Nonb 18:1-32
18 Lerla Zeova ti dir Aaron: “Twa, to bann garson, ek to desandans, pou bizin pey konsekans pou ninport ki erer ki fer kont plas ki sin, ek twa ek to bann garson pou bizin pey konsekans pou ninport ki erer ki fer kont zot servis antan-ki pret.
2 Ek osi, fer to bann frer ki dan tribi Levi, tribi to bann anset, vini pou ki zot zwenn twa ek servi twa ek to bann garson devan latant kot ena Temwaniaz.
3 Zot bizin asim zot responsabilite anver twa ek anver latant an-antie. Selman, fode pa zot vinn pre ar bann istansil ki pou plas ki sin ek fode pa zot vinn pre ar lotel, pou ki ni zot ni bann-la pa mor.
4 Bann-la pou zwenn twa ek pou asim zot bann responsabilite konsernan latant renion ek tou bann servis ki konsern latant-la, ek fode pa ki enn dimounn ki pa otorize* vinn pre ar zot.
5 Zot bizin asim zot responsabilite anver plas ki sin ek anver lotel, pou ki mo pa ankoler kont pep Izrael ankor.
6 Momem mo’nn pran zot bann frer, bann Levit, parmi bann Izraelit kouma enn kado pou zot. Finn donn bann-la kouma enn kado pou Zeova pou zot okip servis latant renion.
7 Se twa ek to bann garson ki responsab pou zot travay antan-ki pret konsernan lotel ek seki ena deryer rido, ek zot pou bizin fer sa servis-la. Mo finn donn sa servis antan-ki pret la kouma enn kado pou zot, ek pou bizin touy tou dimounn ki pa otorize* ki vinn pre ar plas ki sin.”
8 Zeova ti dir Aaron: “Momem mo donn twa responsabilite pou okip bann kontribision ki fer pou mwa. Mo finn donn twa ek to bann garson enn par dan tou bann kitsoz ki sin ki bann Izraelit inn kontribie. Sa li enn par permanan pou zot.
9 Parmi bann sakrifis ki bien sin ek ki ofer par dife, ala seki pou vinn pou twa: sak sakrifis ki bann-la fer, setadir zot bann ofrand sereal ek zot bann sakrifis pou pese ek zot bann sakrifis reparasion ki zot amene pou mwa. Se enn kitsoz ki bien sin pou twa ek to bann garson.
10 To pou bizin manz sa dan enn plas ki bien sin. Tou bann zom pou kapav manz sa. Sa pou enn kitsoz sin pou twa.
11 Sa osi pou vinn pou zot: bann kado ki bann Izraelit amene kouma enn kontribision ansam avek tou zot bann ofrand balanse.* Tousala, mo’nn donn twa, to bann garson ek to bann tifi kouma enn par permanan. Tou dimounn ki pir dan to lakaz kapav manz sa.
12 “Tou seki pli bon dan delwil ek tou seki pli bon dan nouvo divin ek dan bann lagrin, setadir bann premie frwi ki bann Izraelit donn Zeova, mo donn twa tousala.
13 Tou bann premie frwi mir ki zot pou amenn pou Zeova ek ki sorti dan zot pei, pou vinn pou twa. Tou dimounn ki pir dan to lakaz kapav manz sa.
14 “Tou kitsoz ki’nn rezerve pou Bondie* dan Izrael pou vinn pou twa.
15 “Tou bann premie-ne parmi tou bann kreatir vivan ki zot pou prezant devan Zeova, ki li enn zom ouswa enn zanimo, pou vinn pou twa. Me selman, to pou bizin fer sir ki to reaste bann premie-ne parmi bann imin ek to pou bizin osi reaste bann premie-ne parmi bann zanimo ki inpir.
16 Kan li pou ena enn mwa ouswa plis, to bizin pey pri ki bizin peye pou reaste li, dapre valer ki’nn fixe, setadir sink sik* larzan, dapre sik ki servi dan landrwa ki sin.* Enn sik egal 20 gera.*
17 Me enn toro premie-ne ouswa enn agno premie-ne ouswa enn kabri premie-ne, fode pa ki to reaste zot. Zot sin. To bizin fann zot disan lor lotel, ek fer zot lagres fer lafime kouma enn sakrifis ki ofer par dife. Se enn parfin ki fer Zeova plezir.*
18 Ek zot laser pou vinn pou twa. Parey kouma pwatrinn dan ofrand balanse ek parey kouma lapat drwat la, li pou vinn pou twa.
19 Tou bann kontribision sin ki bann Izraelit fer pou Zeova, tousala mo’nn donn twa, to bann garson ek to bann tifi kouma enn par permanan. Se enn lalians disel* ki permanan devan Zeova, pou twa ek to desandans.”
20 Zeova ti kontign dir Aaron: “To pa pou gagn enn leritaz dan zot pei, ek to pa pou gagn okenn bout terin parmi zot. Momem to par ek to leritaz parmi bann Izraelit.
21 “Me konsernan bann garson Levi, mo’nn donn zot enn diziem tou seki later prodir dan Izrael kouma enn leritaz pou servis ki zot pe fer, pou servis latant renion.
22 Bann Izraelit pou nepli kapav vinn pre ar latant renion, parski si zot fer sa, zot pou fer pese ek mor.
23 Se bann Levit zotmem ki bizin okip servis pou latant renion ek se zot ki pou pey bann konsekans pou erer lepep. Se enn lord permanan pou zot, zenerasion apre zenerasion: zot pa pou gagn okenn leritaz parmi bann Izraelit.
24 Parski mo’nn donn bann Levit enn diziem dan seki bann Izraelit inn kontribie pou Zeova kouma enn leritaz. Ala kifer mo’nn dir zot, ‘Zot pa pou gagn okenn leritaz parmi bann Izraelit.’”
25 Lerla Zeova ti dir Moiz:
26 “To bizin dir bann Levit, ‘Sa diziem par ki mo’nn pran ar bann Izraelit pou donn zot la, sa pou vinn zot leritaz, ek dan sa diziem-la zot bizin kontribie enn diziem ladan kouma enn kontribision pou Zeova.
27 Ek pou konsider sa kouma zot kontribision, koumadir sa ti bann lagrin ki sorti dan plas kot bat dible ouswa divin ouswa delwil ki gagne an-abondans dan bann preswar.
28 Koumsa, zot osi zot pou donn Zeova enn kontribision ki sorti dan tou sa bann diziem par ki zot pou gagne ar bann Izraelit la; dan sa bann diziem-la zot bizin donn pret Aaron enn kontribision pou Zeova.
29 Dan tou bann meyer kado ki zot gagne kouma enn kitsoz ki sin, zot pou fer tou kalite kontribision pou Zeova.’
30 “Ek to bizin dir zot, ‘Kan zot donn seki pli bon dan seki zot gagne kouma bann kontribision, lerla leres pou vinn pou zot, bann Levit, koumadir sa ti bann lagrin ki sorti dan plas kot bat dible ek divin ouswa delwil ki gagne dan bann preswar.
31 Zot ek bann ki dan zot lakaz pou kapav manz sa dan ninport ki plas, parski se zot lapey an retour pou servis ki zot fer kot latant renion.
32 Zot pa pou fer pese tanki zot donn seki pli bon dan sa bann kitsoz-la kouma enn kontribision, ek fode pa zot dezonor bann kitsoz ki sin ki bann Izraelit done, sinon zot pou mor.’”
Not
^ Lit., “enn etranze,” setadir, enn zom ki pa dan fami Aaron.
^ Lit., “tou etranze,” setadir, enn zom ki pa dan fami Aaron.
^ Get Lexplikasion Bann Mo.
^ Setadir, tou seki’nn vinn sakre pou Bondie kan inn rezerv sa zis pou li, san ki kapav revinn lor la ek san ki kapav reaste sa.
^ Enn sik egal 11.4 g. Get Bann Detay B14.
^ Ouswa “dapre sik ki sin.”
^ Enn gera egal 0.57 g. Get Bann Detay B14.
^ Ouswa “ki kalme Zeova.”
^ Setadir, enn lalians permanan ek ki pa kapav sanze.
