Izai 59:1-21
59 Gete! Lame Zeova pa tro kourt pou delivre,Ni so zorey tro sourd* pou tande.
2 Non, se zot bann prop erer ki’nn separ zot ar zot Bondie.
Akoz zot bann pese li pa’nn les zot trouv so figir,Ek li refiz pou ekout zot.
3 Parski zot lame inn sal ar disan,Ek zot bann ledwa inn sal ar pese.
Zot lalev pe koz manti, ek zot lalang pe mirmire lor bann kitsoz ki inzis.
4 Personn pa pe pran par pou lazistis,Ek tou bann ki pe al lakour pa pe koz laverite.
Zot met zot konfians dan seki fos* ek koz lor bann kitsoz ki pena valer.
Zot ansint maler ek donn nesans seki fer ditor.
5 Zot fer bann dizef enn serpan anpwazone eklo,Ek zot aranz enn lakaz zarenie.
Ninport kisann-la ki manz zot dizef pou mor,Ek enn viper pou sorti dan dizef ki’nn kraze la.
6 Zot pa pou kapav servi zot lakaz zarenie kouma enn linz,Ni zot pa pou kapav kouver zot avek bann kitsoz ki zot inn fer.
Zot fer bann aksion ki fer ditor,Ek zot lame ranpli ar violans.
7 Zot lipie galoupe pou fer seki move,Ek zot prese pou vers disan bann inosan.
Ena zis bann move panse dan zot lespri;Lor zot semin zot amenn destriksion ek maler.
8 Zot pa’nn konn semin lape,Ek pena lazistis lor zot larout.
Zot fer zot semin vinn traver;Ninport kisann-la ki pe mars lor la pa pou konn lape.
9 Ala kifer lazistis bien lwin ar nou,Ek ladrwatir pa’nn ariv ziska kot nou.
Nou kontign espere ki ena lalimier, me gete! ena nwarte;Ki ena enn lekleraz, me nou pe kontign mars dan nwar.
10 Parey kouma bann aveg, nou pe tat-tate pou rod miray;Parey kouma bann ki pa trouv kler, nou pe kontign tat-tate.
Nou pe kogne anplin midi koumadir inn fini ariv aswar;Parmi bann ki for nou koumadir bann dimounn mor.
11 Nou tou nou kontign grogne parey kouma bann loursEk nou plengne ar tristes parey kouma bann kolonb.
Nou espere ki ena lazistis, me pena;Ki ena delivrans, me li bien lwin ar nou.
12 Nou’nn fer boukou move kitsoz devan twa;Sak pese ki nou fer temwagn kont nou.
Parski nou konn bien bann move kitsoz ki nou’nn fer;Nou konn bien nou bann erer.
13 Nou’nn fer pese kont Zeova ek nou’nn renie li;Nou’nn vir nou ledo ar nou Bondie.
Nou ti pe koz zis lor fer dominer ar lezot ek revolte kont Bondie;Dan nou leker nou’nn reflesi ki bann manti nou pou dir ek apre nou’nn dir sa.
14 Inn repous lazistis,Ek ladrwatir pe debout bien lwin;Parski laverite* inn kogne lor plas piblik,Ek seki drwat pa pe kapav rantre.
15 Laverite* inn disparet,Ek pe depouy ninport kisann-la ki vir ledo ar seki move.
Zeova ti trouv sa ek sa pa ti fer li plezir,*Parski pa ti ena lazistis.
16 Li ti trouve ki pena personn,Li ti etone ki personn pa’nn pled pou zot,Alor so prop lebra inn amenn delivrans,*Ek so prop lazistis inn soutenir li.
17 Lerla li ti met lazistis kouma enn zile proteksionEk li ti met elmet delivrans* lor so latet.
Li ti abiy li ar linz vanzansEk li ti anvlop devouman lor li kouma enn manto.*
18 Li pou rekonpans zot pou seki zot inn fer:
Li pou ankoler ar bann ki kont li, li pou pini so bann lennmi.
Ek li pou donn bann zil seki zot merite.
19 Depi kot soley kouse zot pou ena enn gran respe pou nom ZeovaEk depi kot soley leve zot pou ena enn gran respe pou so laglwar,Parski li pou vini kouma delo larivier ki pe desann vit-vit,Ki lespri Zeova pe dirize.
20 Zeova dir: “Sa Kikenn Ki Reaste la pou vinn dan Sion,Pou bann ki dan Zakob ki’nn aret fer pese.”
21 “Ala lalians ki mwa mo fer avek zot,” ala seki Zeova dir. “Mo lespri ki mo’nn met lor zot, mo bann parol ki mo’nn met dan zot labous, pa pou tir sa dan zot labous, dan labous zot bann zanfan, dan labous zot bann ti-zanfan, depi aster-la mem ek pou touletan,” ala seki Zeova dir.
Not
^ Lit., “lour.”
^ Ouswa “vid.”
^ Ouswa “lonette.”
^ Ouswa “Lonette.”
^ Lit., “ek sa pa ti bon devan so lizie.”
^ Ouswa “laviktwar pou li.”
^ Ouswa “laviktwar.”
^ Ouswa “manto san mans.”
