Enn Garson Gagn Somey
Zistwar 111
Enn Garson Gagn Somey
AYO! Ki pe arive la? Eski sa garson ki anba la inn blese boukou? Gete! Enn parmi bann misie ki pe sorti dan sa lakaz la se Paul! Eski to kapav trouv Timothée osi? Eski sa garson-la inn sap depi lafnet inn tonbe?
Wi, samem ki’nn arive. Paul pe fer enn diskour devan bann disip dan Troas. Li kone ki li pa pou retrouv zot pandan enn bon bout letan parski demin li pe pran bato li pe ale. Alor, li kontign koze ziska minwi.
Sa garson-la apel Eutyche. Li ti pe asize kot lafnet ek li’nn gagn somey. Li finn sap lor bor lafnet, lor trwaziem letaz, ek li’nn tonbe! Alor, to kapav trouve kifer bann dimounn pe gagn traka. Kan bann misie lev garson-la, seki zot ti pe per samem arive. Li’nn mor!
Kan Paul trouve ki garson-la inn mor, li alonz lor li ek may li. Apre sa li dir: ‘Pa gagn traka. Li bien!’ Ek vremem li bien! Se enn mirak! Paul inn resisit li! Lafoul bien kontan.
Zot tou remonte ek al manze. Paul kontign koze ziska fer kler. Me to kapav sir ki Eutyche pa regagn somey ankor! Lerla Paul, Timothée ek bann ki pe vwayaz avek zot, pran bato. Eski to kone kotsa zot pe ale?
Paul fek fini so trwaziem vwayaz predikasion, ek li pe retourn kot li. Pandan sa vwayaz-la Paul finn res trwa-z-an zis dan lavil Éphèse. Alor sa vwayaz-la pli long ki so deziem vwayaz.
Apre ki li’nn kit Troas, bato-la aret Milet pou enn ti moman. Kouma Éphèse pa tro lwin, Paul avoy enn mesaz bann ansien dan sa kongregasion-la pou ki zot vinn Milet, koumsa li kapav koz ar zot pou enn dernie fwa. Apre sa, kan inn ariv ler pou ki bato ale, bannla bien tris pou trouv Paul ale!
Alafin bato-la retourn Césarée. Pandan ki Paul pe res kot disip Philippe, profet Agabus donn enn lavertisman Paul. Li dir ki kan Paul pou al Jérusalem bannla pou fer li prizonie. Ek vremem sa arive. Lerla, apre ki li dan prizon pandan de-z-an dan Césarée, bannla avoy Paul dan Rome pou ki sef Romin César ziz li. Anou gete ki arive pandan so vwayaz pou al Rome.
