Let pou Bann Romin 13:1-14
13 Tou dimounn* bizin soumet ar bann lotorite* ki diriz nou, parski okenn lotorite pa kapav existe san ki Bondie permet li; se Bondie ki’nn plas sa bann lotorite ki existe la dan zot diferan pozision.
2 Alor, enn kikenn ki opoz li ar lotorite, li al kont dispozision Bondie; bann ki al kont sa dispozision-la pou amenn zizman lor zotmem.
3 Se pa bann ki fer seki bon ki bizin per bann dirizan, me bann ki fer seki pa bon. Si to pa’le per lotorite, kontign fer seki bon, ek to pou gagn louanz ar zot;
4 parski zot enn serviter Bondie pou to prop bien. Me si to pe fer seki pa bon, to bizin per, parski se pa pou nanye ki zot ena lepe. Zot enn serviter Bondie pou pini* dimounn ki pe fer seki pa bon.
5 Alor zot ena enn bon rezon pou soumet, pa zis akoz bann-la zot koler, me osi pou gard enn bon konsians.
6 Ala kifer zot pe pey tax osi; parski bann-la zot bann serviter piblik pou Bondie ki pe kontign ranpli zot devwar.
7 Rann sakenn seki zot bizin gagne: seki demann tax, donn li tou sort kalite tax; seki demann respe, donn li respe; seki demann loner, donn li loner.
8 Pa dwa personn nanye apart pou kontan sakenn zot kamarad; parski kikenn ki kontan so prosin inn akonpli lalwa.
9 Parski Lalwa ki dir: “Fode pa to komet ladilter, fode pa to fer krim, fode pa to kokin, fode pa to anvie bann kitsoz ki pou lezot,” ek tou lezot komannman ki ena kapav rezim zot dan sa komannman-la: “To bizin kontan to prosin kouma tomem.”
10 Lamour pa fer ditor so prosin; alor, lamour akonpli lalwa.
11 Ek zot bizin fer sa parski zot kone dan ki lepok nou pe viv, setadir, ki’nn fini ariv ler pou zot leve ek aret dormi, parski aster-la nou delivrans li pli pre ki letan nou ti vinn krwayan.
12 Lanwit pe al fini; lizour pe koste. Alor anou aret fer bann kitsoz ki pou nwarte ek anou met bann zarm lalimier lor nou.
13 Anou konport nou bien* parey kouma bann dimounn ki pe fer bann kitsoz anplin lizour. Fode pa nou fer bann fet kot pena okenn kontrol ek bwar ziska sou, fode pa nou ena bann relasion sexiel imoral ek enn kondwit devergonde,* fode pa nou lager* ek zalou.
14 Me met bann kalite Lesegner Zezi Kris lor zot, ek pa fer bann plan an-avans pou satisfer bann move dezir zot lekor.
Not
^ Grek, psy·khe’.
^ Ouswa “gouvernman.”
^ Lit., “enn kikenn ki tir vanzans pou montre koler kont.”
^ Ouswa “Anou mars dan enn bon fason.”
^ Ouswa “kondwit san okenn laont.” Grek, a·sel′gei·a. Get Lexplikasion Bann Mo.
^ Isi “lager” pa pe rod dir lager fizikman, me an parol.
