Izai 58:1-14
58 “Kriye avek tou to lafors; pa tini!
Kriye for kouma enn korn.
Fer mo pep konn so dezobeisans,Ek fer bann desandan Zakob konn zot bann pese.
2 Zot rod mwa toulezour,Ek zot dir ki zot vremem anvi konn mo bann fason azir,Koumadir zot ti enn nasion ki ti fer seki drwat,Ek ki pa’nn abandonn lazistis zot Bondie.
Zot demann mwa pou ziz dan enn fason ki zis,Koumadir zot anvi vinn pros ar Bondie.
3 Ek zot dir: ‘Kifer to pa trouve kan nou gard karem?
Ek kifer to pa remarke kan nou fer noumem ditor?’
Parski zour ki zot gard karem, zot rod zot prop lintere,*Ek zot fer dominer ar zot bann travayer.
4 Zot bann karem fini ar diskision ek lager,Ek zot donn bann kout pwin ar violans.
Zot pa kapav gard karem kouma zot pe fer zordi ek panse ki pou tann zot dan lesiel.
5 Eski karem ki mo demann zot fer bizin koumsa:Enn zour kot enn kikenn fer limem ditor,Enn zour kot li vers so latet kouma enn long lerb,Ek fer so lili ar latwal sak ek lasann?
Eski se sa ki zot apel enn karem ek enn zour ki fer Zeova plezir?
6 Non, ala karem ki mwa mo demann zot fer:
Tir bann lasenn mesanste,Larg lakord ki pe atas bann fardo,Liber bann ki pe soufer ek les zot ale,Ek kas tou bann bar zoug* an-de;
7 Partaz osi to dipin avek bann ki pe gagn fin,Amenn bann pov ek bann ki pena lakaz, dan to lakaz,Kan to trouv enn kikenn ki pena linz,* abiy li,Ek pa vir ledo ar to frer.
8 Lerla to lalimier pou briye parey kouma kan soley leve,Ek to pa pou tarde pou geri.
To lazistis pou mars devan twa,Ek depi par deryer laglwar Zeova pou protez twa.
9 Lerla to pou kriye, ek Zeova pou reponn;To pou kriye pou rod led, ek li pou dir, ‘Ala mo la!’
Si to tir bar zoug* ki pe pez lour lor lepep,Ek aret montre ledwa ek koz an mal,
10 Si to donn bann ki pe gagn fin seki tomem to anviEk bann ki pe soufer seki zot bizin,Lerla to lalimier pou briye mem dan nwar,Ek to nwarte pou vinn koumadir anplin midi.
11 Zeova pou touletan gid twaEk donn twa tou seki to bizin mem dan bann later sek;Li pou donn to lezo lafors,Ek to pou vinn kouma enn zardin ki bien aroze,Kouma enn lasours delo ki zame sek.
12 Zot pou rekonstrir pou twa bann lavil ki ti’nn kraze,Ek to pou repar bann fondasion ki ti’nn kraze depi bann zenerasion avan.
Pou apel twa enn kikenn ki repar bann miray kase,Enn kikenn ki repar bann semin kot bann dimounn reste.
13 Si akoz Saba to evit rod to prop lintere pandan mo zour ki sinEk to apel Saba enn kitsoz ki fer gagn gran lazwa,Enn zour ki sin pou Zeova, ek enn zour ki merit laglwar,Ek to donn Saba laglwar olie ki to rod to prop lintereEk to dir bann parol ki dan vid,
14 Lerla to pou gagn enn gran lazwa gras-a Zeova,Ek mo pou fer twa mont dan bann plas ki bien ot lor later.
Mo pou fer twa profit* leritaz Zakob to anset,Parski Zeova inn dir sa ar so labous.”
Not
^ Ouswa “plezir.”
^ Get Lexplikasion Bann Mo.
^ Lit., “touni.”
^ Get Lexplikasion Bann Mo.
^ Lit., “manz.”
