Zenez 25:1-34
25 Abraam ti marye avek enn lot madam, ek li ti apel Ketoura.
2 Ketoura ti gagn sa bann zanfan-la avek Abraam: Zimrann, Zokshann, Medann, Madian, Ishbak, ek Souah.
3 Zokshann ti vinn papa Sheba ek Dedann.
Dedann so bann garson ti Asourim, Letousim, ek Leoumim.
4 Bann garson Madian ti Efa, Efer, Anok, Abida, ek Elda.
Tousala ti bann desandan Ketoura.
5 Plitar Abraam ti donn Izaak tou seki li ena,
6 me Abraam ti donn so bann garson ki li ti gagne avek so bann konkibinn bann kado. Ek kan li ti ankor vivan, li ti avoy zot dan bann pei ki trouv dan kote Les pou ki zot res lwin ar so garson Izaak.
7 Abraam ti viv 175 an.
8 Lerla Abraam ti rann so dernie souf ek li ti mor apre ki li’nn bien viv. Li ti vie ek satisfe ar so lavi, ek li ti al repoze avek so bann anset.*
9 So bann garson Izaak ek Ishmael ti anter li dan kavern Makpela, ki dan terin Efronn, ki trouv devan Mamre. Efronn ti garson Zoar, enn Itit.
10 Abraam ti aste sa terin-la ar bann garson Et. Se laba mem ki ti anter Abraam kot so madam Sara ti ete.
11 Apre lamor Abraam, Bondie ti kontign beni so garson Izaak, ek Izaak ti pe res pre ar Beer-Lahay-Roy.
12 Sa se zistwar Ishmael, garson Abraam, ki Agar sa Ezipsienn-la ti donn Abraam. Agar ti servant Sara.
13 Ala nom bann garson Ishmael ek nom bann fami ki’nn gagne apartir zot: Ishmael so premie-ne ti Nebayot, apre li Kedar, Adbeel, Mibsam,
14 Mishma, Douma, Masa,
15 Adad, Tema, Zetour, Nafish, ek Kedema.
16 Ala bann garson Ishmael, ek zot bann nom dapre zot bann vilaz ek dapre bann plas kot zot ti pe reste dan bann latant,* 12 sef dapre zot klan.
17 Ek Ishmael ti viv 137 an. Apre sa li ti rann so dernie souf ek li ti mor ek li ti al repoze avek so bann anset.*
18 Ek zot ti koumans res depi Avila ziska Lasiri. Avila ti akote Sour, ek Sour ti pre ar Lezip. Zot ti viv pre ar tou zot bann frer.*
19 Sa se zistwar Izaak, garson Abraam.
Abraam ti vinn papa Izaak.
20 Izaak ti ena 40 an kan li ti marye avek Rebeka, tifi Betouel enn Arameen ki res dan Padann-Aram. Rebeka ti ser Labann, enn Arameen.
21 Ek Izaak ti pe kontign sipliy Zeova pou so madam, parski so madam pa ti pe gagn zanfan; alor Zeova ti ekout so siplikasion ek so madam Rebeka ti tom ansint.
22 Ek so bann garson dan so vant ti koumans lager ant zot, alor li ti dir: “Si sa koumsa, kifer mo bizin kontign viv?” Lerla li ti priye Zeova pou li kone kifer sa ti koumsa.
23 Ek Zeova ti dir li: “Ena de nasion dan to vant, ek de diferan pep pou sorti dan to vant, ek enn nasion pou pli for ki lot nasion-la, ek seki pli gran la pou servi seki pli tipti la.”
24 Kan ti ariv ler pou Rebeka gagn zanfan, gete! ti ena bann zimo dan so vant.
25 Kan premie zanfan-la ti sorti li ti rouz net ek li ti ena boukou pwal lor so lekor, alor zot ti apel li Ezai.*
26 Apre sa so frer ti sorti ek li ti pe atrap talon Ezai, alor ti apel li Zakob.* Izaak ti ena 60 an kan Rebeka ti gagn zot.
27 Kan bann garson-la ti grandi, Ezai ti vinn enn bon saser, enn zom ki ti kontan pas so letan dan bwa, me Zakob ti enn zom san repros ki ti pe res dan bann latant.
28 Ek Izaak ti kontan Ezai parski li ti kontan laviann ki Ezai ti pe amene, me Rebeka ti kontan Zakob.
29 Enn zour Zakob ti pe kwi enn lasoup lanti kan Ezai ti sorti lasas dan bwa ek Ezai ti bien fatige.
30 Alor Ezai ti dir Zakob: “Degaze, silteple, donn mwa enn tipe* sa lasoup rouz ki to pe prepare la, parski mo bien fatige!”* Akoz sa ti apel li Edom.*
31 Lerla Zakob ti dir: “Avan, vann mwa to drwa premie-ne!”
32 Ek Ezai ti dir: “Mo pe al mor mem la! Ki sa pou servi mwa sa drwa premie-ne la?”
33 Lerla Zakob ti dir: “Fer mwa serman avan!” Alor li ti fer li serman ek li ti vann so drwa premie-ne ar Zakob.
34 Lerla Zakob ti donn Ezai dipin ek lasoup lanti, ek Ezai ti manze ek ti bwar. Apre sa li ti leve ek li ti ale. Se koumsa ki Ezai ti mepriz so drwa premie-ne.
Not
^ Lit., “al rezwenn so pep.” Se enn fason koze poetik pou dekrir lamor.
^ Ouswa “zot bann kan kot ti ena bann miray.”
^ Lit., “al rezwenn so pep.” Se enn fason koze poetik pou dekrir lamor.
^ Ouswa kitfwa, “Zot ti viv ar laenn anver tou zot bann frer.”
^ Vedir “Kouver ar Pwal.”
^ Vedir “Enn Kikenn Ki Atrap Talon; Enn Kikenn Ki Pran Plas enn Lot.”
^ Ouswa “donn mwa enn gorze.”
^ Ouswa “extra fin.”
^ Vedir “Rouz.”
