Let pou Bann Kolosien 3:1-25
3 Selman, si finn resisit* zot avek Lekris, kontign rod bann kitsoz ki lao, kot Lekris pe asize dan kote drwat Bondie.
2 Gard zot lespri fixe lor bann kitsoz ki lao, pa lor bann kitsoz ki lor later.
3 Parski zot inn mor, ek finn kasiet zot lavi avek Lekris dan linite avek Bondie.
4 Kan Lekris, nou lavi, aparet, lerla zot osi zot pou aparet avek li dan so laglwar.
5 Alor, touy bann manb zot lekor ki lor later ki an rapor avek limoralite sexiel,* linpirte, bann dezir sexiel ki pa kontrole, bann dezir ki fer ditor, ek lanvi pou gagn plis, ki enn form lidolatri.
6 Se akoz sa bann kitsoz-la ki koler Bondie pe vini.
7 Se koumsa mem ki zot osi zot ti pe konport zot* dan fason ki zot ti pe viv avan.*
8 Me aster-la zot bizin rezet tou sa bann kitsoz-la: laraz, lakoler, lemal, bann insilt, ek fode pa ki bann parol vilger sort dan zot labous.
9 Pa koz manti sakenn ar zot kamarad. Tir vie personalite* lor zot ansam avek so bann pratik,
10 ek abiy zotmem ar nouvo personalite, ki gras-a konesans exakt pe kontign renouvle dapre resanblans sa Kikenn ki finn kree li la,
11 kot pena ni Grek ni Zwif, ni dimounn ki fer sirkonsizion, ni dimounn ki pa fer sirkonsizion, ni etranze, ni Sit,* ni esklav ouswa dimounn lib, me Kris li tou kitsoz ek dan tou.
12 Alor, kouma bann dimounn ki Bondie inn swazir, bann dimounn ki sin ki li kontan, abiy zotmem ar lafeksion ranpli avek tandres ek konpasion, zantiyes, limilite, douser, ek pasians.
13 Kontign siport sakenn zot kamarad ek pardonn sakenn zot kamarad avek tou zot leker mem si kikenn ena enn rezon pou plengne kont enn lot. Parey kouma Zeova* inn pardonn zot avek tou so leker, fer parey zot osi.
14 Me anplis tou sa bann kitsoz-la, abiy zotmem ar lamour, parski li enn lien ki ini bann dimounn ansam dan enn fason parfe.
15 Ek les lape Lekris diriz* zot leker, parski finn apel zot pou sa lape-la dan enn sel lekor. Anplis touletan montre rekonesans.
16 Ki parol Lekris res an-abondans dan zot avek tou so sazes. Kontign ansegn ek ankouraz* sakenn zot kamarad par bann psom, bann louanz pou Bondie, ek bann sante spiritiel ki zot sante avek rekonesans.* Kontign sant pou Zeova* dan zot leker.
17 Tou seki zot fer, par parol ouswa par aksion, fer tousala dan nom Lesegner Zezi, ek remersie Bondie nou Papa par li.
18 Zot, bann fam, zot bizin soumet ar zot mari, parey kouma bann disip Lesegner bizin fer.
19 Zot, bann mari, kontign kontan zot fam ek pa vinn amer ar zot.*
20 Zot, bann zanfan, obeir zot paran dan tou kitsoz, parski sa fer plezir Lesegner.
21 Zot, bann papa, pa enerv* zot bann zanfan, pou ki bann-la pa dekouraze.
22 Zot, bann esklav, obeir zot bann met lor later* dan tou kitsoz, pa zis kan bann-la pe gete, zis pou fer dimounn plezir, me avek enn leker sinser ek enn gran respe* pou Zeova.*
23 Tou seki zot fer, fer li avek tou zot lafors ek tou zot leker* koumadir pou Zeova,* ek pa pou bann zom,
24 parski zot kone ki se ar Zeova* ki zot pou gagn enn leritaz an rekonpans. Travay kouma bann esklav pou zot Met, Kris.
25 Pena dout, dimounn ki fer seki move pou gagn pinision pou bann move kitsoz ki li’nn fer, ek Bondie pa fer preferans.
Not
^ Lit., “lev.”
^ Grek, por·nei′a. Get Lexplikasion Bann Mo.
^ Ouswa “abitie marse.”
^ Ouswa “kan zot ti pe amenn sa kalite lavi-la.”
^ Lit., “zom.”
^ “Sit” inplik bann dimounn ki pa sivilize.
^ Get Lexplikasion Bann Mo.
^ Ouswa “kontrol.”
^ Ouswa “ek ki fer plezir pou tande.”
^ Get Lexplikasion Bann Mo.
^ Ouswa “konsey.”
^ Ouswa “pa ankoler ar zot; pa tret zot dan enn fason dir.”
^ Ouswa “provok; irit.”
^ Ouswa “met ki imin.”
^ Lit., “lakrint.”
^ Get Lexplikasion Bann Mo.
^ Grek, psy·khe’. Get Lexplikasion Bann Mo.
^ Get Lexplikasion Bann Mo.
^ Get Lexplikasion Bann Mo.
