1, 2. Ki nou kapav fer pou res dan lamour Bondie?

 NOU tou anvi vinn for ek ena enn bon lasante. Alor nou esey manz bon manze, fer lexersis regilierman ek pran swin nou lekor. Mem si nou bizin fer zefor, nou kontan kan nou trouv bann bon rezilta ek lerla nou pa abandone. Me nou bizin vinn for osi ek ena enn bon lasante dan enn lot fason.

² Nou’nn koumans aprann konn Zeova ek se enn bon fason pou koumanse. Me, nou bizin touzour kontign fer nou relasion avek Li vinn pli for. Kan Zid ti ankouraz bann Kretien pou “res dan lamour Bondie,” li ti explike kouma zot ti kapav fer sa. Li ti dir: “Kontign fortifie zotmem dan zot lafwa ki bien sin.” (Zid 20, 21, NW) Alor, kouma nou kapav fer nou lafwa vinn pli for?

3-5. (a) Ki Satan anvi to panse lor bann prinsip Zeova? (b) Ki to panse lor bann lalwa ek bann prinsip Zeova?

³ Li inportan ki to vremem sir personelman ki Zeova so fason fer touletan meyer. Satan anvi ki to panse ki Bondie so bann prinsip tro difisil pou swiv  ek ki to pou pli ere si to deside par tomem seki bon ek seki pa bon. Depi lepok zardin Edenn, Satan inn esey fer dimounn krwar sa. (Zenez 3:1-6) Azordi osi, li pe fer boukou zefor pou kontign fer krwar sa.

⁴ Eski Satan ena rezon? Eski bann prinsip Zeova tro strikt? Non. Pou konpran sa, mazine ki to pe mars dan enn zoli zardin. To trouv enn gran baraz ki pe anpes twa al enn sertin landrwa. Kitfwa to panse, ‘Ki sa baraz-la pe fer lor mo semin?’ Me zis sa ler-la, to tann enn lion kriye lot kote baraz. Aster-la, eski to pe ankor demann tomem kifer ena sa gran baraz-la? Sirman to bien rekonesan ki sa baraz-la inn protez twa kont sa lion-la! Bann prinsip Zeova zot kouma sa baraz-la ek Diab, li kouma sa lion-la. Parol Bondie averti nou: “Gard zot bon sans, ek res lor zot gard. Zot adverser, Lediab, pe sirkile kouma enn lion ki pe kriye ek ki pe rod kikenn pou devore.”​—1 Pier 5:8, NW.

⁵ Zeova anvi ki nou gagn meyer lavi posib. Li pa anvi ki Satan anbet nou. Akoz samem Li’nn donn nou bann lalwa ek bann prinsip pou protez nou ek pou ki nou ere. (Efezien 6:11) Zak ti ekrir: “Dimoun ki persevere pou examinn vre lalwa, lalwa laliberte, e li kontign ladan avek fidelite . . . pou beni dan tou seki li fer.”​—Zak 1:25.

6. Kifer nou pena okenn dout ki fason fer Zeova samem meyer?

⁶ Kan nou swiv direksion Zeova, nou lavi ameliore ek nou lamitie avek Li vinn pli for. Par exanp, nou gagn bann bienfe kan nou aksepte So linvitasion pou priye Li souvan. (Matie 6:5-8; 1 Tesalonisien 5:17) Nou kontan kan nou obeir so direksion setadir kan  nou zwenn ansam pou ador Li, ankouraz sakenn nou kamarad ek kan nou partisip afon dan predikasion ek dan lansegnman. (Matie 28:19, 20; Galat 6:2; Ebre 10:24, 25) Kan nou rann nou kont kouma sa bann kitsoz-la inn ed nou gard nou lafwa for, nou nepli pou ena okenn dout ki fason fer Zeova samem meyer.

7, 8. Ki kapav ed nou pou evit gagn traka pou bann leprev ki kapav arive dan lavenir?

⁷ Kitfwa nou kapav gagn traka, parski dan lavenir nou pou gagn bann leprev ki pou teste nou lafwa ek ki pou tro difisil pou nou. Si zame to resanti sa, rapel seki Zeova ti dir: “Mwa, Zeova, Momem to Bondie, Momem ki ansegn twa pou to profi, Momem ki gid  twa lor semin ki to bizin marse. Si selman to ti pran kont mo bann komannman! Lerla to lape ti pou vinn parey kouma enn larivier, ek to lazistis parey kouma bann vag lamer.”​—Izai 48:17, 18.

⁸ Kan nou obeir Zeova, nou lape pou kouma enn larivier ki zame sek, ek nou lazistis, setadir nou bon kondwit, pou kouma vag lamer ki touletan pe kraz lor laplaz. Ninport ki arive dan nou lavi, nou kapav res fidel. Labib promet: “Depoz to fardo lor LESEGNER [Zeova, NW] e li pou rekonfort twa parski zame li abandonn dimounn ki viv drwat.”​—Psom 55:22.

9, 10. Ki savedir ena matirite?

⁹ Amezir ki to relasion avek Zeova vinn pli for, to pou “avans ver matirite.” (Ebre 6:1, NW) Ki savedir ena matirite?

¹⁰ Se pa laz ki fer enn Kretien ena matirite. Pou vinn enn Kretien ki ena matirite, nou bizin fer Zeova vinn nou meyer Kamarad ek esey trouv bann kitsoz parey kouma Li. (Zan 4:23) Pol ti ekrir: “Seki pe viv dapre natir pese ena tandans swiv seki natir la dimande; me seki viv dapre Lespri swiv seki Lespri dezire.” (Romin 8:5) Enn dimounn ki ena matirite pa konsantre so lavi lor bann divertisman ek bann kitsoz materyel. Okontrer, li res konsantre lor so servis pou Zeova ek li pran bann desizion ki saz dan so lavi. (Proverb 27:11; lir Zak 1:2, 3.) Li pa les li inflianse pou fer seki pa bon. Enn kikenn ki ena matirite kone ki kitsoz bon ek li bien deside pou fer li.

11, 12. (a) Ki Pol ti dir lor “kapasite pou diserne” ki enn Kretien ena? (b) Dan ki fason enn Kretien ki ena matirite, li parey kouma enn kikenn ki vinn enn atlet?

 ¹¹ Sa demann boukou zefor pou vinn enn kikenn ki ena matirite. Lapot Pol ti ekrir: “Manze solid li pou bann dimounn ki ena matirite, pou bann ki afors zot inn pratike, ena bann kapasite pou diserne, ki finn antrene pou fer diferans ant seki bien ek seki mal.” (Ebre 5:14, NW) “Antrene” kapav fer nou pans lor lantrennman enn atlet.

¹² Kan nou trouv seki enn bon atlet pe kapav fer, nou kone ki sa finn demann li letan ek lantrennman pou li devlop so kapasite. Li pa’nn ne atlet. Kan enn ti baba ne, li pa vremem kone kouma pou servi so lebra ek so lazam. Me avek letan, li aprann kouma pou atrap bann kitsoz ek kouma pou marse. Avek lantrennman, li kapav vinn enn atlet. Dan mem fason, nou bizin letan ek lantrennman pou vinn bann Kretien ki ena matirite.

13. Ki pou ed nou pou aprann pans parey kouma Zeova?

¹³ Dan sa liv-la, nou’nn examine kouma nou kapav pans parey kouma Zeova ek trouv bann kitsoz parey kouma Li. Nou’nn aprann pou apresie ek kontan bann prinsip Zeova. Kan nou pe pran bann desizion, nou demann noumem: ‘Ki bann lalwa ouswa bann prinsip dan Labib aplik ar sa sitiasion-la? Kouma mo kapav met zot an pratik? Ki Zeova ti pou kontan mo fer?’​—Lir Proverb 3:5, 6; Zak 1:5.

14. Ki nou bizin fer pou ki nou lafwa vinn pli for?

¹⁴ Zame nou bizin aret fer nou lafwa vinn pli for dan Zeova. Parey kouma bann manze ki bon pou lasante  ed nou pou vinn for, aprann lor Zeova ed nou pou fer nou lafwa vinn for. Kan nou ti koumans etidie Labib, nou ti aprann bann verite lor Zeova ek so bann fason fer. Me avek letan, nou bizin konpran bann kitsoz ki pli profon. Se seki Pol ti pe rod dir kan li ti ekrir: “Manze solid li pou bann adilt.” Kan nou aplik seki nou aprann, nou gagn sazes. Labib dir nou: “Sazes samem ki pli inportan.”​—Proverb 4:5-7; 1 Pier 2:2.

15. Kifer li inportan ki nou vremem kontan Zeova ek nou bann frer ek ser?

¹⁵ Enn dimounn kapav for ek ena enn bon lasante, me pou ki li res koumsa, li kone ki li bizin kontign pran limem bien swin. Li parey pou enn dimounn ki ena matirite. Li kone ki li bizin travay dir pou gard so relasion avek Zeova for. Pol rapel nou: “[Kontign, NW] examinn zotmem pou verifie si zot pe viv dan lafwa. [Kontign, NW] teste zotmem.” (2 Korintien 13:5) Me, li pa ase ki nou ena zis enn lafwa for. Nou lamour pou Zeova ek pou nou bann frer ek ser osi bizin kontign grandi. Pol ti dir: “Si mo ena . . . konesans, e si mo ena lafwa pou bouz montagn, me mo pena lamour, mo enn nanye ditou.”​—1 Korintien 13:1-3.

16. Ki Satan ti pou anvi nou resanti?

¹⁶ Satan anvi fer krwar ki nou pa vo nanye ek ki zame nou pou kapav fer Zeova plezir. Li anvi ki nou santi nou dekouraze ek panse ki pena okenn solision pou nou bann problem. Li pa anvi ki nou fer nou bann frer ek ser Kretien konfians, ek li pa anvi ki nou ere. (Efezien 2:2) Satan kone ki, bann panse negatif  kapav fer nou ditor ek gat nou relasion avek Bondie. Me Zeova inn donn nou enn kitsoz pou ed nou lager kont bann panse negatif. Li’nn donn nou enn lespwar.

17. Kifer lesperans li inportan?

¹⁷ Dan 1 Tesalonisien 5:8, Labib konpar nou lesperans avek enn elmet ki protez latet enn solda dan lager. Li dir ki sa elmet-la, se nou “lesperans ek delivrans.” Nou lesperans dan bann promes Zeova kapav protez nou lespri ek ed nou pou reziste kont bann panse negatif.

18, 19. Kouma lesperans ki Zezi ti ena, ti fer li vinn for?

¹⁸ Lesperans ki Zezi ti ena, ti fer li vinn for. Pandan dernie lanwit ki li ti pase lor later, Zezi ti fer fas ar bann sitiasion difisil enn apre lot. Enn kamarad pros ti trayir li. Enn lot ti mem dir ki li pa konn Zezi. Lezot ti abandonn li ek ti sove. So prop pep ti kondann  li, ek ti demann pou tortir li ziska li mor. Ki ti ed Zezi pou andir sa bann soufrans-la? “Akoz lazwa ki ti pe atann li, li finn andir enn poto soufrans, san pran kont laont, ek li finn asiz dan kote drwat tronn Bondie.”​—Ebre 12:2, NW.

¹⁹ Zezi ti kone ki, si li res fidel, li ti pou donn laglwar so Papa ek prouve ki Satan enn manter. Sa lesperans-la ti donn li enn gran lazwa. Li ti kone osi ki biento li ti pou rezwenn so Papa dan lesiel. Sa lesperans-la ti ed li pou andire. Parey kouma Zezi, nou osi nou bizin res konsantre lor nou lesperans. Sa pou ed nou pou andire, ninport ki arive.

20. Ki pou ed twa res pozitif?

²⁰ Zeova trouv to lafwa ek to landirans. (Izai 30:18; lir Malaki 3:10.) Li promet pou “donn twa dezir ki ena dan to leker.” (Psom 37:4) Alor, konsantre to  lespri lor to lesperans. Satan anvi ki to perdi lespwar ek ki to panse ki bann promes Zeova zame pou realize. Me to bizin reziste kont bann panse negatif! Si to remarke ki to lesperans pe vinn deplizanpli flou, demann Zeova pou ed twa. Rapel sa bann parol Filipien 4:6, 7, NW: “Pa trakase pou okenn kitsoz, me dan tou kitsoz, par lapriyer ek siplikasion avek bann remersiman, demann Bondie seki zot bizin; ek lape Bondie ki depas tou konesans pou protez zot leker ek zot lespri par mwayin Kris Zezi.”

21, 22. (a) Ki proze Zeova ena pou later? (b) Ki to bien deside pou fer?

²¹ Regilierman, pran letan pou medit lor zoli lavenir ki pe atann nou. Biento, tou dimounn pou ador Zeova. (Revelasion 7:9, 14) Reflesi kouma lavi pou ete dan nouvo lemond. Lavi pou bien pli bon ki tou seki nou kapav mazine! Satan, so bann demon, ek tou move kitsoz pou disparet. To pa pou malad, ek to pa pou mor. Okontrer, to pou leve toulezour an-form ek ranpli ar lenerzi ek to pou kontan ki to vivan. Tou dimounn pou travay ansam pou fer later vinn enn paradi. Zot tou pou profit enn manze ki nourisan ek viv an sekirite. Dimounn pa pou kriel ouswa violan me zot pou vremem bon sakenn anver zot kamarad. Avek letan, tou bann dimounn lor later pou kontan profit “laliberte ek laglwar bann zanfan Bondie.”​—Romin 8:21.

²² Zeova anvi ki to fer Li vinn to meyer Kamarad. Alor, fer tou seki to kapav pou obeir Zeova ek vinn pli pros ar Li sak zour. Wi, ki sakenn parmi nou res dan lamour Bondie pou touletan!​—Zid 21, NW.