Nofraz lor enn Lil
Zistwar 112
Nofraz lor enn Lil
GET sa bato-la kouma dan problem! Li pe kase bout-bout! Eski to trouv bann dimounn ki’nn sot dan delo? Sertin finn reisi ariv lor lakot. Eski se Paul ki laba la? Anou gete ki finn ariv li.
Sirman to rapel ki pandan de-z-an Paul ti res dan prizon dan Césarée. Lerla, ti met li ek sertin prizonie lor enn bato pou al Rome. Kan zot pas pre ar lil Crète enn gro siklonn tap lor zot. Divan tap telman for ki bann zom nepli kapav diriz bato. Zot pa trouv soley pandan lizour ni bann zetwal aswar. Alafin, apre plizir zour, bann ki lor bato perdi tou lespwar pou sort vivan.
Lerla Paul deboute ek dir: ‘Personn parmi zot pa pou perdi so lavi; zot pou perdi zis bato-la. Parski yer swar, enn anz Bondie ti vinn dir mwa: “Pa gagn per, Paul! To bizin prezant twa devan sef Romin César. Ek Bondie pou sap tou sa bann dimounn ki pe vwayaz ar twa la.”’
Ver minwi, 14em zour apre ki siklonn finn leve, bann marin remarke ki pli ale fonder delo pe bese! Zot zet lank parski zot gagn per tansion bato-la kraz lor bann ros. Landemin gramatin, zot trouv enn laplaz. Zot desid pou esey amenn bato-la lor laplaz.
Kan zot ariv pre ar lakot, bato-la tap avek enn ban disab ek li tas lamem. Bann vag koumans kraz lor la, ek bato-la koumans kase bout-bout. Sa ofisie larme ki ti ansarz la dir: ‘Tou bann ki kapav naze sot dan lamer avan ek naze ziska laplaz. Leres sote apre ek swiv bannla, trap bann bout plans bato pou ki zot kapav flote.’ Ek se seki zot fer. Koumsa toule 276 dimounn ki ti lor sa bato-la finn reisi vinn lor laplaz san ki ariv zot nanye, parey kouma sa anz-la ti promet.
Sa lil-la apel Malte. Bann dimounn ki viv laba, zot bann bon dimounn ek zot pran swin bann ki ti dan bato. Kan letan inpe pli bon, bannla met Paul lor enn lot bato pou al Rome.
