1. Lanwit avan so lamor, pou ki kitsoz Zezi ti pe trakase?

 LANWIT avan so lamor, Zezi ti kone ki li ti pre pou kit so bann disip, ek li ti pe trakase akoz seki ti pou ariv zot dan lavenir. Li ti dir zot: “Zot pa fer parti dan lemond.” (Zan 15:19, NW) Plitar, Zezi ti priye so Papa pou zot, ek li ti dir: “Zot pa fer parti dan lemond, parey kouma mwa mo pa fer parti dan lemond.” (Zan 17:15, 16, NW) Ki Zezi ti pe rod dir?

2. Lexpresion “lemond” ki Zezi servi, ki li reprezante?

² Isi, “lemond” se bann dimounn ki pa servi Bondie ek ki anba dominasion Satan. (Zan 14:30; Efezien 2:2, NW; Zak 4:4; 1 Zan 5:19) Kouma nou kapav “pa fer parti dan lemond”? Dan sa sapit-la, nou pou examinn plizir fason: (1) Nou res fidel ar Rwayom Bondie ek nou gard nou netralite, setadir, nou pa pran par pou okenn parti politik. (2) Nou reziste kont lespri lemond. (3) Nou abiye ek kwafe dan enn fason ki modes. (4) Nou ena enn latitid ekilibre lor larzan. (5) Nou osi met larmir ki Bondie donn nou.​—Get Not 16.

3. Kouma Zezi ti konsider politik?

³ Kan Zezi ti lor later, li ti trouve ki bann dimounn ti ena boukou problem ek ki zot lavi pa ti fasil. Li ti vremem gagn zot traka ek li ti anvi ed zot. Eski li ti vinn enn dirizan politik? Non. Li ti kone ki bann dimounn ti bizin Rwayom Bondie, setadir gouvernman Bondie. Zezi ti pou vinn Lerwa sa Rwayom-la. Sa Rwayom-la ti size prinsipal so predikasion. (Daniel 7:13, 14; Lik 4:43; 17:20, 21) Zezi pa ti pran par dan politik, li ti touletan gard so netralite. Kan Zezi ti devan Gouverner Romin Pons Pilat, li ti dir: “Mo Rwayom pa fer parti dan sa lemond-la.” (Zan 18:36, NW) So bann disip osi ti gard zot netralite. Enn liv lor listwar (On the Road to Civilization) dir ki bann premie Kretien “pa ti asim okenn fonksion politik.” Azordi, bann vre Kretien osi fer parey. Nou soutenir Rwayom Bondie avek fidelite ek nou gard nou netralite dan bann zafer politik sa lemond-la.​—Matie 24:14.

4. Kouma bann vre Kretien soutenir Rwayom Bondie?

⁴ Bann anbasader reprezant zot gouvernman dan bann pei etranze, alor zot pa inplik zot dan politik sa pei-la. Bann Kretien ki ena lesperans pou al dan lesiel ek ki pou diriz ansam avek Zezi, zot dan mem sitiasion. Konsernan sa bann Kretien-la, Pol ti ekrir: “Nou bann anbasader dan plas Zezi Kris.” (2 Korintien 5:20, NW) Bann Kretien ki ena lesperans pou al dan lesiel, zot reprezant gouvernman Bondie. Zot pa partisip dan bann zafer politik sa lemond-la.  (Filipien 3:20) Okontrer, zot finn ed bann milyon dimounn pou konn gouvernman Bondie. Bann “lezot mouton,” ki ena lesperans pou viv pou touletan dan nouvo lemond ki Bondie pou fer, soutenir bann ki ena lesperans pou al dan lesiel. Zot osi zot gard zot netralite. (Zan 10:16; Matie 25:31-40) Li kler ki okenn vre Kretien pa partisip dan bann zafer politik sa lemond-la.​—Lir Izai 2:2-4.

5. Sit enn rezon kifer bann Kretien pa partisip dan bann lager.

⁵ Bann vre Kretien konsider tou zot bann konpagnon Kretien kouma zot fami. Zot res ini, mem si zot pa res dan mem pei ouswa ena mem kiltir. (1 Korintien 1:10) Si nou ti partisip dan bann lager, nou ti pou lager kont nou prop fami, nou bann frer ek ser  ki Zezi inn donn nou lord pou kontan. (Zan 13:34, 35; 1 Zan 3:10-12, NW) Anplis, Zezi ti dir so bann disip ki zot bizin kontan osi zot bann lennmi.​—Matie 5:44; 26:52.

6. Kouma bann serviter Zeova konsider bann gouvernman?

⁶ Mem si, antan ki Kretien, nou gard nou netralite, nou fer zefor pou vinn bann bon sitwayen. Par exanp, nou respekte gouvernman kan nou obeir lalwa ek nou pey nou bann tax. Me nou touletan donn “Bondie seki pou Bondie.” (Mark 12:17; Romin 13:1-7; 1 Korintien 6:19, 20) Parmi bann kitsoz ki “pou Bondie,” ena nou lamour pou Li, nou lobeisans, ek nou ladorasion. Nou dispoze pou perdi nou lavi plito ki dezobeir Zeova.​—Lik 4:8, NW; 10:27, NW; lir Zistwar Bann Apot 5:29; Romin 14:8, NW.

7, 8. Ki ete lespri lemond ek kouma li inflians bann dimounn?

⁷ Res separe ar lemond Satan vedir ki nou bizin anpes lespri lemond kontrol nou. Sa lespri-la se fason panse ek azir ki sorti kot Satan, ek li kontrol tou bann dimounn ki pa servi Zeova. Me bann Kretien reziste kont sa latitid-la. Parey kouma Pol ti dir, “nou pa finn resevwar lespri lemonn, me Lespri ki sorti kot Bondie.”​—1 Korintien 2:12; Efezien 2:2, 3, NW; get Not 17.

⁸ Lespri lemond fer bann dimounn vinn egois, orgeye, ek rebel. Li fer zot krwar ki zot pa bizin obeir Bondie. Satan anvi ki bann dimounn fer tou seki zot anvi, san pans bann konsekans. Li anvi ki bann dimounn krwar ki ‘dezir laser ek dezir lizie,’ se  bann kitsoz pli inportan dan lavi. (1 Zan 2:16, NW; 1 Timote 6:9, 10, NW) Lediab pe fer bann gro zefor pou esey anbet bann serviter Zeova ek fer nou pans parey kouma li.​—Zan 8:44, NW; Zistwar Bann Apot 13:10; 1 Zan 3:8.

9. Kouma lespri lemond kapav inflians nou?

⁹ Lespri lemond partou otour nou, parey kouma ler ki nou respire. Si nou pa fer bann gro zefor pou reziste sa lespri-la, li pou inflians nou. (Lir Proverb 4:23.) O-koumansman, kitfwa sa linflians-la pa pou paret danzere. Par exanp, nou kapav les nou inflianse par fason panse ek latitid bann dimounn ki pa ador Zeova. (Proverb 13:20; 1 Korintien 15:33, NW) Ouswa, tigit-tigit, nou kapav tom dan bann piez kouma pornografi, lapostazi, ouswa bann spor ki pous nou pou devlop lespri konpetision.​—Get Not 18.

10. Kouma nou kapav reziste kont lespri lemond?

¹⁰ Alor, kouma nou kapav anpes lespri lemond kontrol nou? Nou bizin res pros ar Zeova ek les so sazes gid nou. Nou bizin priye Zeova touletan, demann Li so lespri sin, ek res bien okipe dan so servis. Zeova, Limem pli pwisan dan liniver. Nou sir ki Li kapav ed nou pou reziste kont lespri lemond.​—1 Zan 4:4, NW.

11. Kouma lespri lemond inflians fason ki bann dimounn abiye?

¹¹ Nou montre osi ki nou pa fer parti dan lemond par nou fason abiye ek kwafe. Dan lemond, boukou  dimounn abiy dan enn fason ki atir latansion lor zot, ki fer lezot gagn bann panse imoral, ki montre ki zot rebel kont lasosiete, ouswa ki fer letalaz ar zot larzan. Ena dimounn osi ki pa pran kont zot laparans. Kitfwa zot swazir pou res malang ouswa debraye. Fode pa nou les bann latitid koumsa inflians nou fason abiye ek kwafe.

12, 13. Ki bann prinsip bizin ed nou pou swazir nou labiyman?

¹² Nou, bann serviter Zeova, nou touletan anvi abiy dan enn fason ki prop, pa debraye, avek bon  gou, ek ki apropriye pou lokazion. Nou abiy “dan enn fason modes ek avek bon zizman,” pou montre ki nou “ador Bondie avek respe.”​—1 Timote 2:9, 10, NW; Zid 21.

¹³ Fason ki nou abiye kapav ena enn lefe lor seki bann dimounn panse lor Zeova ek so pep. Nou anvi fer tou kitsoz “pou laglwar Bondie.” (1 Korintien 10:31) Enn kikenn ki modes respekte santiman ek lopinion lezot. Alor, kan nou swazir kouma nou pou abiye ek kwafe, pa bliye ki seki nou swazir ena enn lefe lor lezot.​—1 Korintien 4:9; 2 Korintien 6:3, 4, NW; 7:1, NW.

14. Kan nou pe swazir nou linz pou bann aktivite Kretien, lor ki kitsoz nou bizin reflesi?

¹⁴ Kouma nou abiye kan nou al renion ouswa kan nou sorti predikasion? Eski nou atir tro boukou latansion lor noumem? Eski nou linz deranz lezot? Eski nou panse ki nou fason abiye, li pa konsern lezot? (Filipien 4:5, NW; 1 Pier 5:6, NW) Li normal ki nou anvi ena enn bon laparans. Me kitsoz ki pou vremem donn nou valer se nou bann kalite Kretien. Se nou bann kalite ki Zeova trouve kan Li get nou. Sa bann kalite-la montre kisannla nou ete vremem, ‘seki nou ete andan, dan nou leker . . . , ek ki ena enn gran valer devan lizie Bondie.’​—1 Pier 3:3, 4, NW.

15. Kifer Zeova pa donn nou bann instriksion presi lor nou labiyman ek nou laparans?

¹⁵ Zeova pa’nn donn nou enn lalis instriksion lor bann linz ki nou kapav mete ouswa pa kapav mete. Me plito, Li’nn donn nou bann prinsip Labib ki kapav ed nou pou fer bann bon swa. (Ebre 5:14, NW)  Li anvi ki nou bann desizion, ki zot gran ouswa tipti, zot baze lor nou lamour pou Li ek pou lezot. (Lir Mark 12:30, 31, NW.) Partou dan lemond, bann serviter Zeova abiy dan diferan fason, dapre zot kiltir ek seki zot kontan. Sa bann diferans-la bien zoli.

16. Si to konpar fason ki lemond konsider larzan avek bann lansegnman Zezi, ki to remarke? Ki bann kestion nou bizin demann noumem?

¹⁶ Satan anvi fer bann dimounn krwar ki larzan ek bann kitsoz materyel pou fer zot ere, me bann  serviter Zeova kone ki sa fos. Nou ena konfians dan bann parol Zezi ki dir: “Lavi enn dimoun pa depann lor so dibien, mem si li bien ris.” (Lik 12:15) Larzan pa kapav rann nou vremem ere. Li pa kapav donn nou bann vre kamarad, vre lape lespri, ouswa lavi pou touletan. Li vre ki nou bizin sertin kitsoz materyel ek ki nou anvi profit nou lavi. Me Zezi inn ansegn nou ki nou pou ere si nou ena enn bon relasion avek Bondie ek si nou fer ladorasion pou Bondie vinn kitsoz ki pli inportan dan nou lavi. (Matie 5:3, NW; 6:22, NW) Demann tomem: ‘Eski mo inflianse par fason ki lemond konsider larzan? Eski mo pans ouswa koz lor larzan souvan?’​—Lik 6:45; 21:34-36, NW; 2 Zan 6.

17. Si to rezet fason ki lemond konsider larzan, kouma sa kapav amelior to lavi?

¹⁷ Si nou res konsantre lor nou servis pou Zeova ek ki nou rezet fason ki lemond konsider larzan, nou lavi pou ena enn sans. (Matie 11:29, 30, NW) Nou pou kontant nou ar seki nou ena ek nou lespri pou trankil. (Matie 6:31, 32; Romin 15:13) Nou pa pou trakase sa kantite-la ar bann kitsoz materyel. (Lir 1 Timote 6:9, 10, NW.) Nou pou ere parski nou pe donn lezot. (Zistwar Bann Apot 20:35) Fason ki nou viv nou lavi pou permet nou pas plis letan avek bann dimounn ki nou kontan. Ek kitfwa nou pou mem kapav dormi pli bien.​—Ekleziast 5:12.

18. Ki Satan pe esey fer?

¹⁸ Satan pe esey detrir nou relasion avek Zeova,  alor nou bizin fer tou seki nou kapav pou protez sa relasion-la. Nou bizin lager kont bann “pwisans spiritiel lemal.” (Efezien 6:12) Satan ek so bann demon pa anvi ki nou ere ek ki nou viv pou touletan. (1 Pier 5:8) Sa bann lennmi bien pwisan la pe lager kont nou. Me avek led Zeova, nou kapav gagn sa lager-la!

19. Kouma Efezien 6:14-18 dekrir “larmir” enn Kretien?

¹⁹ Dan lepase, bann solda ti met enn larmir pou protez zot kan zot ti al lager. Nou osi, nou bizin met “larmir” ki Zeova inn donn nou. (Efezien 6:13) Sa larmir-la pou protez nou. Efezien 6:14-18 koz lor sa larmir-la. Li dir: “Pare zot! Met sintir laverite otour zot lerin, e ladrwatir [“lazistis,” NW] kouma enn zile proteksion; dan zot lipie, met soulie ki fer zot pare pou zot al anons Bonn Nouvel ki donn lape. Sarye lafwa toultan kouma enn boukliye, ar sa ki zot pou tegn tou fles anflame ki diab avoye. Aksepte elmet [“delivrans,” NW] ki sov zot, e laparol Bondie kouma lepe ki Lespri done. Priye touzour dan pwisans Lespri ar tou kalite lapriyer e siplikasion dan tou sirkonstans.”

20. Ki nou bizin fer pou ki nou “larmir” protez nou?

²⁰ Si enn solda bliye enn parti so larmir ek les enn parti so lekor san proteksion, se lamem ki so lennmi pou atak li. Si nou anvi ki nou “larmir” protez nou, fode pa nou bliye okenn parti sa larmir-la. Li bizin touletan lor nou ek nou bizin gard li dan enn bon leta. Nou lager pou kontigne ziska ki lemond Satan detrir ek ki Satan ek so bann demon disparet lor  later. (Revelasion 12:17; 20:1-3) Alor, si nou pe lit kont bann febles ouswa bann move dezir, fode pa nou bes lebra!​—1 Korintien 9:27.

21. Kouma nou kapav gagn laviktwar lor Satan?

²¹ Tousel, nou pa pli for ki Diab. Me avek led Zeova, nou pli for ki li! Alor, pou res fidel, nou bizin priye Zeova, etidie so Parol, ek frekant nou bann frer ek ser. (Ebre 10:24, 25) Sa bann kitsoz-la pou ed nou pou pare pou defann nou lafwa ek pou res fidel ar Bondie.

22, 23. (a) Kifer nou bizin touletan pare pou defann nou lafwa? (b) Ki nou pou examine dan prosin sapit?

²² Nou bizin touletan pare pou defann nou lafwa. (Zan 15:19) Lor sertin size, bann Temwin Zeova pena mem krwayans ki laplipar dimounn. Demann tomem: ‘Eski mo vremem konpran kifer nou krwar ladan? Eski mo sir ki seki Labib ek lesklav fidel ek saz dir li vre? Eski mo fier ki mo enn Temwin Zeova? (Psom 34:2, NW; Matie 10:32, 33) Eski mo kapav explik lezot mo krwayans?’​—Matie 24:45, NW; Zan 17:17; lir 1 Pier 3:15, 16.

²³ Dan boukou sitiasion, nou bien kone seki nou bizin fer pou res separe ar lemond. Me ena bann sitiasion kot nou pa tro kone seki nou bizin fer. Satan esey piez nou dan diferan fason. Enn piez ki li servi se bann divertisman. Kouma nou kapav swazir nou bann divertisman avek sazes? Se seki nou pou examine dan prosin sapit.