Zistwar Bann Zapot 26:1-32
26 Agripa ti dir Pol: “To gagn drwa koze pou defann twa.” Lerla Pol ti lev so lame, ek pou defann limem li ti dir:
2 “Lerwa Agripa, konsernan tou bann kitsoz ki bann Zwif pe akiz mwa, mo kontan ki se devan twa ki mo pe prezant mo defans zordi,
3 sirtou parski to konn bien tou bann koutim ek bann diskision ki ena parmi bann Zwif. Alor, mo sipliy twa pou ekout mwa avek pasians.
4 “Avredir, tou bann Zwif konn bien fason ki mo’nn viv parmi mo pep* ek dan Zerizalem depi mo zenes.
5 Sa bann Zwif-la ti konn mwa depi lontan. Si zot ti anvi, zot ti kapav temwagne ki mo ti enn Farizien ki ti viv dapre lansegnman* pli strikt nou relizion.
6 Me aster-la pe ziz mwa parski mo ena lesperans dan promes ki Bondie inn fer nou bann anset.
7 Samem promes ki nou 12 tribi pe atann pou trouv realize kan zot pe kontign donn Bondie enn servis sakre lanwit-lizour. Se konsernan sa lesperans-la ki bann Zwif pe akiz mwa, Lerwa Agripa.
8 “Kifer zot panse* ki li inposib pou Bondie resisit* bann mor?
9 Mwa personelman, mo ti sir ki mo ti bizin fer tou seki mo kapav pou opoz ar nom Zezi ki sorti Nazaret.
10 Samem ki mo ti fer dan Zerizalem, ek mo ti met boukou bann ki sin* dan prizon, parski bann sef pret ti’nn donn mwa sa lotorite-la. Ek kan ti pe al touy sa bann disip-la, mo ti vot kont zot.
11 Souvan dan tou bann sinagog mo ti pini zot, ek mo ti esey fors zot pou abandonn zot lafwa. Telman mo ti extra ankoler ar zot, ki mo ti mem al persekit zot ziska dan bann lezot lavil.
12 “Mo ti pe al Damas parski bann sef pret ti’nn donn mwa lotorite ek lord pou al fer mem zafer laba.
13 Lerwa Agripa, ver midi letan mo ti lor semin, mo ti trouv enn lalimier ki ti plis briye ki lalimier soley sorti dan lesiel. Li ti ekler otour mwa ek otour bann ki ti pe vwayaz avek mwa.
14 Ek nou tou nou ti tom anba, lerla mo ti tann enn lavwa ki ti dir mwa dan lang ebre: ‘Sol, Sol, kifer to pe persekit mwa? To pe fer tomem dimal kan to pe lit kont mwa.’*
15 Me mo ti dir: ‘Kisann-la to ete Segner?’ Ek Lesegner ti dir: ‘Momem Zezi, sa kikenn ki to pe persekite la.
16 Me lev twa ek deboute. Ala kifer mo’nn aparet ar twa, pou swazir twa kouma enn serviter ek enn temwin ki pou fer konn bann kitsoz ki to’nn trouve ek ki mo pou fer twa trouve an rapor avek mwa.
17 Ek mo pou delivre twa ar sa pep-la ek ar lezot nasion, kot mo pe avoy twa
18 pou ouver zot lizie, pou tir zot dan nwarte ek amenn zot dan lalimier, ek pou tir zot anba lotorite Satan ek amenn zot ar Bondie. Lerla zot pou kapav gagn pardon zot pese ek enn leritaz parmi bann ki’nn sanktifie gras-a zot lafwa dan mwa.’
19 “Akoz sa, Lerwa Agripa, mo’nn azir an-akor avek sa vizion ki’nn sorti dan lesiel la
20 ek mo’nn al anons sa mesaz-la. An premie ar bann dimounn ki res dan Damas, apre sa ar bann dimounn ki res dan Zerizalem, ek partou dan pei Zide, ek osi ar bann dimounn lezot nasion. Mo ti pe anons zot ki zot bizin repanti ek retourn ar Bondie kan zot fer bann aksion ki montre ki zot inn repanti.
21 Ala kifer bann Zwif inn trap mwa dan tanp ek inn esey touy mwa.
22 Selman, parski Bondie finn ed mwa, ziska azordi mo pe kontign rann temwaniaz ar bann ti dimounn ek bann gran dimounn toule-de. Mo pa’nn dir nanye apart seki bann Profet ek Moiz inn dir pou arive—
23 setadir ki Lekris ti pou bizin soufer ek parski limem premie ki ti pou resisite parmi bann mor, li ti pou anons lalimier ar sa pep-la ek ar bann lezot nasion toule-de.”
24 Letan Pol ti pe dir sa bann kitsoz-la pou defann li, Festis ti dir li bien for: “To pe vinn fou, Pol! To gran konesans pe fer twa perdi latet!”
25 Me Pol ti dir: “Mo pa pe vinn fou, Onorab Festis, me mo pe dir bann parol ki vre ek ki ena sans.
26 Avredir, mo santi mwa lib pou koz ar lerwa parski li konn bien tou sa bann kitsoz-la. Mo sir ki pena nanye parmi sa bann kitsoz-la ki lerwa pa’nn remarke, parski pa’nn fer nanye an kasiet.
27 Lerwa Agripa, eski to krwar dan bann Profet? Mo kone ki to krwar.”
28 Me Agripa ti dir Pol: “Dan enn tigit letan ankor to ti pou konvink mwa pou vinn Kretien.”
29 Lerla Pol ti dir: “Ki li dan enn tigit letan ouswa dan boukou letan, mo priye Bondie ki pa zis twa me osi tou bann ki pe tann mwa azordi vinn parey kouma mwa, me san sa bann lasenn-la.”
30 Lerla lerwa ti leve ek osi gouverner, Berenis ek bann zom ki ti pe asize avek zot.
31 Me letan zot ti pe ale, zot ti dir ant zot: “Sa zom-la pa pe fer nanye ki merit lamor ouswa prizon.”
32 Lerla Agripa ti dir Festis: “Ti kapav larg sa zom-la si li pa ti fer apel ar Sezar.”
Not
^ Ouswa “nasion.”
^ Ouswa “sekt.”
^ Lit., “zize.”
^ Lit., “lev.”
^ Get Lexplikasion Bann Mo.
^ Lit., “tap kont enn baton an metal.” Sa fer referans ar enn baton pwint ki servi pou diriz enn zanimo.
