Zenez 48:1-22
48 Apre sa, ti dir Zozef: “Gete, to papa pe vinn feb.” Lerla Zozef ti pran so de garson ar li, Manase ek Efraim.
2 Apre sa ti dir Zakob: “To garson Zozef inn vinn get twa.” Alor Izrael ti pran so kouraz ek ti asiz lor so lili.
3 Ek Zakob ti dir Zozef:
“Bondie Tou-Pwisan ti aparet ar mwa dan Louz dan pei Kanaan ek ti beni mwa.
4 Ek li ti dir mwa, ‘Mo pou fer twa gagn zanfan, mo pou fer twa vinn boukou, ek mo pou fer twa vinn enn gran pep. Mo pou donn to desandans apre twa sa pei-la ek li pou vinn pou zot pou touletan.’
5 Aster-la to de garson ki’nn ne dan Lezip avan ki mo vinn kot twa dan Lezip zot pou mwa. Efraim ek Manase pou vinn pou mwa parey kouma Ribenn ek Simeon zot pou mwa.
6 Me bann zanfan ki to pou gagne apre zot pou vinn pou twa. Pou apel zot par nom sa de frer-la ek zot pou gagn enn par dan bann-la zot leritaz.
7 Kan mo ti sorti Padann pou retourne, mo ti akote Rasel kan li ti mor dan pei Kanaan, alor ki ti ena ankor enn bon distans pou fer avan ki ariv Efrata. Alor mo ti anter li lor semin ki al Efrata, setadir Betleem.”
8 Kan Izrael ti trouv bann garson Zozef, li ti demande: “Kisann-la sa?”
9 Apre sa Zozef ti dir so papa: “Se mo bann garson ki Bondie inn donn mwa isi.” Lerla Zakob ti dir: “Amenn zot la silteple, pou ki mo kapav beni zot.”
10 Izrael so lizie pa ti tro bon parski li ti’nn vinn vie, ek li ti nepli kapav trouve. Alor Zozef ti amenn so bann zanfan pre ar li, ek li ti may zot ek li ti anbras zot.
11 Izrael ti dir Zozef: “Zame mo ti panse ki mo pou retrouv twa enn zour, me gete Bondie inn les mwa trouv osi to desandans.”
12 Lerla Zozef ti tir zot lor zenou Izrael, ek li ti azenou ziska ki so fron tous later.
13 Zozef ti pran zot toule-de, Efraim avek so lame drwat ek ti met li dan gos Izrael, ek Manase avek so lame gos ek ti met li dan drwat Izrael, ek li ti fer zot al pre ar li.
14 Selman, Izrael ti met so lame drwat lor latet Efraim, mem si li ti pli zenn, ek li ti met so lame gos lor latet Manase. Li ti met so lame koumsa par expre, mem si Manase ti premie-ne.
15 Lerla li ti beni Zozef ek ti dir:
“Vre Bondie avek ki mo granper Abraam ek mo papa Izaak ti marse,Vre Bondie ki ti mo berze pandan toutlong mo lavi ziska zordi,
16 Anz ki’nn sap mwa dan tou mo bann difikilte, beni sa bann garson-la.
Ki bann dimounn kontign rapel mo nom, ek nom mo granper Abraam ek nom mo papa Izaak gras-a zot,Ki zot vinn bien boukou lor later.”
17 Kan Zozef ti trouve ki so papa ti kontign gard so lame drwat lor latet Efraim, li pa ti kontan. Alor li ti esey tir lame so papa lor latet Efraim pou met li lor latet Manase.
18 Zozef ti dir so papa: “Li pa bon la pa, parski se li ki premie-ne. Met to lame drwat lor so latet.”
19 Me so papa ti pe refize ek ti dir: “Mo kone mo garson, mo kone. Li osi li pou vinn enn pep, ek li osi li pou vinn gran. Selman, so pli zenn frer pou vinn pli gran ki li, ek so bann desandan pou vinn telman boukou ki zot pou vinn bann nasion.”
20 Alor sa zour-la li ti kontign beni zot ek li ti dir:
“Ki bann Izraelit kontign koz lor twa kan zot donn bann benediksion ek dir,‘Ki Bondie fer twa vinn kouma Efraim ek kouma Manase.’”
Ala kouma li ti kontign met Efraim avan Manase.
21 Lerla Izrael ti dir Zozef: “Gete, mo pre pou mor, me vremem Bondie pou kontign ed zot ek pou fer zot retourn dan pei zot bann anset.
22 Me mwa, mo pe donn twa enn porsion later plis ki to bann frer, enn porsion later ki mo’nn pran ar bann Amorit avek mo lepe ek avek mo lark.”
