Let pou Tit 2:1-15
2 Me twa, kontign dir bann kitsoz ki an-akor avek bon lansegnman.*
2 Bann zom aze bizin ekilibre dan zot bann labitid, serye, ena bon zizman, for dan lafwa, dan lamour, ek dan landirans.
3 Parey, bann fam aze bizin ena enn konportman ki montre ki zot respekte Bondie, fode pa zot koz manti pou gat repitasion lezot, fode pa zot esklav boukou divin, me zot bizin bann dimounn ki ansegn seki bon,
4 pou ki zot kapav konsey bann zenn fam* pou kontan zot mari, pou kontan zot zanfan,
5 pou ena bon zizman, pou ena pirte, pou travay dan zot lakaz,* pou fer seki bon, pou soumet ar zot prop mari, pou ki pa koz an mal lor parol Bondie.
6 Parey, kontign ankouraz bann zenom pou ena bon zizman,
7 montre ki tomem to enn lexanp konsernan bann bon aksion dan tou kitsoz. Ansegn bann kitsoz ki vre* avek boukou serye,
8 avek bann bon parol* ki personn pa kapav kritike, pou ki bann ki opoze kapav gagn onte, parski zot pa pou ena nanye negatif* pou dir lor nou.
9 Bann esklav bizin soumet ar zot met dan tou kitsoz, esey fer zot met plezir, pa fronte,
10 pa kokin zot met, me montre ki kapav fer zot konfians dan tou kitsoz, pou ki dan tou domenn zot kapav fer lansegnman nou Sover, setadir Bondie, vinn pli zoli.
11 Parski Bondie inn montre so bonte extraordiner,* ek sa amenn delivrans pou tou sort kalite dimounn.
12 Li form nou pou rezet enn kondwit ki pena respe pou Bondie ek bann dezir sa lemond-la, ek pou viv avek bon sans ek lazistis ek latasman pou Bondie dan sa lemond-la,*
13 pandan ki nou pe atann sa lesperans ki donn nou lazwa la ek pandan ki nou pe atann ki nou gran Bondie ek nou Sover, Zezi Kris, aparet dan laglwar.
14 Kris limem inn donn so lavi pou nou, pou liber nou* ar tou sort kalite move kitsoz* ek pou pirifie pou limem enn pep ki so prop dibien spesial ek ki bien devwe pou bann bon aksion.
15 Kontign dir sa bann kitsoz-la, donn konsey* ek korize avek tou lotorite ki to’nn gagne. Pa les personn mepriz twa.
Not
^ Ouswa “avek lansegnman ki fer dibien; avek lansegnman ki amenn bann bienfe.”
^ Ouswa “fer bann zenn fam regagn zot bon sans; form bann zenn fam.”
^ Ouswa “pou okip zot lakaz.”
^ Ouswa kitfwa, “Ansegn avek pirte.”
^ Ouswa “bann parol ki fer dibien; bann parol ki amenn bann bienfe.”
^ Ouswa “okenn move kitsoz.”
^ Ouswa “faver ki pa merite.” Get Lexplikasion Bann Mo.
^ Ouswa “sa lepok-la.” Get Lexplikasion Bann Mo.
^ Lit., “pou liber nou par ranson; pou reaste nou.”
^ Ouswa “kitsoz ki kont lalwa.”
^ Ouswa “ankouraze.”
