Zistwar 88

Jean Batiz Jésus

GET sa kolonb ki pe desann lor latet sa misie la. Sa misie-la se Jésus. Li ena anviron 30 an asterla. Ek sa misie ki avek li la apel Jean. Nou finn deza aprann kitsoz lor li. Eski to rapel kan Marie ti al kot Élisabeth, so fami, ki ti arive? Sa tibaba ki ti dan vant Élisabeth la ti sote dan lazwa. Sa tibaba ki pa ti ankor ne la se limem Jean. Me ki Jean ek Jésus pe fer asterla?

Jean finn fek plonz Jésus dan Larivier Jourdain. Se koumsa ki enn dimounn batize. Dabor, plonz dimounn-la net dan delo, ek apre, remont li. Se seki Jean ti pe fer, ek akoz samem bann dimounn ti apel li Jean Baptiste. Me kifer Jean inn batiz Jésus?

Jean inn fer sa parski Jésus ti vinn demann li pou batiz li. Jean batiz bann dimounn ki anvi montre ki zot regret bann move kitsoz ki zot inn fer. Me eski Jésus finn deza fer enn move kitsoz ki li bizin regrete? Non, zame Jésus inn fer enn move kitsoz, parski li prop Garson Bondie ki sorti dan lesiel. Alor, li demann Jean pou batiz li pou enn lot rezon. Anou gete ki sa rezon-la sa.

Avan ki Jésus vinn kot Jean, li ti enn sarpantie. Enn sarpantie se enn dimounn ki fer bann kitsoz ar dibwa, kouma bann latab, bann sez ek bann ban. Joseph ti enn sarpantie ek se li ki ti aprann Jésus sa metie-la. Me Jéhovah pa ti avoy so Garson lor later pou vinn enn sarpantie. Li ti ena enn travay spesial pou Jésus, ek ti’nn ariv ler pou ki li koumans sa travay-la. Alor, pou montre ki asterla li’nn vini pou fer volonte so Papa, Jésus demann Jean pou batiz li. Eski sa fer Bondie plezir?

Wi, parski apre ki Jésus sorti dan delo, enn lavwa depi lesiel dir: ‘Limem mo Garson, ki mo bien kontan.’ Li paret osi ki lesiel ouver ek sa kolonb-la vinn lor Jésus. Me pa enn vre kolonb sa. Li koumadir enn kolonb me an realite se lespri sin Bondie.

Asterla, Jésus ena pou pans lor boukou kitsoz, alor li al dan enn plas kot li pou tousel pandan 40 zour. Laba Satan vinn ver li. Trwa fwa Satan esey fer Jésus fer enn kitsoz ki kont bann lalwa Bondie. Me Jésus pa fer nanye.

Apre sa, Jésus retourne ek zwenn de-trwa misie ki vinn so bann premie disip. Sertin parmi zot apel André, Pierre (apel li osi Simon), Philippe ek Nathanaël (apel li osi Barthélemy). Jésus ek sa bann nouvo disip-la al dan distrik Galilée. La zot aret dan lavil Cana, kot Nathanaël inn grandi. Laba, Jésus asiste enn gran maryaz, ek fer so premie mirak. Eski to kone ki li fer? Li fer delo vinn divin.

Matthieu 3:13-17; 4:1-11; 13:55; Marc 6:3; Jean 1:29-51; 2:1-12.