Ki pli joli cadeau ou kapav donne ou zenfant? Ena beaucoup kitsoz ki zot bizin, couma par exemple ou lamour, ou direction, ek ou protection. Mais, pli grand cadeau ou kapav donne ou zenfant c’est enn connaissance lor Jéhovah ek lor bann verité ki trouve dan so Parole, la Bible. (Jean 17:3) Sa connaissance-la kapav aide ou bann zenfant, mem si zot ankor bien tipti, pou augmente zot lamour pou Jéhovah ek servi Li avek tou zot leker.​—Matthieu 21:16.

Beaucoup parent finn remarké ki bann zenfant reagir bien kan faire bann ti leson ek bann ti activité avek zot. A cause sa, nou bien content pou presente zot sa publication-la, Bann Leson Biblik. Chaque leson enseigne enn principe biblik ou-soit enn leson dan enn fason bien simple. Bann zimage ki ena lor chaque page finn preparé surtout pou bann zenfant trois an ou-soit moins. Ou pou trouve aussi bann ti activité ki ou kapav faire avek ou zenfant. Fodé pa ki bann zenfant prend sa brochure-la couma enn zouzou. Bann Leson Biblik inn preparé dan enn fason ki ou kapav lire sa ensam avek ou bann zenfant, coumsa, sa pou permette ki ena enn bon communication entre zot.

Nou sur ki sa publication-la pou enn bon zouti ki pou aide ou enseigne ou bann zenfant la Bible ‘depuis zot ankor bien tipti.’​—2 Timothée 3:14, 15.

Zot bann frere,

College Central bann Témoins de Jéhovah