1, 2. Kifer to kontan Zeova?

 ESKI to kontan Bondie? Kitfwa to telman kontan Bondie ki to finn vwe to lavi ar Li. Kitfwa to ena santiman ki Li to meyer Kamarad. Me Zeova ti deza kontan twa, avan mem ki to kontan Li. Labib dir: “Nou ena lamour, parski Li, Li finn kontan nou an premie.”​—1 Zan 4:19, NW.

² Reflesi lor tou bann fason ki Zeova inn montre nou so lamour. Li’nn kree later pou nou res lor la, ek Li’nn donn nou tou seki nou bizin pou ki nou ena enn zoli lavi. (Matie 5:43-48; Revelasion 4:11) Li anvi ki nou ena enn bon relasion avek Li, ek Li’nn donn nou posibilite pou aprann konn Li. Par exanp, kan nou lir Labib, nou ekout Zeova. Ek kan nou fer lapriyer, Li ekout nou. (Psom 65:2) Li gid nou ek donn nou lafors gras-a so lespri sin ki bien pwisan. (Lik 11:13) Li finn mem avoy so Garson ki Li bien kontan lor later, pou liber nou ar pese ek lamor.​—Lir Zan 3:16; Romin 5:8.

3. Kouma nou kapav kontign gard enn bon relasion avek Zeova?

 ³ Mazinn enn parmi to bann meyer kamarad. Sirman li’nn pas bann bon moman avek twa. Me li ti la osi kan to ti dan problem. Pou ki enn lamitie res for koumsa, sa demann boukou zefor, pa vre? Li parey osi pou nou lamitie avek Zeova. Limem meyer Kamarad ki nou kapav ena, ek nou lamitie avek Li kapav dire pou touletan. Se pou sa rezon-la ki Labib dir nou: “Gard zot touzour dan lamour Bondie.” (Zid 21) Kouma nou kapav fer sa? Labib reponn: “Ala seki vedir lamour Bondie: swiv so bann komannman; ek pourtan so bann komannman pa lour.”​—1 Zan 5:3, NW.

4, 5. (a) Ki savedir “lamour Bondie”? (b) Kouma to lamour pou Zeova inn koumans grandi?

⁴ Ki Labib pe rod dir par lexpresion “lamour Bondie”? Li pa pe fer referans ar lamour ki Bondie ena pou nou, me plito lamour ki nou, nou ena pou Li. Eski to rapel seki to ti resanti kan to ti fek koumans kontan Zeova?

⁵ Rapel seki to ti resanti kan to ti fek aprann ki Zeova anvi ki to viv pou touletan dan lemond nouvo. To ti aprann tou seki Zeova ti fer pou ki sa realize. Ek to ti konpran ki Li’nn donn nou enn kado extraordiner kan Li ti avoy so Garson lor later. (Matie 20:28; Zan 8:29; Romin 5:12, 18) Kan to ti aprann ki kantite Zeova kontan twa, sa ti tous to leker. Lerla, twa osi to’nn koumans kontan Li.​—Lir 1 Zan 4:9, 10.

6. Ki nou anvi fer pou enn kikenn ki nou kontan? Ki kitsoz to lamour pou Bondie inn pous twa pou fer?

 ⁶ Me sa lamour ki to ti resanti pou Bondie la, ti zis enn koumansman sa. Par exanp, kan nou kontan enn kikenn, nou pa zis dir li “Mo kontan twa.” Akoz nou kontan li, nou pou anvi fer bann kitsoz ki pou fer li plezir. Dan mem fason, to lamour pou Zeova inn fer twa anvi viv dan enn fason ki fer Li plezir. Amezir ki to lamour pou Zeova ti pe grandi, to ti vwe to lavi avek Li ek to ti pran batem. Kan to ti vwe to lavi avek Zeova, to ti promet pou servi Li pou touletan. (Lir Romin 14:7, 8, NW.) Kouma to kapav tini to promes?

7. Si nou kontan Zeova, ki nou pou fer? Sit sertin parmi so bann komannman.

⁷ Nou kontan Zeova. Se pou sa rezon-la ki “nou obeir so komannman.” Dan Labib, nou aprann kouma Zeova anvi ki nou viv. Par exanp, Li kondann bwar ziska sou, kokin, koz manti, gagn relasion sexiel avek enn kikenn ki pa nou konzwin, ador enn kikenn ouswa enn kitsoz. Nou bizin ador zis Li tousel.​—1 Korintien 5:11; 6:18; 10:14; Efezien 4:28; Kolosien 3:9.

8, 9. Dan bann sitiasion kot pena enn lalwa presi dan Labib, kouma nou pou kone ki kitsoz Zeova anvi nou fer? Donn enn lexanp.

⁸ Me pou fer Zeova plezir, nou bizin fer plis ki obeir so bann komannman. Zeova pa’nn donn nou enn long lalis lalwa pou sak sitiasion ki ena dan lavi. Parfwa, pa pou ena enn lalwa presi dan Labib ki pou dir nou seki nou bizin fer. Alor, kouma nou kapav  pran bann bon desizion? (Efezien 5:17) Dan Labib, ena bann prinsip ki montre kouma Zeova trouv bann kitsoz. Ek kan nou lir Labib, nou aprann konn personalite Zeova. Nou aprann so fason panse, seki Li kontan, ek seki Li deteste.​—Lir Psom 97:10, NW; Proverb 6:16-19; get Not 1.

⁹ Par exanp, kouma nou pou deside ki kitsoz nou pou gete lor televizion ouswa lor Internet? Zeova pa dir nou dan enn fason presi ki nou bizin fer. Me bann prinsip ki Li donn nou pou ed nou pou pran bann bon desizion. Azordi, boukou divertisman ranpli ar violans ek sex. Dan Labib, Zeova dir nou ki Li “ena laenn pou enn kikenn ki kontan laviolans” ek ki Li “pou ziz bann ki komet limoralite sexiel.” (Psom 11:5, NW; Ebre 13:4, NW) Kouma sa bann prinsip-la kapav ed nou pou pran bann bon desizion? Kan nou kone ki Zeova ena laenn pou enn kitsoz ouswa ki Li konsider sa kouma imoral, nou bizin rezet sa kitsoz-la.

10, 11. Kifer nou obeir Zeova?

¹⁰ Kifer nou obeir Zeova? Se pa zis pou evit gagn pinision ouswa pou evit gagn bann konsekans akoz nou bann move desizion. (Galat 6:7) Non, nou obeir Zeova parski nou kontan Li. Parey kouma bann zanfan ki anvi fer zot papa plezir, nou osi nou anvi fer nou Papa ki dan lesiel plezir. Kan nou kone ki nou pe fer Zeova plezir, pena nanye ki pli bon ki sa!​—Psom 5:12; Proverb 12:2; get Not 2.

¹¹ Nou pa obeir Zeova zis kan sa fasil ouswa kan nou pena swa. Ek nou pa swazir ki lalwa ek prinsip  nou pou obeir. (Deteronom 12:32) Okontrer, nou obeir Li dan tou kitsoz, parey kouma sa ekrivin Psom la ti dir: “Mo santi mwa dan bien kan mo pe obeyir to komandman parski mo telman kontan to parol.” (Psom 119:47; Romin 6:17) Nou anvi resanble Noe, ki ti montre ki li kontan Zeova kan li ti fer tou seki Zeova ti dir li fer. Labib dir ki Noe “ti fer exakteman” seki Bondie ti dir li. (Zenez 6:22) Eski to anvi ki Zeova dir mem kitsoz lor twa?

12. Kouma nou kapav fer Zeova kontan?

¹² Ki santiman Zeova ena kan nou obeir Li? Nou fer so “leker kontan.” (Proverb 11:20; 27:11) Reflesi lor la: nou fer Kreater liniver kontan kan nou obeir Li! Me zame Li fors nou pou obeir Li. Okontrer, Li’nn donn nou liberte pou swazir. Savedir ki nou lib pou swazir pou fer seki bon ouswa seki pa bon. Zeova anvi ki nou lamour pou Li motiv nou pou pran bann bon desizion. Lerla, nou pou kapav ena pli bon lavi ki ena.​—Deteronom 30:15, 16, 19, 20; get Not 3.

13, 14. Kouma nou kone ki bann komannman Bondie pa tro difisil pou obeir? Donn enn lexanp.

¹³ Eski to panse ki bann komannman Zeova tro difisil pou obeir, ouswa ki zot priv twa to liberte? Labib dir dan enn fason bien kler: “So bann komannman pa lour.” (1 Zan 5:3, NW) Mo Grek ki’nn servi pou tradir “lour” inn servi osi dan bann lezot verse  pou dekrir bann lalwa ki pa rezonab ouswa bann dimounn ki esey kontrol lezot ek bles zot. (Matie 23:4; Zistwar Bann Apot 20:29, 30) Nouvelle Bible Segond tradir sa verse-la koumsa: “So bann komannman pa enn fardo.” Bann komannman Zeova pa “enn fardo,” savedir ki zot pa lour, zot pa tro difisil pou obeir. Zeova touletan rezonab dan tou seki Li demann nou.

¹⁴ Par exanp, mazine ki to pe ed enn kamarad pou demenaze. Li’nn ramas tou so bann zafer dan bann bwat. Sertin bwat leze ek fasil pou sarye, me ena lezot bwat ki telman lour ki bizin de dimounn pou sarye. Eski to kamarad pou demann twa pou sarye enn bwat ki bien lour to tousel? Non! Kifer? Parski li pa anvi ki to blese. Parey kouma sa kamarad-la, Zeova zame pou demann nou fer enn kitsoz ki tro difisil. (Deteronom 30:11-14) Zeova konpran nou ek Li konn nou bien. Li “bien kone kouma ti form nou; li kone ki nou sorti dan lapousier.”​—Psom 103:14.

15. Kifer nou kapav sir ki bann komannman Zeova fer nou dibien?

¹⁵ Moiz ti dir bann Izraelit ki bann komannman Zeova ti pou touletan fer zot dibien, ek ki zot lobeisans ti pou fer zot “res vivan.” (Deteronom 5:28-33; 6:24) Azordi osi parey. Nou pou ena enn pli bon lavi si nou fer tou seki Zeova demann nou fer. (Lir Izai 48:17.) Nou Papa, Zeova, touletan kone ki kitsoz pli bon pou nou. (Romin 11:33) Labib dir nou: “Bondie limem lamour.” (1 Zan 4:8) Savedir ki tou seki Zeova dir ek fer ranpli ar lamour.

16. Mem si nou inparfe ek nou viv dan enn lemond ki ranpli ar lemal, kouma nou kone ki nou kapav obeir Bondie?

 ¹⁶ Me li pa touzour fasil pou obeir Bondie. Nou viv dan enn lemond ki ranpli ar lemal ek ki dirize par Diab. Li esey inflians bann dimounn pou fer seki move. (1 Zan 5:19) Akoz nou inparfe, nou bizin lit osi kont nou bann move panse ek santiman ki kapav fer nou dezobeir Bondie. (Romin 7:21-25) Me nou lamour pou Zeova donn nou lafors pou fer seki bon. Zeova trouv bann zefor ki nou fer pou obeir Li, ek Li ed nou kan Li donn nou so lespri sin ki bien pwisan. (1 Samiel 15:22, 23; Zistwar Bann Apot 5:32) Lespri sin ed nou pou devlop bann kalite. Gras-a sa bann kalite-la, li pli fasil pou nou obeir Zeova.​—Galat 5:22, 23, NW.

17, 18. (a) Ki nou pou aprann dan sa liv-la? (b) Ki nou pou examine dan prosin sapit?

¹⁷ Dan sa liv-la, nou pou aprann kouma nou kapav viv dan enn fason ki fer Zeova plezir. Nou pou aprann kouma nou kapav aplik so bann prinsip ek so bann valer moral dan nou lavi. Pa bliye ki Zeova zame fors nou pou obeir Li. Kan nou swazir pou obeir Zeova, nou pou ena enn pli bon lavi ek enn zoli lavenir. Me pli inportan, nou lobeisans pou montre Li ki kantite nou kontan Li.​—Get Not 4.

¹⁸ Pou ed nou fer diferans ant seki bon ek seki pa bon, Zeova inn donn nou tou enn konsians. Si nou form nou konsians, sa kapav ed nou pou “obeir so komannman.” Me ki ete enn konsians, ek kouma nou kapav form li? Se seki nou pou examine dan prosin sapit.