Izai 61:1-11
61 Lespri Segner Siprem* Zeova lor mwa,Parski Zeova inn swazir mwa pou anons bon nouvel ar bann dimounn ki ena douser.
Li’nn avoy mwa pou met enn bandaz lor bann leker ki’nn kase,Pou anons bann prizon ie ki zot pou libere,Ek pou anons bann ki an kaptivite ki zot lizie pou ouver bien gran,
2 Pou anons lane kot Zeova montre so faver,Ek zour vanzans nou Bondie,Pou konsol tou bann ki an-dey,
3 Pou pran swin bann ki an-dey akoz Sion,Pou donn zot enn foular pou latet olie lasann,Pou donn zot delwil pou ki zot dan lazwa olie ki zot an-dey,Enn linz ki donn louanz olie enn gran dezespwar.
Ek pou apel zot bann gran pie lazistis,Bann ki Zeova inn plante, pou ki donn li laglwar.*
4 Zot pou re-aranz bann vie lavil ki’nn kraze depi lontan;Zot pou redres bann landrwa ki’nn vinn dezer dan lepase,Ek zot pou repar bann lavil ki’nn kraze,Bann landrwa kot personn pa’nn reste zenerasion apre zenerasion.
5 “Bann etranze pou vini ek pou okip zot troupo,Ek bann etranze pou vinn zot bann planter ek pou okip zot bann plantasion rezin.
6 Me zot, pou apel zot bann pret Zeova;Bann-la pou apel zot bann serviter nou Bondie.
Zot pou servi rises bann pep,Ek zot pou fier akoz rises* bann pep-la.
7 Olie laont, zot pou gagn de fwa plis benediksion,Ek olie imiliasion, zot pou kriye ar lazwa akoz benediksion ki zot pou gagne.
Wi, zot pou gagn de fwa plis benediksion dan zot pei,Ek zot pou touletan dan lazwa.
8 Parski mwa, Zeova, mo kontan lazistis;Mo deteste dimounn ki kokin ek mo deteste linzistis.
Avek fidelite mo pou donn zot, zot lapey,Ek mo pou fer enn lalians eternel avek zot.
9 Bann nasion pou konn bann-la zot desandansEk bann pep pou konn bann-la zot bann desandan.
Tou bann ki trouv zot pou rekonetKi bann-la zot sa desandans ki Zeova inn beni la.”
10 Mo pou dan enn gran lazwa gras-a Zeova.
Avek tou mo leker mo pou dan lazwa gras-a mo Bondie.
Parski li’nn abiy mwa avek bann linz delivrans;Li’nn anvlop mwa avek enn long linz* lazistis,Parey kouma enn nouvo marye ki met enn tok* ki parey kouma tok ki enn pret mete,Ek parey kouma enn lamarye ki met bann bizou pou fer li vinn pli zoli.
11 Parski parey kouma later prodir so bann bourzon,Ek parey kouma zardin fer bann kitsoz ki’nn seme zerme,Dan mem fason Segner Siprem ZeovaPou fer lazistis ek louanz zerme devan tou bann pep.
Not
^ Ouswa “Souverin Segner.”
^ Ouswa “pou ki fer li vinn zoli.”
^ Lit., “laglwar.”
^ Ouswa “manto san mans.”
^ Ouswa “tirban.”
