Izai 57:1-21
57 Sa dimounn ki drwat la inn mor,Me personn pa pe kas latet.
Bann zom fidel pe mor,Ek personn pa pe remarke ki sa dimounn ki drwat la inn morAkoz bann maler.*
2 Li gagn lape.
Tou bann ki mars avek ladrwatir, pe repoze lor zot lili.*
3 “Me zot, vinn pli pre,Zot ki bann garson enn fam ki fer longanis,Zot ki bann zanfan enn zom ki komet ladilter ek enn fam prostitie:
4 Kisann-la zot pe boufone?
Ar kisann-la zot pe ouver zot labous gran ek zot pe tir zot lalang?
Eski zot pa zanfan bann dimounn ki fer pese,Ek zanfan bann manter?
5 Eski zot pa bann ki ena enn gran dezir imoral parmi bann gran pie,Anba sak pie ki bien ver?
Eski zot pa bann ki touy bann zanfan dan bann vale,Ant* bann gro ros?
6 To’nn swazir bann ros lis ki dan vale.
Wi, samem tou ki to pou gagne.
To’nn mem vers bann ofrand divin pou zot ek donn zot bann kado.
Eski sa bann kitsoz-la bizin fer mwa kontan?*
7 To’nn prepar to lili lor enn montagn ki gran ek ot,Ek to’nn mont laba pou ofer bann sakrifis.
8 Deryer laport ek deryer lankadreman laportTo’nn met enn sinbol ki ena enn rapor avek bann zidol.
To’nn kit mwa ek to’nn tir to linz lor twa;
To’nn mont lao ek to’nn fer plas lor to lili.
To’nn fer enn lalians avek zot.
To kontan dormi avek zot lor mem lili,Ek to admir sex enn zom.*
9 To’nn desann pou al get Melek avek delwilEk enn kantite parfin.
To’nn avoy to bann anbasader bien lwin,Ek to’nn abes twa telman ba ki to’nn desann ziska Tom.*
10 To’nn trime pou swiv tou to bann sime,Me to pa’nn dir, ‘Tousala dan vid!’
To’nn regagn lafors,Akoz sa to pa’nn bes lebra.*
11 Kisann-la to gagn perPou ki to’nn koumans koz manti?
To pa’nn rapel mwa.
To pa’nn pran kont nanye.
Mo’nn res trankil ek mo pa’nn pran kont to bann aksion,Akoz sa to pa’nn per mwa.
12 Mo pou fer konn to ‘lazistis’ ek to bann travay,Ek sa pa pou servi twa nanye.
13 Kan to kriye pou rod led,Sa gran kantite zidol ki to ena la pa pou sap twa.
Enn divan pou pran zot tou pou ale,Enn ti labriz pou balie zot pou ale,Me seki rod mo proteksion pou erit sa pei-laEk mo montagn ki sin pou vinn pou li.
14 Pou dir, ‘Konstrir, konstrir enn larout! Prepar semin!
Tir ninport ki obstak ki kapav ena lor semin mo pep.’”
15 Parski ala seki sa kikenn ki lao la ek ki dan enn pozision bien ot la pe dir,Sa Kikenn ki viv* pou touletan ek ki so nom sin la:
“Mo res dan plas ki lao ek ki sin,Me mo osi res ansam avek bann ki santi zot kraze ek ki ena limilite,Pou fer lespri bann ki ena limilite, revivEk pou fer leker bann ki santi zot kraze, reviv.
16 Parski mo pa pou konbat kont zot pou touletanOuswa kontign res ankoler;Parski lespri enn zom pou vinn feb akoz mwa,Mem bann kreatir ki mo’nn fer ek ki respire.
17 Mo ti ankoler pou pese ki li ti ferAkoz li ti pe galoup deryer bann profi malonet;
Alor mo ti tap li, mo ti kasiet mo figir, ek mo ti ankoler.
Me li ti kontign azir kouma enn tret, ek li ti kontign ekout so leker.
18 Mo’nn trouv seki li’nn fer,Me mo pou geri li ek gid li.
Mo pou re-konsol li* ek bann ki an-dey avek li.”
19 Zeova dir, “Mo pe kree bann parol louanz.*
Pou kontign donn lape sa kikenn ki bien lwin la ek sa kikenn ki pre la,Ek mo pou geri li.”
20 “Me bann move dimounn zot parey kouma enn lamer demonte ki pa kapav kalme,Ek delo sa lamer-la pe kontign zet gomon ek labou.
21 Pena lape pou bann move dimounn,” ala seki mo Bondie dir.
Not
^ Ouswa kitfwa, “Pou ki li pa konn maler.”
^ Setadir, dan tom.
^ Ouswa “Anba fant.”
^ Ouswa “bizin konsol mwa?”
^ Kitfwa sa fer referans ar enn ladorasion ki ena enn lien avek bann zidol.
^ Ouswa “Seol,” setadir, tom kot tou dimounn ale. Get Lexplikasion Bann Mo.
^ Lit., “fatige.”
^ Ouswa “res.”
^ Ouswa “mo pou rekonpans li avek enn konsolasion.”
^ Lit., “frwi lalev.”
