann metal ki’nn fonn.”
^ Ouswa “sfer,” setadir, ki dan form enn boul.
^ Ouswa “bann dirizan.”
^ Ouswa “mezir profonder.”
^ Ouswa “lenerzi aktif.”
