Zenez 34:1-31
34 Dina, tifi Zakob ek Lea, ti abitie al pas letan avek* bann zennfi ki dan sa pei-la.
2 Amor, enn sef Ivit dan sa pei-la, ti ena enn garson ki ti apel Sikem. Kan Sikem ti trouv Dina, li ti trap li ek li ti viol li.
3 Li ti koumans ena enn gran latasman pou Dina, tifi Zakob. Li ti tom amoure ar sa zennfi-la ek li ti dir li bann zoli parol pou gagn so leker.
4 Finalman Sikem ti dir so papa, Amor: “Rod enn fason pou ki sa zennfi-la vinn mo madam.”
5 Kan Zakob ti tann dir ki Sikem ti’nn zet dezoner lor so tifi Dina, so bann garson ti avek so troupo lor laplenn. Alor Zakob pa ti dir nanye ziska ki zot retourne.
6 Plitar Amor, Sikem so papa, ti al koz avek Zakob.
7 Me bann garson Zakob ti tann sa ek deswit zot ti kit laplenn ek ti retourne. Zot ti ofanse ek zot ti bien ankoler parski Sikem ti’nn zet dezoner lor Izrael kan li’nn dormi avek tifi Zakob, ek fode zame fer enn kitsoz koumsa.
8 Amor ti dir zot: “Mo garson Sikem kontan* zot tifi. Silvouple marye li ar mo garson,
9 ek anou fer enn lalians kot nou marye ant nou. Donn nou zot bann tifi ek pran nou bann tifi.
10 Zot kapav res avek nou ek fer seki zot anvi dan pei-la. Reste, fer komers ek viv lamem.”
11 Lerla Sikem ti dir Dina so papa ek so bann frer: “Mo anvi gagn zot faver ek mo pou donn zot tou seki zot demann mwa.
12 Zot kapav demann mwa enn kantite kas* ek boukou kado pou Dina. Mo pre pou donn tou seki zot demann mwa. Zis donn mwa zennfi-la pou ki li vinn mo madam.”
13 Ek bann garson Zakob ti anbet Sikem ek so papa Amor parski Sikem ti’nn zet dezoner lor zot ser Dina.
14 Zot ti dir bann-la: “Nou pa kapav fer enn kitsoz koumsa. Nou pa kapav donn nou ser ar enn zom ki pa’nn fer sirkonsizion. Se enn laont pou nou.
15 Nou pou aksepte lor enn kondision: ki zot vinn parey kouma nou ek ki zot fer sirkonsizion ar tou bann dimounn ki sex maskilin kot zot.
16 Lerla nou pou donn zot nou bann tifi, ek nou pou pran zot bann tifi, ek nou pou res ar zot ek nou pou vinn enn sel pep.
17 Me si zot pa ekout nou ek zot pa fer sirkonsizion, lerla nou pou pran nou tifi nou pou ale.”
18 Amor ek so garson Sikem ti aksepte seki zot ti dir.
19 Zenom-la pa ti tarde pou fer seki bann-la ti demande parski li ti bien kontan tifi Zakob, ek se limem ki ti dimounn pli respektab parmi tou bann ki ti dan lakaz so papa.
20 Lerla Amor ek so garson Sikem ti al kot laport lavil ek ti koz ar bann zom sa lavil-la. Zot ti dir:
21 “Sa bann zom-la anvi viv anpe avek nou. Les zot res lamem, fer komers dan pei-la, parski pei-la ase gran pou ki zot res la. Nou kapav marye ar zot bann tifi, ek nou kapav donn zot nou bann tifi.
22 Selman lor enn sel kondision ki sa bann zom-la pou aksepte res avek nou pou ki nou vinn enn sel pep: ki parey kouma bann-la, tou bann dimounn ki sex maskilin parmi nou fer sirkonsizion.
23 Lerla, eski tou zot bann dibien, zot bann rises, ek tou zot bann troupo pa pou vinn pou nou? Alor anou aksepte ki zot res avek nou.”
24 Tou bann ki ti res dan sa lavil-la ti ekout Amor ek so garson Sikem ek ti fer sirkonsizion ar tou bann dimounn ki ti sex maskilin.
25 Lor trwaziem zour, bann zom-la ti ankor pe soufer. Alor de garson Zakob, Simeon ek Levi, Dina so bann frer, sakenn ti pran zot lepe ek zot ti rant dan lavil san ki lezot doute ki zot ti vinn fer ek zot ti touy tou bann dimounn ki ti sex maskilin.
26 Zot ti touy Amor ek so garson Sikem avek lepe ek apre sa, zot ti pran Dina dan lakaz Sikem ek zot ti ale.
27 Bann lezot garson Zakob ti vini ek ti trouv kadav sa bann zom-la ek ti kokin tou seki ti ena dan lavil parski bann-la ti’nn zet dezoner lor zot ser.
28 Zot ti pran bann-la zot bann mouton, kabri, vas, toro, bourik ek tou seki ti ena dan lavil ek andeor lavil.
29 Zot ti osi pran tou zot bann dibien, tou zot bann ti zanfan ek zot bann madam, ek zot ti kokin tou seki ena dan bann lakaz.
30 Lerla Zakob ti dir Simeon ek Levi: “Zot inn met mwa dan enn gro problem. Aster bann abitan sa pei-la, bann Kananeen ek bann Perizit, pou deteste mwa. Nou pa boukou, ek bann-la pou zwenn ansam pou atak mwa ek pou detrir mwa net, mwa ek mo fami.”
31 Me zot ti dir: “Eski ti bizin tret nou ser kouma enn prostitie?”
Not
^ Ouswa “al get.”
^ Ouswa “ena latasman pou.”
^ Enn pri ki ti peye pou enn zennfi ki ti pe al marye.
