Zistwar 43

Josué Vinn Sef

MOÏSE anvi rant dan pei Canaan ansam avek bann Izraelit. Alor li demande: ‘Jéhovah, les mwa travers Larivier Jourdain ek get sa bon pei-la.’ Me Jéhovah dir li: ‘Ase! Pa koz sa ankor!’ Eski to kone kifer Jéhovah inn dir sa?

Se akoz seki ti arive kan Moïse ti tap lor ros. Rapel, li ek Aaron zot pa ti onor Jéhovah. Zot pa finn dir lepep ki se Jéhovah ki ti tir delo dan ros. Akoz sa, Jéhovah dir ki Li pa pou les zot rant dan pei Canaan.

Alor, de-trwa mwa apre lamor Aaron, Jéhovah dir Moïse: ‘Pran Josué, ek fer li debout devan pret Éléazar ek devan lepep. Ek devan zot tou, dir zot ki se Josué zot nouvo sef.’ Kouma to trouve dan sa zimaz-la, Moïse pe fer seki Jéhovah inn dir li.

Apre sa, Jéhovah dir Josué: ‘To bizin for, ek pa per. To pou diriz bann Izraelit dan pei Canaan, pei ki mo ti promet pou donn zot, ek mo pou avek twa.’

Plitar, Jéhovah dir Moïse grinp lor pwint Montagn Nebo dan pei Moab. Depi lao Moïse kapav trouv bien lot kote Larivier Jourdain ek zoli pei Canaan. Jéhovah dir: ‘Se sa pei-la ki mo’nn promet pou donn bann zanfan Abraham, Isaac ek Jacob. Mo finn les twa trouv li, me mo pa pou les twa rant dan sa pei-la.’

Moïse mor lao lor Montagn Nebo. Li ti ena 120 an kan li ti mor. Li ti ankor for, ek li ti ankor trouv bien kler. Lepep bien tris ek zot plore parski Moïse inn mor. Me zot kontan ki zot ena Josué kouma zot nouvo sef.

Nombres 27:12-23; Deutéronome 3:23-29; 31:1-8, 14-23; 32:45-52; 34:1-12.