Zenez 31:1-55
31 Apre sa Zakob ti tann seki bann garson Labann ti pe dir: “Zakob inn pran tou bann dibien nou papa, ek se gras-a dibien nou papa ki li’nn vinn ris.”
2 Kan Zakob ti get figir Labann, li ti remarke ki Labann so latitid ti’nn sanze anver li.
3 Finalman Zeova ti dir Zakob: “Retourn dan pei to bann anset ek to bann fami, ek mo pou kontign res avek twa.”
4 Lerla Zakob ti fer apel Rasel ek Lea pou ki zot vinn lor laplenn kot so troupo,
5 ek li ti dir zot:
“Mo’nn trouve ki latitid zot papa inn sanze anver mwa, me Bondie mo papa ti touletan avek mwa.
6 Zot bien kone ki mo’nn travay pou zot papa avek tou mo lafors.
7 Ek zot papa inn rod fer malonet ar mwa ek li’nn sanz mo lapey dis fwa; me Bondie pa’nn permet li fer mwa ditor.
8 Si li ti dir, ‘Se bann zanimo ki ena bann ti tas ki pou vinn to lapey,’ lerla troupo-la an-antie ti gagn bann tipti ki ti ena bann ti tas; me si li ti dir, ‘Se bann zanimo ki are ki pou vinn to lapey,’ lerla troupo-la an-antie ti gagn bann tipti ki ti are.
9 Alor Bondie ti pe pran troupo zot papa ti pe donn mwa.
10 Enn zour kan troupo-la ti an-saler, mo ti trouve dan enn vizion ki bann kabri mal ki ti pe krwaze avek troupo-la ti are, ti ena bann ti tas ek bann tas ron lor zot.
11 Lerla anz vre Bondie ti dir mwa dan sa vizion-la, ‘Zakob!’ Lerla mo ti reponn, ‘Mo la.’
12 Ek li ti dir, ‘Silteple, gete ek to pou trouve ki tou bann kabri mal ki pe krwaze avek troupo-la zot are, zot ena bann ti tas ek bann tas ron lor zot, parski mo’nn trouv tou seki Labann pe fer twa.
13 Mo sa vre Bondie ki ti aparet ar twa dan Betel la, kot to ti vers delwil lor enn kolonn ek kot to ti fer mwa enn promes. Aster-la leve, kit sa pei-la ek retourn dan pei kot to’nn ne.’”
14 Lerla Rasel ek Lea ti reponn li: “Eski nou pou erit enn par dan lakaz nou papa?
15 Eski li pa konsider nou kouma bann etranze parski li’nn vann nou ek li’nn servi kas ki’nn done pou nou?
16 Tou bann rises ki Bondie inn pran ar nou papa li pou nou ek pou nou bann zanfan. Alor fer tou seki Bondie inn dir twa fer.”
17 Lerla Zakob ti leve ek li ti met so bann zanfan ek so bann madam lor bann samo,
18 ek li ti pran tou so troupo, troupo ki li ti gagne dan Padann-Aram ek tou bann dibien ki li ti’nn gagne, pou al kot so papa Izaak dan pei Kanaan.
19 Pandan ki Labann ti al tir lalenn lor so bann mouton, Rasel ti kokin bann stati terafim* ki ti pou so papa.
20 Anplis, Zakob ti anbet Labann, sa Arameen-la parski li pa ti dir Labann ki li ti pe sove.
21 Li ti sove ek travers Larivier,* li ek tou seki li ti ena. Apre sa, li ti al dan rezion kot ena bann montagn dan Galaad.
22 Lor trwaziem zour, ti dir Labann ki Zakob ti’nn sove.
23 Alor li ti pran so bann frer* avek li ek zot ti pourswiv Zakob pandan set zour ek zot ti ratrap li dan rezion kot ena bann montagn dan Galaad.
24 Lerla Bondie ti aparet ar Labann, sa Arameen-la dan enn rev aswar ek li ti dir: “Fer atansion seki to dir Zakob, ki li enn bon kitsoz ou enn move kitsoz.”
25 Zakob ti’nn pik so latant dan montagn ek Labann ti’nn instal so kan avek so bann frer dan rezion kot ena bann montagn dan Galaad.
26 Lerla Labann ti al get Zakob ek ti dir li: “Ki to’nn fer? Kifer to’nn anbet mwa ek to’nn amenn mo bann tifi koumadir bann prizonie lager?
27 Kifer to’nn sove an kasiet, to’nn anbet mwa ek to pa’nn dir mwa nanye? Si to ti’nn dir mwa, mo ti pou les twa ale dan lazwa avek bann sante, avek tanbourin ek avek laarp.
28 Me to pa’nn donn mwa lokazion pou anbras mo bann ti-zanfan* ek mo bann tifi. To’nn azir dan enn fason bet.
29 Mo kapav fer twa ditor, me Bondie to papa inn koz ar mwa yer swar, ek li’nn dir, ‘Fer atansion seki to dir Zakob, ki li enn bon kitsoz ouswa enn move kitsoz.’
30 To’nn ale parski to ti pe bien anvi retourn dan lakaz to papa, me kifer to’nn kokin mo bann bondie?”
31 Me Zakob ti reponn Labann: “Se parski mo ti per ek mo ti dir momem, ‘To ti kapav pran to bann tifi parfors.’
32 Si to trouv to bann bondie kot enn dimounn, sa dimounn-la pou bizin mor. Devan nou bann frer, gete seki mo ena ek pran seki pou twa.” Zakob pa ti kone ki se Rasel ki’nn kokin sa bann bondie-la.
33 Lerla Labann ti al dan latant Zakob, dan latant Lea, ek dan latant sa de servant-la, me li pa ti trouv nanye. Lerla kan li ti sorti dan latant Lea li ti al dan latant Rasel.
34 Pandan sa letan-la, Rasel ti’nn pran bann stati terafim la ek ti’nn met zot dan panie ki ti ena pou bann madam lor bann samo, ek li ti pe asiz lor la. Alor Labann ti rod partou dan latant-la, me li pa ti trouv nanye.
35 Lerla Rasel ti dir so papa: “Mo segner pa ankoler ki mo pa pe kapav debout devan twa, parski mo’nn gagn seki bann fam abitie gagne.” Alor li ti kontign rod partou me li pa ti trouv bann stati terafim la.
36 Lerla Zakob ti ankoler ek li ti koumans fer Labann bann repros. Li ti dir Labann: “Ki mo’nn fer twa ek ki pese mo’nn fer pou ki to pourswiv mwa sa kalite-la?
37 Aster ki to’nn fini rod dan tou mo bann zafer, eski to’nn trouv kitsoz ki pou twa? Met li la devan mo bann frer ek to bann frer, ek les zot deside ant nou de.
38 Pandan sa 20 an ki mo ti avek twa la, zame to bann mouton ek to bann kabri pa’nn perdi bann tipti ki ti dan zot vant, ek zame mo pa’nn manz bann mouton mal ki ti dan to troupo.
39 Kan enn zanimo sovaz ti atak enn parmi to bann zanimo, mo pa ti amenn zanimo-la kot twa. Momem ki ti pou ranbours twa. Kan enn kikenn ti kokin enn zanimo, ki li aswar ouswa ki li dan lazourne, to ti pou demann mwa pou ranbours twa.
40 Lazourne mo ti pe mor ar saler, ek aswar mo ti pe mor ar freser, ek mo pa ti pe reisi dormi.
41 Sa fer 20 an ki mo kot twa. Mo’nn travay 14 an pou gagn to de tifi ek 6 an pou to troupo, ek to’nn sanz mo lapey dis fwa.
42 Si Bondie mo papa, Bondie Abraam ek sa Kikenn pou ki Izaak ena enn gran respe la pa ti dan mo kote, to ti pou fer mwa ale lame-vid. Bondie inn trouv mo soufrans ek travay dir ki mo’nn fer, se akoz sa ki yer swar li’nn koriz twa.”
43 Lerla Labann ti reponn Zakob: “Sa bann tifi-la se mo bann tifi, ek sa bann zanfan-la se mo bann zanfan ek sa troupo-la se mo troupo, ek tou seki to pe trouve li pou mwa ek li pou mo bann tifi. Eski mo kapav fer kitsoz kont zot ek kont bann garson ki zot inn gagne?
44 Aster-la vini ek anou fer enn lalians ant twa ek mwa, ek sa pou servi kouma enn temwin ant nou.”
45 Alor Zakob ti pran enn ros ek ti dres sa kouma enn kolonn.
46 Apre sa Zakob ti dir so bann frer: “Ramas bann ros!” Ek zot ti ramas bann ros ek zot ti met li an-ta. Apre sa, zot ti manz la lor sa bann ros-la.
47 Ek Labann ti apel sa bann ros-la Zegar-Saadouta,* me Zakob ti apel sa Galed.*
48 Lerla Labann ti dir: “Sa bann ros ki an-ta la li enn temwin ant mwa ek twa zordi.” Akoz sa li ti apel sa Galed,
49 ek Latour Degard,* parski li ti dir: “Ki Zeova kontign vey lor twa ek mwa kan nou lwin ar sakenn nou kamarad.
50 Si to maltret mo bann tifi ek si to koumans pran bann lezot madam anplis ki mo bann tifi, rapel ki mem si personn pa trouve, Bondie li, li pou enn temwin ant twa ek mwa.”
51 Labann ti osi dir Zakob: “Ala sa bann ros ki an-ta la, ek ala kolonn ki mo’nn drese ant twa ek mwa la.
52 Sa bann ros ki an-ta la li enn temwin, ek sa kolonn-la osi li enn temwin ki mo pa pou depas sa bann ros ki an-ta la pou fer twa ditor ek ki to pa pou depas sa bann ros ki an-ta la ek sa kolonn-la pou fer mwa ditor.
53 Ki Bondie Abraam ek Bondie Naor, Bondie zot papa, ziz ant nou.” Ek Zakob ti fer serman lor sa Kikenn pou ki so papa Izaak ena enn gran respe la.
54 Apre sa, Zakob ti fer enn sakrifis dan montagn ek li ti invit so bann frer pou manz dipin. Alor zot ti manze ek zot ti pas lanwit dan montagn.
55 Selman, Labann ti leve boner gramatin, ti anbras so bann ti-zanfan* ek so bann tifi ek ti beni zot. Lerla Labann ti ale ek ti retourn kot li.
Not
^ Ouswa “bann bondie ki ti pou lafami; bann idol.”
^ Setadir, Lefrat.
^ Ouswa “bann fami.”
^ Lit., “bann garson.”
^ Enn expresion arameen ki vedir bann ros an-ta ki servi kouma enn temwin.
^ Enn expresion ebre ki vedir bann ros an-ta ki servi kouma enn temwin.
^ Enn plas dan oter kot kapav veye.
^ Lit., “bann garson.”
