1-3. (a) Kifer enn mama anvi fer sir ki so ti garson res prop? (b) Kifer Zeova anvi ki so bann serviter res prop?

 MAZINN enn mama ki pe prepar so ti garson pou al lekol. Li fer sir ki so garson inn bengne ek ki so linz prop ek an-ord. Sa ed garson-la pou res an bonn sante ek sa montre ki so bann paran pran li bien swin.

² Nou Papa, Zeova, anvi ki nou res prop ek ki nou gard nou pirte. (Psom 18:26, NW) Li kone ki sa bon pou nou kan nou res prop. Anplis, kan nou prop, nou donn Li laglwar.​—Ezekiel 36:22; lir 1 Pier 2:12, NW.

 ³ Ki savedir res prop? Ek kifer li bon pou nou? Kan nou pou examinn sa bann kestion-la, kitfwa nou pou trouve ki nou ena sertin sanzman pou fer.

4, 5. (a) Kifer nou bizin res prop? (b) Kouma kreasion Zeova ansegn nou seki Li panse lor propte?

⁴ Nou kapav aprann pou res prop ek pou gard nou pirte gras-a lexanp Zeova. (Levitik 11:44, 45) Alor, rezon prinsipal kifer nou bizin res prop se parski nou anvi ‘imit Bondie.’​—Efezien 5:1.

⁵ Kreasion Zeova ansegn nou boukou kitsoz lor seki Li panse lor propte. Zeova inn kree bann sik natirel (bann sanzman ki arive dan enn sertin lord dan lanatir) ki permet nou pou gard nou ler ek nou delo prop. (Zeremi 10:12) Reflesi lor la: later kapav netway limem dan plizir fason, malgre polision ki bann dimounn fer. Par exanp, Zeova inn kree bann mikrob, ki telman tipti ki nou kapav trouv zot zis avek enn mikroskop. Bann mikrob kapav fer bann kitsoz toxik vinn bann kitsoz ki pa danzere. Se enn kitsoz extraordiner! An realite, bann siantis servi sertin parmi sa bann mikrob-la pou lit kont polision.​—Romin 1:20.

6, 7. Kouma Lalwa Moiz montre ki bann serviter Zeova bizin res prop?

⁶ Lalwa ki Zeova ti donn bann Izraelit par Moiz montre nou ki li bien inportan ki nou res prop. Par exanp, bann Izraelit ti bizin prop lor plan fizik pou ki Zeova aksepte zot ladorasion. Zour kot gran pret ti rant dan pies ki Pli Sin dan tanp, li ti bizin bengn de  fwa. (Levitik 16:4, 23, 24) Ek avan ki bann lezot pret ti ofer bann sakrifis, zot ti bizin lav zot lame ek lipie. (Exod 30:17-21; 2 Kronik 4:6) Dan sertin sitiasion, si enn kikenn ti dezobeir bann lalwa lor propte, li ti merit mor.​—Levitik 15:31; Nonb 19:17-20.

⁷ Azordi, gras-a Lalwa, nou kapav aprann boukou kitsoz lor bann prinsip Zeova. (Malaki 3:6) Lalwa montre dan enn fason bien kler ki bann adorater Zeova bizin res prop. Ek bann prinsip Zeova pa’nn sanze. Azordi, Li touzour anvi ki nou res prop ek ki nou gard nou pirte.​—Zak 1:27, NW.

8. Dan ki domenn nou bizin res prop?

⁸ Pou Zeova, res prop, se pa zis gard nou lekor, nou linz, ek nou lakaz prop. Nou bizin res prop dan tou domenn nou lavi. Sa inplik nou ladorasion, nou kondwit, ek nou panse. Wi, pou nou prop devan lizie Zeova, nou bizin res prop ek gard nou pirte dan tou domenn nou lavi.

9, 10. Kouma nou kapav gard nou pirte dan nou ladorasion?

⁹ Pirte dan nou ladorasion. Fode pa nou inplik nou dan okenn fason ar fos relizion. Kan bann Izraelit ti prizonie dan Babilonn, zot ti antoure ar bann dimounn imoral ki ti ador bann fos bondie. Izai ti predir ki bann Izraelit ti pou retourn Izrael pou retabli vre ladorasion. Zeova ti dir zot: “Sorti ladan, pa tous nanye ki inpir; sorti omilie li, gard zot pirte.” Bann Izraelit ti bizin pa melanz zot ladorasion pou Bondie avek bann lansegnman, labitid, ek koutim fos relizion dan Babilonn.​—Izai 52:11.

 ¹⁰ Azordi osi, bann vre Kretien rezet fos relizion. (Lir 1 Korintien 10:21, NW.) Partou dan lemond, boukou krwayans, tradision, ek koutim baze lor bann fos lansegnman relizie. Par exanp, dan boukou kiltir, bann dimounn krwar ki ena enn kitsoz dan nou ki kontign viv apre lamor ek boukou koutim baze lor sa krwayans-la. (Ekleziast 9:5, 6, 10) Bann Kretien bizin rezet sa bann kalite koutim-la. Bann manb nou fami kitfwa kapav met presion lor nou pou partisip dan sertin parmi sa bann koutim-la. Me nou anvi gard nou pirte devan lizie Zeova. Alor, nou pa pou sede kan zot met presion lor nou.​—Zistwar Bann Apot 5:29.

11. Kouma nou kapav gard nou pirte dan nou kondwit?

¹¹ Pirte dan nou kondwit. Pou Zeova trouve ki nou pe gard nou pirte, nou bizin rezet tou seki ena enn lien ar limoralite sexiel. (Lir Efezien 5:5.) Dan Labib, Zeova dir nou “sove devan limoralite sexiel.” Dan enn fason bien kler, Zeova dir nou ki bann dimounn ki pratik limoralite ek ki pa repanti ‘pa pou erit Rwayom Bondie.’​—1 Korintien 6:9, 10, 18; get Not 22.

12, 13. Kifer nou bann panse bizin prop?

¹² Pirte dan nou bann panse. Nou bann panse bien souvan inflians nou bann aksion. (Matie 5:28; 15:18, 19) Nou pou azir avek pirte si nou bann panse ranpli ar bann kitsoz ki prop. Biensir, nou inparfe, ek parfwa nou ena bann move panse. Me kan sa arive, nou bizin rezet zot deswit. Si nou pa fer sa, avek letan, nou leker kapav vinn inpir. Si nou res pans lor samem, nou pou anvi fer sa bann kitsoz-la. Se pou sa rezon-la ki nou bizin ranpli nou lespri ar bann panse  ki prop ek pir. (Lir Filipien 4:8, NW.) Akoz sa, nou rezet bann divertisman ki ena laviolans ek limoralite. Nou fer bien atansion ar seki nou lir, seki nou gete, ek seki nou dir.​—Psom 19:8, 9, NW.

¹³ Pou nou res dan lamour Bondie, nou bizin gard nou pirte dan nou ladorasion, nou kondwit, ek nou bann panse. Me propte nou lekor ek nou lanvironnman osi inportan pou Zeova.

14. Kifer li inportan ki nou prop lor plan fizik?

¹⁴ Kan nou gard nou lekor ek nou lanvironnman prop, nou ek bann dimounn ki otour nou gagn bann bienfe. Nou santi nou bien, ek lezot pou kontan res avek nou. Me ena enn lot rezon pli inportan kifer nou bizin res prop lor plan fizik. Kan nou prop, nou donn Zeova laglwar. Reflesi lor la: Si to trouv enn zanfan ki touletan malang, kitfwa to pou pans bann move kitsoz lor so paran, pa vre? Dan mem fason, si nou pa pran nou swin ek nou malang, kitfwa bann dimounn pou pans bann move kitsoz lor Zeova. Pol ti dir: “Dan ninport ki kitsoz, nou pa donn okenn lokazion ki kapav fer lezot tonbe, pou ki personn pa kritik nou minister; me dan tou fason, nou rekomann noumem kouma bann minis Bondie.”​—2 Korintien 6:3, 4, NW.

15, 16. Ki nou kapav fer pou nou res prop?

¹⁵ Nou lekor ek nou linz. Nou bizin ena labitid pou gard nou lekor prop toulezour. Par exanp, nou bizin bengne souvan, si posib toulezour. Nou lav nou lame avek savonet ek delo, sirtou avan nou kwi ek  manze. Nou bizin touletan lav nou lame kan nou fini al twalet ek kan nou’nn tous bann kitsoz ki malang. Lav nou lame kitfwa paret enn kitsoz bien sinp, me li inportan pou ki bann mikrob ek bann maladi pa fane. Sa kapav mem sap bann lavi. Si nou pena twalet ouswa enn sistem pou drenn bann malpropte, nou kapav trouv bann lezot fason efikas pou debaras zot. Bann Izraelit pa ti ena enn sistem drin. Alor, zot ti anter zot bann malpropte dan later, bien-bien lwin ar bann lakaz ek bann lasours delo.​—Deteronom 23:12, 13.

¹⁶ Li pa neseser ki nou linz extra zoli, lamod, ouswa ser. Me nou linz bizin prop ek an-ord. (Lir 1 Timote 2:9, 10.) Nou touletan anvi ki nou laparans donn Zeova laglwar.​—Tit 2:10.

17. Kifer nou bizin gard nou lakaz ek nou bann zafer prop?

 ¹⁷ Nou lakaz ek nou lanvironnman. Ninport kotsa nou reste, nou bizin gard nou lakaz prop. Nou bizin osi gard nou loto, nou motosiklet, nou bisiklet, ouswa ninport ki transpor ki nou ena prop, sirtou si nou servi zot pou al renion ouswa predikasion. Sa bien inportan parski dan predikasion nou explik bann dimounn ki biento zot pou kapav viv lor enn later ki prop, ki pou vinn enn paradi. (Lik 23:43, NW; Revelasion 11:18) Kan nou gard nou lakaz ek nou lanvironnman prop, nou montre ki nou pe prepar nou pou viv dan enn nouvo lemond, kot tou kitsoz pou prop.

18. Kifer nou bizin gard bann lasal kot nou ador Bondie prop?

¹⁸ Landrwa kot nou ador Bondie. Nou montre ki propte inportan pou nou kan nou gard nou Lasal kot fer renion ek nou lasal lasanble prop. Kan bann dimounn asiste renion pou premie fwa, souvan zot inpresione par propte nou lasal. Sa donn Zeova laglwar. Tou dimounn dan lasanble kapav donn enn koudme pou netway Lasal ek partisip dan bann travay mintenans.​—2 Kronik 34:10.

19. Ki kitsoz nou bizin rezete?

¹⁹ Labib pa donn nou enn lalis bann move labitid ki nou bizin rezete. Me li donn nou bann prinsip ki ed nou konpran seki Zeova panse lor sa bann kitsoz-la. Zeova pa anvi ki nou fime, ki nou bwar boukou lalkol, ouswa ki nou droge. Si nou enn kamarad Bondie, nou pa pou fer sa bann kitsoz-la. Kifer? Parski nou ena boukou respe pou lavi, enn kado ki Bondie  inn done. Sa bann move labitid-la kapav afekte nou lasante, fer nou mor avan ler, ek fer ditor bann dimounn ki otour nou. Boukou dimounn esey aret sa bann move labitid-la akoz zot lasante. Me kan nou kamarad avek Zeova, pli bon rezon ki nou ena pou aret sa bann move kitsoz-la, se nou lamour pou Li. Enn zenn madam ti dir: “Avek led Zeova, mo’nn sanz mo lavi ek mo’nn aret mo bann move labitid. . . . Zame mo pa ti pou kapav fer sa bann sanzman-la mo tousel.” Anou get sink prinsip Labib ki kapav ed enn kikenn pou aret bann move labitid.

20, 21. Ki bann labitid Zeova anvi ki nou rezete?

²⁰ “Akoz samem, mo bann frer ki mo bien kontan, parski nou ena sa bann promes-la, anou tir tou kitsoz ki sali nou lekor ek nou lespri pou nou kapav pirifie nou, ek pou ki nou kapav reisi vinn sin dan lakrint pou Bondie.” (2 Korintien 7:1, NW) Zeova pa anvi ki nou ena bann labitid ki kapav danzere pou nou lespri ek nou lekor.

²¹ Dan 2 Korintien 6:17, 18, Zeova donn nou enn rezon inportan pou nou “pirifie noumem, separ nou avek tou seki kapav sali nou.” Zeova dir nou: “Pa tous nanye ki inpir.” Apre, Li fer sa promes-la: “Mo pou akeyir zot. Momem, mo pou enn Papa pou zot, e zot, zot pou mo garson, zot pou mo tifi.” Wi, Zeova pou kontan nou parey kouma enn papa kontan so zanfan si nou rezet tou seki kapav fer nou vinn sal ouswa inpir devan Li.

22-25. Ki prinsip Labib kapav ed nou pou rezet bann move labitid?

²² “To bizin kontan to Segner [“Zeova,” NW], to  Bondie avek tou to leker, avek tou to nam e avek tou to lespri.” (Matie 22:37) Samem pli gran komannman ki ena. (Matie 22:38) Zeova merite ki nou donn Li tou nou lamour. Eski nou kapav kontan Zeova avek tou nou leker si nou fer bann kitsoz ki kapav fer nou mor avan ler ouswa ki afekte nou servo? Non. Plito, nou fer tou pou montre ki nou ena respe pou lavi ki Li’nn donn nou.

²³ “Limem [“Zeova,” NW] ki donn lavi, ki fer respire, ki donn tou kiksoz.” (Zistwar Bann Apot 17:24, 25) Si enn kamarad donn twa enn kado spesial, eski to pou zet li ouswa kas li? Lavi se enn kado extraordiner ki Zeova inn donn nou. Nou vremem kontan sa kado-la. Alor, nou anvi viv enn lavi ki pou donn Zeova laglwar.​—Psom 36:9.

²⁴ “Kontan to prosin kouma tomem.” (Matie 22:39) Nou bann move labitid fer noumem ditor. Me zot osi fer ditor bann dimounn ki otour nou, ek bien souvan, se bann dimounn ki nou plis kontan. Par exanp, enn kikenn ki viv ansam avek enn dimounn ki fime kapav gagn bann gro problem lasante parski li pe respir sa lafime-la. Kan nou aret nou bann move labitid, nou montre bann dimounn ki otour nou ki nou kontan zot.​—1 Zan 4:20, 21.

²⁵ “Rapel tou dimoun ki zot bizin respekte [“soumet ek obeir,” NW] bann dirizan ek bann otorite sivil.” (Tit 3:1) Dan boukou pei, lalwa interdi bann dimounn pou droge ouswa pou ena ladrog avek zot. Zeova demann nou pou respekte bann gouvernman. Alor, nou obeir bann lalwa.​—Romin 13:1.

26. (a) Ki nou bizin fer pou ki Zeova aksepte nou ladorasion? (b) Kifer nou anvi fer nou maximum pou res prop ek pou gard nou pirte?

 ²⁶ Si nou anvi vinn kamarad Zeova, kitfwa nou pou bizin fer sertin sanzman. Alor, pa tarde pou fer sa bann sanzman-la. Li pa touletan fasil pou aret enn move labitid, me nou kapav fer li! Zeova promet ki Li pou ed nou. Li dir: “Mwa, Zeova, Momem to Bondie, Momem ki ansegn twa pou to profi, Momem ki gid twa lor semin ki to bizin marse.” (Izai 48:17) Kan nou fer nou maximum pou res prop ek gard nou pirte, nou donn nou Bondie laglwar.