Bon Nouvel Dapre Matie 4:1-25
4 Apre sa, lespri Bondie ti amenn Zezi dan dezer pou ki Lediab tant li.
2 Apre ki Zezi pa ti manz nanye pandan 40 zour ek 40 nwit, li ti gagn fin.
3 Lerla Tantater ti vini ek ti dir li: “Si to enn garson Bondie, dir sa bann ros-la vinn dipin.”
4 Me li ti reponn: “Finn ekrir: ‘Zom bizin viv, pa zis ar dipin, me ar tou parol ki sorti dan labous Zeova.’”*
5 Lerla Lediab ti amenn li dan lavil ki sin, ek ti met li lao net lor miray* tanp
6 ek li ti dir li: “Si to enn garson Bondie, zet twa anba, parski finn ekrir: ‘Li pou donn so bann anz enn lord ki konsern twa,’ ek, ‘Zot pou sarye twa dan zot lame, pou ki to lipie pa tap avek enn ros.’”
7 Zezi ti dir li: “Finn ekrir osi: ‘Fode pa to teste Zeova* to Bondie.’”
8 Apre sa, Lediab ti amenn li lor enn montagn ki extra ot ek ti montre li tou bann gouvernman* dan lemond ek zot laglwar.
9 Li ti dir Zezi: “Mo pou donn twa tou sa bann kitsoz-la si to tom azenou devan mwa ek ador mwa enn sel fwa.”
10 Lerla Zezi ti dir li: “Sorti la ale, Satan! Parski finn ekrir: ‘Se Zeova* to Bondie ki to bizin adore, ek se zis li tousel ki to bizin donn enn servis sakre.’”
11 Lerla Lediab ti kit li, ek gete! bann anz ti vini ek ti koumans ed li ek donn li seki li bizin.
12 Kan Zezi ti tann dir ki finn aret Zan, li ti al Galile.
13 Plitar, li ti kit Nazaret ek li ti al res Kafarnaom pre ar lamer dan bann distrik Zabilon ek Neftali,
14 pou realiz seki Bondie ti dir atraver profet Izai:
15 “A! teritwar Zabilon ek teritwar Neftali, zot ki lor semin lakot, lot kote Zourdin, dan teritwar Galile, kot bann etranze reste!
16 Bann dimounn ki ti pe asiz dan nwar ti trouv enn gran lalimier, ek pou bann ki ti pe asiz dan enn landrwa kot ena lonbraz lamor, lalimier ti ekler zot.”
17 Depi sa moman-la, Zezi ti koumans prese ek dir: “Repanti, parski Rwayom ki dan lesiel inn koste.”
18 Kan li ti pe mars dan bor Lamer Galile, li ti trouv de frer. Ti ena Simon, ki osi apel Pier, ek so frer Andre, ki ti pe zet enn file dan lamer, parski zot ti bann peser.
19 Li ti dir zot: “Vini, swiv mwa ek mo pou fer zot lapes bann dimounn.”
20 Deswit zot ti kit zot bann file ek zot ti swiv li.
21 Inpe pli lwin, li ti trouv de lezot frer, Zak ek so frer Zan, bann garson Zebede. Zot ti dan bato avek zot papa ek zot ti pe repar zot bann file. Lerla Zezi ti apel zot.
22 Deswit zot ti kit bato-la ek zot papa, ek zot ti swiv li.
23 Lerla li ti al partou dan Galile, pou ansegne dan zot bann sinagog ek pres bon nouvel lor Rwayom Bondie ek geri tou sort kalite maladi ek problem lasante ki bann dimounn ti gagne.
24 Partou dan Siri, nouvel ti pe fane lor li. Zot ti amenn ar li tou bann ki ti pe soufer akoz plizir maladi ek douler, bann ki ti posede ar demon, bann epileptik ek bann ki ti paralize, ek li ti geri zot.
25 Akoz sa, bann gran lafoul ti swiv li depi Galile, Dekapol,* Zerizalem, Zide ek depi lot kote Zourdin.
Not
^ Get Lexplikasion Bann Mo.
^ Ouswa “lor parape; lor plas pli lao lor.”
^ Get Lexplikasion Bann Mo.
^ Lit., “rwayom.”
^ Get Lexplikasion Bann Mo.
^ Ouswa “rezion kot ena dis lavil.” Get Lexplikasion Bann Mo.
