1, 2. Kan to dan enn landrwa ki to pa tro kone, kifer to bizin enn gid? Ki kitsoz Zeova inn donn nou pou gid nou?

 MAZINE ki to pe marse dan enn gran dezer. Bann divan bien for pe soufle lor disab, ek peizaz ki devan twa sak fwa pe sanze. Li bien fasil ki to perdi to sime, pa vre! Kouma eski to pou kone ki direksion to pou pran? To bizin enn kikenn ouswa enn kitsoz pou gid twa. Kitfwa to pou servi enn bousol, pozision soley ek bann zetwal, enn map, enn GPS (Global Positioning  System), ouswa mem rod enn dimounn ki konn dezer-la bien. Enn gid bien inportan, parski kan to kone kotsa to pe ale, sa kapav sap to lavi.

² Dan lavi, nou tou nou bizin fer fas ar bann difikilte, ek parfwa, nou kapav santi nou perdi. Me pou gid nou, Zeova inn donn nou tou enn konsians. (Zak 1:17, NW) Alor, anou gete ki ete enn konsians, ek kouma li travay. Apre sa, nou pou aprann kouma nou kapav form nou konsians, kifer nou bizin respekte konsians lezot, ek kouma enn bon konsians kapav amelior nou lavi.

3. Ki ete enn konsians?

³ Nou konsians se enn zoli kado ki Zeova inn donn nou. Konsians se enn santiman dan nou ki dir nou si enn kitsoz li bon ouswa pa bon. Mo Grek ki’nn servi dan Labib pou “konsians” vedir “konesans ki enn kikenn ena lor limem.” Kan nou konsians travay bien, li ed nou pou examine ki kalite dimounn nou ete vremem. Li ed nou pou analiz nou bann panse ek nou bann santiman ki pli profon dan enn fason onet. Li kapav diriz nou ver seki bon ek fer nou al lwin ar seki move. Ek li kapav fer nou santi nou bien kan nou pran enn bon desizion, ouswa fer nou santi nou koupab kan nou’nn pran enn move desizion.​—Get Not 5.

4, 5. (a) Ki ti arive kan Adan ek Ev pa ti ekout zot konsians? (b) Sit sertin lexanp Biblik ki montre kouma enn konsians travay.

⁴ Sak dimounn kapav swazir si li pou ekout so konsians ouswa non. Adan ek Ev ti fer pese parski zot  ti swazir pou pa ekout zot konsians. Apre sa, zot ti santi zot koupab, me li ti tro tar. Zot ti fini dezobeir Bondie. (Zenez 3:7, 8) Toulede ti ena enn konsians parfe ek zot ti kone ki li pa bon dezobeir Bondie. Me kanmem sa, zot ti swazir pou pa ekout zot konsians.

⁵ Me selman, ena boukou dimounn inparfe ki’nn ekout zot konsians. Zob enn bon lexanp dan sa domenn-la. Zob ti ekout so konsians ek li ti pran bann bon desizion. Akoz sa, li ti kapav dir: “Tanki mo pou viv, mo leker pa pou kondann mwa.” (Zob 27:6) Kan Zob pe koz lor so “leker,” li pe rod dir so konsians, setadir so santiman ki dir li si enn kitsoz li bon ouswa pa bon. Ti ena bann moman kot David pa’nn ekout so konsians ek li ti dezobeir Zeova. Me apre sa, li ti santi li telman koupab ki so leker ti koumans “kondann li.” (1 Samiel 24:5) David so konsians ti pe dir li ki seki li ti fer pa ti bon. Kan li ti ekout so konsians, li ti aprann pou pa refer bann mem erer ankor.

6. Kifer nou kapav dir ki konsians se enn kado ki Bondie inn donn tou dimounn?

⁶ Mem bann dimounn ki pa konn Zeova, souvan realize ki ena bann kitsoz ki bon ek ki pa bon. Labib dir: “Parfwa zot lespri akiz zot, parfwa li defann [“exkiz,” NW] zot.” (Romin 2:14, 15) Par exanp, laplipar dimounn kone ki li pa bon touy enn kikenn ouswa kokin. Mem si kitfwa zot pa realize, an realite zot pe ekout zot konsians, kapasite ki Zeova inn donn zot ek ki ed zot pou fer diferans ant seki bon ek seki pa bon. Zot pe osi swiv bann prinsip ki Zeova inn done, ki ed nou pou pran bann bon desizion.

7. Kifer parfwa nou konsians kapav met nou dan lerer?

 ⁷ Me parfwa nou konsians kapav met nou dan lerer. Par exanp, nou bann panse ek santiman ki inparfe kapav afekte nou konsians. Lerla, li kapav fer nou pran enn move direksion. Enn bon konsians pa vinn otomatik. (Zenez 39:1, 2, 7-12) Nou bizin form nou konsians. Pou ed nou, Zeova donn nou so lespri sin ek bann prinsip ki ena dan Labib. (Romin 9:1) Anou gete kouma nou kapav form nou konsians.

8. (a) Kouma nou bann santiman kapav inflians nou konsians? (b) Avan ki nou pran enn desizion, ki nou bizin demann noumem?

⁸ Sertin dimounn panse ki ekout zot konsians vedir azir dapre zot bann santiman. Zot panse ki zot kapav fer tou seki zot anvi, tanki zot santi zot alez pou fer li. Me nou bann santiman pa parfe, ek zot kapav met nou dan lerer. Parfwa, nou bann santiman kapav telman for ki zot kapav inflians nou konsians. Labib dir: “Leker pli tret ki ninport ki lezot kitsoz ek li bien move. Kisannla kapav konn li?” (Zeremi 17:9) Alor, li kapav arive ki nou panse ki enn kitsoz li bon, me an realite li pa bon. Par exanp, avan ki Pol ti vinn enn Kretien, li ti persekit bann serviter Bondie dan enn fason bien violan ek li ti krwar ki seki li ti fer ti bon. Pou li, so konsians ti kler. Me plitar, li ti dir: “Se Zeova ki examinn mwa.” (1 Korintien 4:4, NW; Zistwar Bann Apot 23:1; 2 Timote 1:3) Kan Pol ti aprann seki Zeova ti resanti konsernan bann kitsoz ki li ti pe fer, Pol ti konpran ki li ti bizin sanze. Alor, li kler ki  avan ki nou fer ninport ki kitsoz, nou bizin demann noumem, ‘Ki Zeova anvi mo fer?’

9. Ki savedir ena lakrint pou Bondie?

⁹ Kan nou kontan enn kikenn, nou pa anvi desevwar li, pa vre? Alor, parski nou kontan Zeova, nou pa anvi fer nanye ki pou desevwar Li. Nou bizin ena lakrint pou Bondie, setadir nou bizin per tansion nou desevwar Li ek sa santiman-la bizin bien-bien for. Nou trouv sa dan lexanp Neemi. Neemi ti enn gouverner ek li pa ti servi so pozision pou vinn ris. Kifer? Li ti dir ki se akoz so “lakrint pou Bondie.” (Neemi 5:15) Neemi pa ti anvi fer nanye ki ti pou desevwar Zeova. Parey kouma Neemi, nou osi nou per tansion nou desevwar Zeova kan nou fer enn move kitsoz. Kan nou lir Labib, nou kapav aprann ki kitsoz fer Zeova plezir.​—Get Not 6.

10, 11. Ki bann prinsip Labib pou ed nou pran bann bon desizion konsernan lalkol?

¹⁰ Anou pran enn lexanp. Parfwa, enn Kretien bizin deside si li pou bwar lalkol ouswa non. Ki bann prinsip pou ed li pou pran enn bon desizion? Anou get de-trwa prinsip: Labib pa defann bwar lalkol. An realite, Labib dir nou ki divin se enn kado Bondie. (Psom 104:14, 15, NW) Me selman, Zezi ti dir so bann disip pa bwar tro boukou lalkol. (Lik 21:34) Ek Pol ti dir bann Kretien pa al dan “bann fet kot pena okenn kontrol” ek pa “bwar ziska sou.” (Romin 13:13, NW) Li ti dir ki bann soular pa pou “erit Rwayom Bondie.”​—1 Korintien 6:9, 10.

¹¹ Enn Kretien kapav demann limem: ‘Ki linportans  lalkol ena pou mwa? Eski mo bizin lalkol pou rilax? Eski mo bwar lalkol pou gagn plis konfians an mwa? Eski mo ena enn kontrol lor kantite lalkol ek kantite fwa ki mo bwar? * Eski pou mwa, oblize ena lalkol pou ki mo pas enn bon moman avek mo bann kamarad?’ Li bien inportan ki nou demann Zeova so led pou nou kapav pran bann bon desizion. (Lir Psom 139:23, 24, NW.) Kan nou reflesi lor bann prinsip Labib ek nou examinn noumem dan enn fason onet, nou form nou konsians pou ki li azir an-akor avek bann prinsip Labib. Asterla, anou gete ki kitsoz nou bizin fer ankor.

12, 13. Kifer nou konsians kapav diferan ar konsians lezot? Ki nou pou fer si enn kikenn so konsians pa reazir parey kouma nou?

¹² Tou dimounn pena mem konsians. Kitfwa to konsians pou permet twa fer enn kitsoz, me konsians enn lot dimounn pa pou permet li fer sa. Par exanp, kitfwa to pou swazir pou bwar lalkol, me enn lot dimounn pou swazir pou pa bwar. Kifer li posib ki de dimounn pena mem lopinion lor sa size-la?

¹³ Bien souvan, seki enn kikenn panse lor enn kitsoz li inflianse par landrwa kot li’nn grandi, par seki so fami panse lor la, par so prop lexperyans, ek par lezot kitsoz ankor. Konsernan lalkol, kitfwa enn kikenn ki ti ena bann problem labwason dan lepase, pou swazir pou pa bwar ditou. (1 Lerwa 8:38, 39)  Alor, si to donn enn kikenn enn labwason ki ena lalkol ek ki li refize, kouma to pou reazir? Eski to pou ofanse? Eski to pou insiste pou ki li bwar? Eski to pou demann li kifer li pe refize? Non, parski to respekte so konsians.

14, 15. Ki sitiasion ti arive dan lepok lapot Pol? Ki bon konsey Pol ti done?

¹⁴ Dan lepok lapot Pol, ti ariv enn sitiasion ki montre nou kouma konsians bann dimounn kapav bien diferan. Sertin laviann ki ti pe vande dan bazar, ti’nn fini servi sa avan dan fos ladorasion ek ti’nn ofer sa bann zidol. (1 Korintien 10:25) Pou Pol, pa ti ena nanye demal pou aste ek manz sa laviann-la, parski pou li, tou manze sorti kot Zeova. Me sertin frer, ki ti ador bann zidol dan lepase, pa ti pans parey kouma li. Pou zot, manz sa laviann-la ti enn move kitsoz. Eski Pol ti pans koumsa: ‘Be, sa pa fatig mo konsians. Mo gagn drwa manz seki mo anvi’?

¹⁵ Pol pa ti pans koumsa. Santiman so bann frer ti telman inportan pou li, ki li ti prefer pa manz nanye ki ti pou fer zot tonbe. Pol ti dir ki fode pa nou rod fer “noumem plezir.” Apre sa, Li ti azoute: “Lekris pa ti fer limem plezir.” (Romin 15:1, 3) Parey kouma Zezi, Pol ti fer lintere lezot pas avan so prop lintere.​—Lir 1 Korintien 8:13; 10:23, 24, 31-33, NW.

16. Kifer fode pa nou ziz nou frer lor seki so konsians permet li fer?

¹⁶ Me ki pou arive si konsians enn kikenn permet li fer enn kitsoz ki paret pa bon pou nou? Nou bizin fer bien atansion pou pa kritik li, ek pa insiste ki nou ena rezon ek ki li ena tor. (Lir Romin 14:10.)  Zeova inn donn nou enn konsians pou ziz noumem, pa pou ziz lezot. (Matie 7:1) Nou pa anvi ki nou bann swa personel kree bann divizion dan lasanble. Okontrer, nou rod bann fason pou favoriz lamour ek linite.​—Romin 14:19.

17. Ki’nn ariv konsians sertin dimounn?

¹⁷ Lapot Pier ti ekrir: “Gard zot konsians kler.” (1 Pier 3:16) Kan bann dimounn kontign rezet bann prinsip Zeova, zot konsians nepli travay kouma  bizin ek li nepli averti zot. Pol ti dir ki sa kalite konsians-la “nepli sansib komsi finn brile ar feray so.” (1 Timote 4:2) Eski to’nn deza gagn brile? Kan enn kikenn gagn bien brile kitpar, sa plas-la fer enn mark lor so lapo, li vinn dir ek insansib. Si enn dimounn kontign fer bann move kitsoz, so konsians kapav vinn insansib ek avek letan, li aret travay.

18, 19. (a) Kan nou santi nou koupab ek nou gagn onte, ki nou bizin fer? (b) Si apre ki nou’nn repanti nou ankor santi nou koupab, ki kapav ed nou?

¹⁸ Kan nou santi nou koupab, kitfwa nou konsians pe dir nou ki nou’nn fer enn move kitsoz. Sa kapav ed nou pou konpran ki kitsoz nou’nn fer ek pou aret fer li. Nou anvi aprann ar bann erer ki nou fer, pou  ki nou pa refer zot ankor. Par exanp, apre ki Lerwa David ti fer bann pese, so konsians ti pous li pou repanti. Li ti deteste seki li ti fer ek li ti determine pou obeir Zeova apre sa. Dapre so prop lexperyans, David ti kapav dir ki Zeova ‘bon ek dispoze pou pardone.’​—Psom 51:1-19; 86:5, NW; get Not 7.

¹⁹ Parfwa, enn kikenn kapav ankor santi li koupab pou enn pese ki li’nn fer, mem si li’nn fini repanti depi bien lontan. Sa santiman-la kapav fer li bien soufer, ek fer li santi ki li pa vo nanye. Si parfwa to santi twa koupab, rapel ki to pa kapav sanz lepase. Sa lepok-la, kitfwa to pa ti konpran ki kitsoz bon ouswa pa bon. Me Zeova inn fini pardonn twa net. Li’nn efas sa bann pese-la. To prop devan lizie Zeova. Ek  asterla, to kone ki to pe fer seki bon. Kitfwa to leker ankor pe kondann twa, me Labib dir: “Bondie pli gran ki nou leker.” (Lir 1 Zan 3:19, 20.) Savedir, si nou gagn onte ek santi nou koupab, lamour ek pardon Bondie kapav ed nou sirmont sa bann santiman-la. To kapav sir ki Zeova inn pardonn twa. Kan enn kikenn aksepte pardon Zeova, so konsians kler ek li kapav servi Bondie dan lazwa.​—1 Korintien 6:11; Ebre 10:22, NW.

20, 21. (a) Ki sa liv-la pou ed twa fer? (b) Kouma nou bizin servi liberte ki Zeova inn donn nou?

²⁰ Sa liv-la pou ed twa form to konsians pou ki li averti twa ek protez twa pandan bann dernie zour bien difisil sa lemond-la. Li pou osi ed twa pou aplik bann prinsip Labib dan diferan sitiasion to lavi. Biensir, sa liv-la pa pou donn nou enn lalis lalwa ki nou bizin swiv dan sak sitiasion. Nou viv dapre “lalwa Lekris,” ki baze lor bann prinsip Bondie. (Galat 6:2) Kan pena enn lalwa presi dan enn sertin sitiasion, nou pa servi sa kouma enn exkiz pou fer seki pa bon. (2 Korintien 4:1, 2; Ebre 4:13; 1 Pier 2:16) Okontrer, nou servi nou liberte pou montre nou lamour pou Zeova.

²¹ Kan nou reflesi lor bann prinsip Labib ek nou met zot an pratik, nou aprann pou servi nou ‘disernman’ (setadir kapasite pou fer diferans ant seki bien ek seki mal) ek pou pans parey kouma Zeova. (Ebre 5:14, NW) Lerla, nou pou gagn enn konsians ki travay bien ek ki pou enn bon gid dan nou lavi. Li pou osi ed nou pou res dan lamour Bondie.