Izai 60:1-22
60 “Leve, A fam, fann to lalimier, parski to lalimier inn arive.
Laglwar Zeova pe briye lor twa.
2 Parski, gete! nwarte pou kouver later,Ek enn gran marenwar pou kouver bann pep;Me lor twa Zeova pou briye, ek lor twa pou trouv so laglwar.
3 Bann nasion pou al ver to lalimier,Ek bann lerwa pou al ver to laglwar ki pe briye.*
4 Lev to lizie ek get toutotour twa!
Inn rasanble zot tou ansam; zot pe vinn ver twa.
To bann garson ki sorti lwin pe kontign vini,Ek pe sarye to bann tifi lor laans.
5 Sa lepok-la to pou trouve ek vremem to pou dan lazwa,Ek to leker pou vibre ek pou deborde ar lazwa,Parski bann rises lamer pou vinn ver twa;Dibien bann nasion pou vinn ver twa.
6 Enn kantite samo pou kouver to pei,*Bann zenn samo Madian ek Efa.
Tou bann ki sorti Saba pou vini;Zot pou sarye lor ek lansan blan.*
Ek zot pou anons bann louanz Zeova.
7 Pou rasanble tou bann troupo Kedar kot twa.
Bann mouton mal Nebayot pou servi twa.
Zot pou vinn lor mo lotel ek mo pou aksepte zot,Ek mo pou fer mo lakaz ki ranpli ar laglwar* vinn zoli.
8 Kisann-la sa bann ki pe anvole parey kouma bann niaz la?
Ek kisann-la ki parey kouma bann kolonb ki pe anvole pou al dan zot lakaz?*
9 Parski bann zil pou ena lespwar dan mwa;Bann bato Tarsis zot par devan,*Zot pou amenn to bann garson depi bien lwin,Ansam avek zot larzan ek zot lor,Ver nom Zeova to Bondie ek ver sa Kikenn Ki Sin dan Izrael la,Parski li pou donn twa laglwar.*
10 Bann etranze pou aranz to bann miray,Ek zot bann lerwa pou servi twa,Parski dan mo koler mo ti bat twa,Me mo pou montre twa mo faver ek mo pou ena pitie pou twa.
11 To bann laport pou touletan res ouver;Zot pa pou ferme ni pandan lazourne ni pandan lanwit,Pou ki kapav amenn bann rises bann pep ver twa,Ek zot bann lerwa pou bann premie pou fer sa.
12 Parski ninport ki pep ek ninport ki rwayom ki pa pou servi twa pou detrir,Ek bann pep pou detrir net.
13 Laglwar Liban pou vinn kot twa,Pie zenevriye, pie frenn ek pie sipre pou vinn ansam,Pou fer plas kot mo tanp ete vinn zoli,Mo pou donn laglwar plas kot mo lipie ete.
14 Bann garson bann ki pe fer dominer ar twa pou vinn kourbe devan twa;Tou bann ki tret twa san okenn respe pou bizin kourbe devan to lipie,Ek zot pou bizin apel twa lavil Zeova,Sion, lavil sa Kikenn Ki Sin dan Izrael la.
15 Olie ki abandonn twa ek deteste twa, san ki personn pas kot twa,Mo pou fer twa vinn kouma enn lasours fierte pou touletan,Enn kitsoz ki fer dimounn kontan, zenerasion apre zenerasion.
16 Wi, to pou bwar dile bann pep,Ek se ar bann lerwa ki to pou tete;Ek vremem, to pou kone ki mwa, Zeova, mo to Sover,Ek sa Kikenn Ki Pwisan dan Zakob la, limem sa Kikenn Ki Reaste twa la.
17 Dan plas kwiv mo pou amenn lor,Ek dan plas feray mo pou amenn larzan,Dan plas dibwa mo pou amenn kwiv,Ek dan plas bann ros mo pou amenn feray;Ek mo pou fer lape vinn zot bann responsabEk lazistis pou vinn kouma bann ki donn zot travay.
18 Pou nepli tann koz lor violans dan to pei,Ni destriksion, ni dega dan to bann teritwar.
Ek to pou apel to bann miray Delivrans ek to bann laport Louanz.
19 Pou twa, soley pou nepli enn lalimier ki eklere lizour,Ek lekleraz lalinn pou nepli ekler twa.
Parski Zeova pou vinn pou twa enn lalimier ki eklere pou touletan,Ek to Bondie pou vinn to bote.
20 To soley pou nepli kouse,Ek to lalinn pou nepli disparet ankor,Parski Zeova pou vinn pou twa enn lalimier ki eklere pou touletan,Ek bann zour to dey pou fini.
21 Ek tou to pep pou bann dimounn drwat;Sa later-la pou vinn pou zot pou touletan.
Zotmem bourzon ki mo’nn plante,Travay mo lame ki pou fer mwa vinn zoli.
22 Seki tipti pou vinn enn milyeEk seki tigit pou vinn enn pep for.
Mwa Zeova, mo pou akseler sa dan so ler.”
Not
^ Ouswa “klarte to soley ki pe leve.”
^ Lit., “twa.”
^ Get Lexplikasion Bann Mo.
^ Ouswa “mo zoli lakaz.”
^ Ouswa “dan lantre lakaz zwazo.”
^ Ouswa “parey kouma dan koumansman.”
^ Ouswa “fer twa vinn zoli.”
