Li demann zefor pou fer kamarad avek enn kikenn, li demann osi zefor pou gard enn lamitie. Si ou fer bann zefor pou vinn kamarad Bondie ek pou kontign gard sa lamitie-la, Bondie pou beni ou bann zefor. Jésus ti dir avek bann ki ti krwar li: “Laverite pou liber zot.” (Jean 8:32) Ki sa vedir?

Ou kapav zwir liberte asterla. Ou kapav libere ar bann fos lansegnman ek bann mansonz ki Satan finn fane partou. Ou kapav sorti dan dezespwar ki ranpli lavi bann milyon dimounn ki pa konn Jéhovah. (Romains 8:22) Bann kamarad Bondie finn mem libere avek laper lamor.​—Hébreux 2:14, 15.

Ou kapav zwir liberte dan nouvo lemond Bondie. Sa li pou vremem enn liberte extraordiner ki nou pou kapav zwir dan lavenir! Dan Paradi lor later, nou pou libere ar lager, maladi, ek krim. Nou pou libere ar lamizer ek lafaminn. Nou pou libere ar vieyes ek lamor. Nou pou libere ar laper, dominer, ek linzistis. Labib dir lor Bondie: “To ouver to lame, ek to satisfer dezir tou seki vivan.”​—Psaume 145:16.

 Bann kamarad Bondie pou viv pou touletan. Lavi pou touletan li enn kado presie ki Bondie pou donn tou bann ki rod so lamitie. (Romains 6:23) Pans enn kou seki lavi pou touletan pou vedir pou ou!

Ou pou ena letan pou fer boukou kitsoz. Sirman ou pou kontan aprann zwe enn linstriman lamizik. Ouswa, kitfwa ou pou kontan aprann penn bann tablo ouswa fer bann travay dibwa. Ou pou kapav aprann plis lor bann zanimo ouswa lor bann plant. Ouswa, ou pou anvi vwayaze ek dekouver bann lezot pei ek bann lezot dimounn. Lavi pou touletan pou rann tousala posib!

Ou pou ena letan pou fer enn kantite kamarad. Lavi pou touletan pou permet ou konn enn kantite lezot dimounn ki finn vinn bann kamarad Bondie. Ou pou arive konn zot bann talan ek zot bann bon kalite, ek bannla osi pou vinn ou bann kamarad. Ou pou kontan zot, ek bannla osi pou kontan ou. (1 Corinthiens 13:8) Lavi pou touletan pou permet ou vinn kamarad ar tou dimounn lor later! Pli extra ankor, plis bann siek pase, ou lamitie avek Jéhovah pou vinn ankor pli gran. Nou swete ki ou vinn kamarad Bondie pou touletan!