1, 2. (a) Instriksion kisannla nou bizin swiv? (b) Ki bann kestion nou pou examine dan sa sapit-la?

 KAN to ti tipti, sirman inn deza arive ki to bann paran inn demann twa fer enn kitsoz ki to pa ti anvi fer? To kontan to bann paran, ek to kone ki to bizin obeir zot. Me kitfwa, pa touletan ki to ti anvi obeir zot.

² Nou kone ki nou Papa, Zeova, kontan nou. Li pran nou swin ek Li donn nou tou seki nou bizin pou ki nou ere dan lavi. Li gid nou pou ki nou reisi dan nou lavi. Parfwa, Li servi bann lezot dimounn pou gid nou. Nou bizin respekte lotorite Zeova. (Proverb 24:21) Me kifer li difisil parfwa pou nou aksepte instriksion ki nou gagne? Kifer Zeova demann nou pou swiv bann instriksion ki nou gagne? Ek kouma nou montre ki nou respekte so lotorite?​—Get Not 9.

3, 4. Kouma bann imin inn vinn inparfe? Kifer li kapav difisil pou nou aksepte ki lezot diriz nou?

³ Bann imin ena tandans pou rebele. Sa finn arive  depi ki Adan ek Ev, premie zom ek premie fam, ti fer pese. Mem si Bondie ti kree zot parfe, zot ti rebel kont so lotorite. Depi sa lepok-la, tou dimounn ne inparfe. Enn rezon kifer nou trouv sa difisil pou aksepte direksion Zeova ek direksion lezot dimounn, se parski nou inparfe. Ek enn lot rezon se parski bann dimounn ki Zeova servi pou diriz nou, zot osi zot inparfe.​—Zenez 2:15-17; 3:1-7; Psom 51:5; Romin 5:12.

⁴ Akoz nou inparfe, nou ena tandans pou ena lorgey. Ek akoz lorgey, li difisil pou nou aksepte bann instriksion ki lezot donn nou. Par exanp, dan lepase, Zeova ti swazir Moiz pou diriz So pep Izrael. Me enn zom ki ti apel Kore, ki ti pe servi Zeova depi plizir lane, ti vinn orgeye ek li pa ti ena okenn respe pou Moiz. Parkont, Moiz pa ti ena lorgey, mem si li ti pe diriz pep Bondie. Labib dir ki dan sa lepok-la, Moiz ti zom ki ti ena plis limilite. Me Kore pa ti aksepte direksion Moiz. Li ti mem konvink enn kantite dimounn pou zwenn avek li ek pou rebel kont Moiz. Ki ti ariv Kore ek bann lezot rebel-la? Zeova ti touy zot. (Nonb 12:3; 16:1-3, 31-35) Dan Labib, ena boukou lexanp ki montre nou ki lorgey se enn defo bien danzere.​—2 Kronik 26:16-21; get Not 10.

5. Kouma sertin dimounn ti abiz zot lotorite?

⁵ Kitfwa to finn deza tann sa lexpresion-la, “Pouvwar mont dan latet.” Toutlong listwar, boukou dimounn inn abiz pouvwar ki zot ti ena. (Lir Ekleziast 8:9.) Par exanp, kan Zeova ti swazir Sail pou vinn lerwa lor Izrael, Sail ti bon ek li ti ena limilite.  Me li ti les lorgey ek zalouzi grandi dan so leker, ek sa ti pous li pou persekit David, enn zom inosan. (1 Samiel 9:20, 21; 10:20-22; 18:7-11) Plitar, David ti vinn lerwa, ek li ti enn parmi bann meyer lerwa ki ti diriz Izrael. Me avek letan, mem David ti abiz so lotorite. Li ti gagn bann relasion sexiel avek Betsabe, Uri so madam, ek li ti esey kasiet so pese kan li ti avoy Uri al lager pou ki li mor.​—2 Samiel 11:1-17.

6, 7. (a) Nou lamour pou Zeova motiv nou pou fer ki kitsoz? (b) Ki pou ed nou pou obeir mem kan li difisil?

⁶ Nou aksepte direksion Zeova ek nou respekte so lotorite parski nou kontan Li. Ek parski nou kontan Zeova plis ki ninport ki kitsoz ouswa ninport kisannla, nou anvi fer Li plezir. (Lir Proverb 27:11; Mark 12:29, 30, NW.) Depi ki premie koup imin ti dan zardin Edenn, Satan finn touletan anvi ki bann dimounn met an dout lotorite Zeova. Diab anvi fer nou krwar ki Zeova pena drwa dir nou seki nou bizin fer. Me nou kone ki li pe koz manti. Nou dakor avek sa bann parol-la: “Segner Bondie [“Zeova,” NW], to merit resevwar laglwar, ek loner ek pwisans parski tomem ki finn kre tou kitsoz.”​—Revelasion 4:11.

⁷ Kan to ti tipti, sirman to ti aprann pou obeir to bann paran, mem kan to pa ti anvi. Dan mem fason, nou ki bann serviter Zeova, parfwa nou kapav trouv sa difisil pou obeir Li. Me parski nou kontan ek nou ena respe pou Zeova, nou fer tou seki nou kapav pou obeir Li. Zezi enn bon lexanp pou nou dan sa  domenn-la. Li ti obeir Zeova mem kan sa pa ti fasil pou li ouswa kan sa pa ti dan so lavantaz. Se pou sa rezon-la ki li ti kapav dir so Papa: “Ki to volonte li realize, pa mo volonte.”​—Lik 22:42, NW; get Not 11.

8. Sit sertin fason ki Zeova servi pou gid nou. (Get lankadre “ Ekout Bann Konsey.”)

⁸ Azordi, Zeova gid nou dan diferan fason. Par exanp, Li’nn donn nou Labib. Li’nn osi donn nou bann ansien ki dan lasanble. Nou montre ki nou respekte lotorite Zeova kan nou respekte bann ki Li servi pou diriz nou. Si nou rezet zot led, se koumadir nou pe rezet Zeova. Kan bann Izraelit ti rezet Moiz, pou Zeova sa ti bien grav. Pou Li, se koumadir zot ti rezet Limem.​—Nonb 14:26, 27; get Not 12.

9. Kouma lamour pous nou pou swiv bann instriksion ki nou gagne?

⁹ Kan nou respekte lotorite, sa montre osi ki nou kontan nou bann frer ek ser. Anou pran enn lexanp. Kan ena enn katastrof natirel, bien souvan enn lekip sekour pou travay ansam pou kapav sov maximum dimounn. Pou ki sa lekip-la travay dan enn fason ki efikas, bizin ena enn responsab ki organiz lekip-la, ek sak manb pou bizin swiv so instriksion. Me ki pou arive si enn kikenn pa pran kont bann instriksion ki li gagne ek fer dapre so latet? Mem si li ena bann bon lintansion, li pa’nn swiv bann instriksion ki li’nn gagne. Akoz sa, li kapav fer lezot manb so lekip gagn problem, ouswa mem met zot lavi an danze. Dan mem fason, si nou pa swiv direksion Zeova ek direksion bann dimounn ar ki Li’nn  donn lotorite, lezot kapav soufer. Me kan nou obeir Zeova, nou montre ki nou kontan nou bann frer ek ser ek ki nou ena respe pou bann dispozision ki Li’nn pran.​—1 Korintien 12:14, 25, 26.

10, 11. Ki nou pou examine asterla?

¹⁰ Tou seki Zeova demann nou pou fer, se dan nou prop lintere. Kan nou respekte lotorite dan nou fami, lotorite dan lasanble, ek lotorite ki gouvernman ena, tou dimounn gagn bann bienfe.​—Deteronom 5:16; Romin 13:4; Efezien 6:2, 3; Ebre 13:17, NW.

¹¹ Kan nou konpran kifer Zeova anvi ki nou ena respe pou lezot, sa kapav ed nou pou fer li. Anou gete kouma nou kapav montre respe dan trwa domenn nou lavi.

12. Kouma enn mari kapav montre ki li respekte lotorite?

¹² Zeova inn kree lafami ek Li’nn donn sak manb enn rol. Kan sak manb lafami konpran seki Zeova atann ki li fer, tou pou mars bien dan lafami ek zot tou pou gagn bann bienfe. (1 Korintien 14:33, NW) Zeova finn etabli bann mari kouma sef fami. Savedir ki Zeova atann ki enn mari pran swin so fam ek so bann zanfan ek ki li gid zot avek lamour. Alor, enn mari ena bann kont pou rann Zeova lor fason ki li pran swin so fami. Enn mari Kretien, li bon ek li ena lamour. Li tret so fami parey kouma Zezi tret lasanble. Kan enn mari azir koumsa, li montre ki li ena respe pou Zeova.​—Efezien 5:23, NW; get Not 13.

13. Kouma enn fam kapav montre ki li respekte lotorite?

 ¹³ Enn fam Kretien osi ena enn rol inportan ek onorab dan lafami. Pandan ki so mari fer tou seki li kapav pou vinn enn bon sef fami, so fam soutenir li. Ansam avek so mari, li ena responsabilite pou ansegn bann zanfan. Enn fason ki li ansegn so zanfan pou ena respe, se par so prop lexanp. (Proverb 1:8) Li respekte so mari ek soutenir bann desizion ki so mari pran. Mem kan li pa dakor avek so mari, li exprim so santiman avek respe ek zantiyes. Kan enn ser so mari pa Temwin, li fer fas ar bann difikilte ki lezot pa gagne. Me si li kontign tret so mari avek lamour ek respe, kitfwa mari-la osi enn zour pou anvi konn Zeova ek ador Li.​—Lir 1 Pier 3:1, NW.

14. Kouma bann zanfan kapav montre ki zot respekte lotorite?

¹⁴ Bann zanfan ena boukou valer pou Zeova, ek zot bizin ki kikenn gid zot ek protez zot. Kan bann zanfan obeir zot paran, zot rann zot paran ere. Me pli inportan, kan zot obeir, zot montre respe pou Zeova ek zot fer Li plezir. (Proverb 10:1) Dan boukou fami, ena enn sel paran pou elve bann zanfan. Sa kapav bien difisil pou sa paran-la ek osi pou bann zanfan. Me kan bann zanfan obeir ek soutenir zot paran ki pe elve zot tousel, zot lavi fami pou meyer. Dan ninport ki sitiasion, pena okenn fami ki parfe. Me tou bann fami kapav pli ere kan sak manb swiv direksion ki Zeova done. Sa donn Zeova, Kreater tou bann fami, laglwar.​—Efezien 3:14, 15, NW.

15. Kouma nou kapav montre ki nou respekte lotorite dan lasanble?

¹⁵ Zeova diriz nou gras-a lasanble Kretien, ek Li’nn donn Zezi tou lotorite lor bann lasanble. (Kolosien 1:18, NW) Zezi inn donn “lesklav fidel ek saz” responsabilite pou okip pep Bondie lor later. (Matie 24:45-47, NW) Azordi, “lesklav fidel ek saz” se Komite Santral. Komite Santral ed nou pou gard nou lafwa for kan li donn nou seki nou bizin dan ler ki bizin. Dan lemond antie, bann ansien, bann asistan ministeryel, ek bann responsab sirkonskripsion soutenir bann lasanble ek zot swiv direksion Komite Santral. Tou sa bann frer-la ena responsabilite pou pran swin bann manb lasanble. Zot ena pou rann kont Zeova lor fason ki zot asim zot responsabilite. Alor, kan nou respekte sa bann zom-la, nou respekte Zeova.​—Lir 1 Tesalonisien 5:12, NW; Ebre 13:17, NW; get Not 14.

16. Kifer nou kapav dir ki se lespri sin ki nomm bann ansien ek bann asistan ministeryel?

¹⁶ Bann ansien ek bann asistan ministeryel ed bann manb lasanble pou res fidel ek ini. Biensir, zot inparfe parey kouma nou. Alor, kouma eski swazir zot? Sa bann frer-la bizin ranpli bann kondision ki ena dan Labib. (1 Timote 3:1-7, 12, NW; Tit 1:5-9, NW) Zeova inn servi so lespri sin pou ed bann ekrivin Labib explik sa bann kondision-la. Bann ansien priye Zeova ek demann Li so lespri sin kan zot pe examine kisannla kapav servi kouma ansien ouswa asistan ministeryel. Li kler ki se Zezi ek Zeova ki  diriz bann lasanble. (Zistwar Bann Apot 20:28, NW) Bann frer ki’nn swazir pou soutenir nou ek pran nou swin, zot bann kado Bondie.​—Efezien 4:8.

17. Pou montre ki li respekte lotorite, parfwa ki kitsoz enn ser pou bizin fer?

¹⁷ Parfwa, li kapav arive ki pena okenn ansien ouswa asistan ministeryel ki disponib pou okip enn responsabilite dan lasanble. Lerla, bann lezot frer kapav ede. Me si pena okenn frer ki disponib, kitfwa enn ser pou bizin fer enn travay ki enn frer sipoze fer. Si sa arive, li pou bizin kouver so latet, kitfwa avek enn foular ouswa enn sapo. (1 Korintien 11:3-10) Lerla, li pou montre ki li respekte lotorite ki Zeova inn etabli dan lafami ek dan lasanble.​—Get Not 15.

18, 19. (a) Ki nou aprann dan Romin 13:1-7? (b) Kouma nou montre ki nou respekte bann gouvernman ek bann ki ena enn sertin lotorite?

¹⁸ Azordi, Zeova permet bann gouvernman pou ena enn sertin lotorite, ek nou bizin respekte zot. Zot diriz bann pei pou ki tou mars bien ek zot etabli bann servis ki inportan pou popilasion. Bann Kretien obeir lord ki trouv dan Romin 13:1-7. (Lir.) Nou montre nou respe pou bann “lotorite” kan nou obeir bann lalwa ki gouvernman nou pei inn etabli. Sa bann lalwa-la kitfwa kapav afekte nou fami, nou travay, ouswa nou bann dibien. Par exanp, nou pey bann tax ek nou ranpli ninport ki form ouswa dokiman ki gouvernman demann nou pou ranpli. Me ki nou pou fer si gouvernman demann nou fer enn  kitsoz ki kont bann lalwa Bondie? Lapot Pier ti dir: “Nou bizin obeir Bondie plito ki obeir dimoun.”​—Zistwar Bann Apot 5:28, 29.

¹⁹ Kan nou bizin koz avek enn reprezantan gouvernman, kouma enn ziz ouswa enn lapolis, nou bizin touletan ena respe. Bann zenn Kretien bizin ena respe pou zot bann profeser ek pou bann lezot travayer ki ena dan lekol. Dan nou travay, nou bizin ena respe pou nou patron, mem si lezot travayer pa respekte li. Kan nou fer sa, nou imit lexanp lapot Pol, ki ti ena respe pou bann reprezantan gouvernman mem kan sa ti difisil. (Zistwar Bann Apot 26:2, 25) Mem si lezot maltret nou, nou bizin kontign ena respe pou zot.​—Lir Romin 12:17, 18; 1 Pier 3:15, 16.

20, 21. Kan nou ena respe pou lezot, ki lefe nou bon lexanp kapav ena?

²⁰ Partou dan lemond, pli ale bann dimounn ena mwins respe pou lezot. Me bann serviter Zeova zot diferan. Nou lobzektif se respekte tou dimounn. Nou swiv seki lapot Pier ti dir: “Onor tou sort kalite dimounn.” (1 Pier 2:17, NW) Kan nou ena respe pou lezot, zot remarke. Zezi ti dir nou: “Les to lalimier briye devan tou dimoun, pouki zot kapav trouv to bann bienfe [“bon travay,” NW] e loue to Papa dan lesiel.”​—Matie 5:16.

²¹ Kan nou montre respe dan lafami, dan lasanble, ek dan bann lezot domenn nou lavi, nou bon lexanp kapav fer lezot anvi konn plis lor Zeova. Ek kan nou ena respe pou lezot, nou ena respe pou Zeova. Sa fer Zeova kontan ek sa montre Li ki nou kontan Li.