Pou zot tou ki kontan Zeova ek so Parol, Labib:

Zezi ti dir: “Zot pou konn laverite e laverite pou rann zot lib.” (Zan 8:32) Mazine ki to ti resanti kan to ti fek dekouver laverite dan Labib! Sa ti vremem extraordiner pou kone ki dan enn lemond kot ena boukou mansonz, nou kapav aprann laverite.​—2 Timote 3:1.

Zeova anvi ki nou konn laverite. Ek parski nou kontan bann dimounn, nou anvi ansegn zot laverite. Me pou servi Bondie, nou bizin fer plis ki sa. Nou bizin fer nou best pou viv kouma enn Kretien, parski nou ena boukou respe pou bann prinsip Zeova. Zezi ti explike kouma nou kapav montre Bondie ki nou kontan Li. Zezi ti dir: “Si zot gard mo bann komannman, zot pou res dan mo lamour parey kouma mwa, mo gard komannman mo Papa e mo res dan so lamour.”​—Zan 15:10.

Zezi vremem kontan so Papa, ek li fer tou seki so Papa demann li pou fer. Si nou imit Zezi dan fason ki nou viv, Zeova pou kontan nou ek nou pou vremem ere. Parey kouma Zezi ti dir: “Si aster zot inn konn tousala, zot pou bien-ere si zot met sa anpratik.”​—Zan 13:17.

Nou espere ki sa liv-la pou ed twa pou aprann viv an-akor avek laverite ki trouv dan Labib ek pou vinn kamarad Bondie. Nou priye ki to kontign fer to lamour pou Bondie vinn pli for ek res “dan lamour Bondie . . . ki pou donn [twa] lavi eternel.”​—Zid 21.