Nonb 36:1-13
-
Lalwa lor maryaz pou bann tifi ki gagn enn leritaz (1-13)
36 Bann sef fami bann desandan Galaad, ki garson Makir, ki garson Manase, ki sorti dan bann fami bann garson Zozef, ti vinn koz ar Moiz ek bann sef, bann sef fami bann Izraelit.
2 Zot ti dir: “Zeova ti donn mo segner lord pou fer enn tirazosor pou partaz pei-la kouma enn leritaz pou bann Izraelit; ek Zeova ti donn lord mo segner pou donn leritaz nou frer Zelofead so bann tifi.
3 Si zot marye ar bann zom dan enn lot tribi Izrael, leritaz sa bann madam-la pou nepli form parti dan leritaz nou bann anset ek pou azout leritaz-la dan leritaz sa tribi dan ki zot pou ale la, ek lerla sa leritaz-la pou nepli form parti dan nou leritaz.
4 Kan pou ena Lane Liberasion* pou pep Izrael, pou osi azout leritaz sa bann madam-la dan leritaz sa tribi dan ki zot pou ale la, ek alor zot leritaz pou nepli form parti dan leritaz tribi nou bann anset.”
5 Lerla Moiz ti donn sa lord-la bann Izraelit, parey kouma Zeova ti dir: “Seki tribi bann garson Zozef pe dir li vre.
6 Ala lord ki Zeova inn done konsernan bann tifi Zelofead: ‘Zot kapav marye ar ninport kisann-la zot anvi. Selman, zot bizin marye avek enn kikenn ki sorti dan fami tribi zot papa.
7 Fode pa ki leritaz bann Izraelit sorti dan enn tribi pou al dan enn lot, parski bann Izraelit bizin gard leritaz ki pou tribi zot bann anset.
8 Ek tou bann tifi ki ena enn leritaz parmi bann tribi Izrael bizin marye avek enn desandan ki sorti dan tribi so papa, pou ki bann Izraelit kapav gard leritaz zot bann anset.
9 Fode pa ki enn leritaz sorti dan enn tribi pou al dan enn lot tribi, parski bann tribi Izrael bizin gard zot prop leritaz.’”
10 Bann tifi Zelofead ti fer parey kouma Zeova ti’nn donn Moiz lord.
11 Alor, Mala, Tirza, Ogla, Milka, ek Noah, bann tifi Zelofead, ti marye ar bann garson bann frer zot papa.
12 Zot ti marye ar bann zom ki sorti dan bann fami Manase, garson Zozef, pou ki zot leritaz res dan tribi fami zot papa.
13 Sa se bann komannman ek bann desizion legal ki Zeova ti donn bann Izraelit atraver Moiz dan bann laplenn Moab ki ti kouma bann dezer, pre ar Zourdin, anfas ar Zeriko.
Not
^ Ouswa “Zibile.”
