Nonb 11:1-35
11 Lepep ti koumans plengne enn kantite devan Zeova. Kan Zeova ti tann sa, li ti extra ankoler, ek enn dife ki sorti kot Zeova ti koumans vinn lor zot ek ti bril sertin ki ti dan bor kan-la.
2 Kan lepep ti koumans kriye Moiz pou ed zot, li ti sipliy Zeova, ek dife-la ti tengn.
3 Alor ti apel sa plas-la Tabera,* parski enn dife ki sorti kot Zeova ti vinn lor zot.
4 Apre sa, sa lafoul tou sort kalite dimounn* ki ti ansam avek bann Izraelit la, ti exprim enn dezir egois, ek bann Izraelit osi ti rekoumans plore ek ti dir: “Kisann-la pou donn nou laviann pou manze?
5 Nou ena bann bon souvenir pwason ki nou ti abitie manze gratis dan Lezip, ek ti ena osi bann kokom, bann melondo, bann pwaro, bann zwanion ek lay.
6 Me aster, nou pe deperi. Nou pa trouv nanye apart sa lamann-la.”
7 Ofet, lamann ti kouma lagrin kotomili, ek li ti resanble delyom.*
8 Lepep ti al partou pou ramas li, ek ti kraz li dan bann moulin ki tourne ar lame, ouswa ti pil li dan enn mortie. Lerla, zot ti bwi li dan bann marmit, ouswa ti fer li vinn bann dipin ron, ek li ti ena gou enn gato dou ki’nn kwi dan delwil.
9 Aswar kan laroze ti desann lor kan, lamann osi ti desann lor la.
10 Moiz ti tann lepep plore, fami apre fami, sak zom kot lantre so latant. Ek Zeova ti bien ankoler, ek Moiz osi pa ti kontan ditou.
11 Lerla Moiz ti dir Zeova: “Kifer to’nn fer to serviter soufer? Ki mo’nn fer pou ki mo pa gagn to faver ek ki to’nn donn mwa sa pep-la ki koumadir enn fardo?
12 Eski mo mama sa pep-la mwa? Eski mo’nn donn zot nesans pou ki to bizin dir mwa, ‘Sarye zot lor to lestoma, parey kouma enn serviter ki sarye enn ti-baba,’ ziska dan pei ki to’nn promet pou donn zot bann anset?
13 Kotsa mo pou gagn laviann pou donn tou sa dimounn-la? Parski zot pe res plore devan mwa ek dir, ‘Donn nou laviann pou manze!’
14 Mo pa pe kapav okip tou sa dimounn-la mo tousel; li tro boukou pou mwa.
15 Si se koumsa ki to pou tret mwa, silteple, touy mwa aster-la mem. Si mo’nn gagn to faver, pa fer mwa konn bann lezot maler.”
16 Zeova ti reponn Moiz: “Rasanble 70 zom parmi bann ansien dan Izrael, bann zom ki to konsider kouma* bann ansien ek bann ki ena lotorite parmi lepep. Ek amenn zot kot latant renion ek fer zot debout la avek twa.
17 Mo pou desann ek mo pou koz avek twa laba, ek mo pou pran inpe lespri sin ki lor twa ek met sa lor zot, ek zot pou ed twa pou okip sa pep ki koumadir enn fardo la, pou ki to pa bizin okip zot to tousel.
18 To bizin dir lepep, ‘Sanktifie zot pou demin, parski vremem zot pou manz laviann, parski zot inn plore devan Zeova ek zot inn dir: “Kisann-la pou donn nou laviann pou manze? Nou ti pli dan bien dan Lezip.” Vremem Zeova pou donn zot laviann ek zot pou manze.
19 Zot pa pou manz sa zis enn zour, ni 2 zour, ni 5 zour, ni 10 zour, ni 20 zour,
20 me pandan enn mwa an-antie, ziska ki li sorti par zot nene ek ki li vinn enn kitsoz degoutan pou zot, parski zot inn rezet Zeova ki parmi zot, ek zot inn plore devan li ek dir: “Kifer nou’nn kit Lezip?”’”
21 Lerla Moiz ti dir: “Dan lepep ki ena avek mwa, ena 600,000 zom,* ek twa to pe dir, ‘Mo pou donn zot laviann, ek ki pou ena ase pou ki zot manz sa pandan enn mwa an-antie’!
22 Si ti touy tou toro ek vas, ek tou kabri ek mouton, eski sa ti pou ase pou zot? Ouswa si ti atrap tou pwason ki ena dan lamer, eski sa ti pou ase pou zot?”
23 Lerla, Zeova ti dir Moiz: “Eski lame Zeova tro kourt? Aster to pou trouve si seki mo dir pou ariv twa ouswa non.”
24 Alor Moiz ti sorti ek ti dir lepep bann parol Zeova. Ek li ti rasanble 70 zom parmi bann ansien ki dan lepep, ek ti fer zot debout otour latant.
25 Lerla Zeova ti desann dan enn niaz ek ti koz avek li, ek ti pran inpe lespri sin ki ti lor li ek ti met sa lor sakenn parmi sa 70 ansien-la. Ek deswit kouma lespri sin ti vinn lor zot, zot ti koumans azir kouma bann profet, me selman zot pa ti refer sa ankor.
26 Ti ena de parmi sa bann zom-la ki ti ankor dan kan. Zot nom ti Eldad ek Medad. Ek lespri sin ti koumans vinn lor zot, parski zot nom ti form parti bann ansien ki ti anrezistre, me zot pa ti’nn sorti pou al kot latant. Alor, zot ti koumans azir kouma bann profet* dan kan.
27 Ek enn zenom ti galoupe ek ti al rakont Moiz: “Eldad ek Medad pe azir kouma bann profet dan kan!”
28 Lerla Zozwe, garson Noun, ki ti serviter Moiz depi so zenes, ti reponn: “Moiz, mo segner, anpes zot!”
29 Me Moiz ti dir li: “Eski to zalou pou mwa? Mo ti pou kontan ki tou bann dimounn parmi pep Zeova vinn bann profet, ek ki Zeova met so lespri sin lor zot!”
30 Plitar, Moiz ti retourn dan kan ansam avek bann ansien Izrael.
31 Lerla enn divan ki sorti kot Zeova ti soufle ek ti koumans amenn bann kay depi lamer ek ti fer zot tom otour kan. Zot ti anviron enn zour lamars enn kote ek enn zour lamars lot kote, toutotour kan-la, ek zot ti kouver later lor anviron de koude* oter.
32 Alor toutlong lazourne sa zour-la, ek toutlong lanwit, ek landemin net, lepep pa ti dormi ek ti ramas bann kay. Personn pa ti ramas mwins ki dis homer,* ek zot ti tal zot bann kay toutotour kan.
33 Me alor ki laviann-la ti ankor dan zot labous, avan ki zot ti kapav kraz li, Zeova ti montre so gran koler kont lepep, ek Zeova ti koumans detrir lepep ek boukou ti mor.
34 Alor, zot ti apel sa plas-la, Kibrot-Ataava,* parski laba zot ti anter bann dimounn ki ti ena enn dezir egois.
35 Lepep ti kit Kibrot-Ataava pou al Azerot, ek zot ti res Azerot.
Not
^ Vedir “Brile,” setadir, enn gro dife.
^ Kitfwa bann dimounn parmi zot ki pa ti Izraelit.
^ An Franse, bdellium. Enn larezinn ki santi bon, ki sorti dan bann pie.
^ Ouswa “ki to kone zot.”
^ Lit., “600,000 apie,” setadir bann zom ki kapav lager.
^ Ouswa “ti koumans anons bann profesi.”
^ Enn koude egal 44.5 cm (17.5 in.). Get Bann Detay B14.
^ Enn homer egal 220 L. Get Bann Detay B14.
^ Vedir “Tom Bann Dezir Egois.”