1, 2. Kouma Balaam ti esey fer pep Zeova ditor?

 ENN peser al dan enn plas kot li pou kapav lapes pwason ki li anvi. Li swazir so labwet, kros li ar so lamson, ek li avoy so lalinn dan delo. Lerla, li atann avek pasians. Kan pwason-la morde, li donn enn kou sek lor so lalinn pou kros pwason-la ek li amenn li.

² Dan mem fason, bann dimounn osi kapav tom dan sa kalite piez-la. Anou pran lexanp bann Izraelit. Zot ti pre pou rant dan Later Promiz kan zot ti pe kanp dan bann Laplenn Moab. Lerwa Moab ti promet pou donn Balaam boukou kas, si li ti fer bann Izraelit gagn malediksion. Alafin, Balaam ti trouv enn fason pou ki bann Izraelit amenn malediksion lor zotmem. Li ti bien swazir so labwet. Li ti avoy bann zenn fam Moabit dan kan bann Izraelit pou sedwir bann zom.​—Nonb 22:1-7; 31:15, 16; Revelasion 2:14.

3. Eski labwet Balaam ti marse? Explike.

³ Eski labwet Balaam ti marse? Wi. Plizir milye  zom Izraelit ti komet ‘limoralite ar bann tifi Moabit.’ Zot ti osi koumans ador bann fos bondie degoutan. Ek parmi, zot ti ador Baal Peor, enn bondie fornikasion. Akoz sa, mem si zot ti pre pou rant dan Later Promiz, 24 000 Izraelit ti mor.​—Nonb 25:1-9.

4. Kifer plizir milye Izraelit ti tom dan piez limoralite sexiel?

⁴ Kifer sa kantite Izraelit la ti tom dan piez Balaam? Parski zot ti pans zis zot prop plezir egois ek zot ti bliye tou seki Zeova ti fer pou zot. Pourtan, bann Izraelit ti ena boukou rezon pou res fidel ar Bondie. Li ti liber zot ar lesklavaz dan Lezip, Li ti nouri zot dan dezer, ek Li ti protez zot ziska ki zot ariv kot Later Promiz. (Ebre 3:12) Kanmem sa, zot ti tom dan piez limoralite sexiel. Lapot Pol ti ekrir: “Fode pa nou pratik limoralite sexiel osi, parey kouma sertin parmi zot ti komet limoralite sexiel.”​—1 Korintien 10:8, NW.

5, 6. Ki nou kapav aprann ar seki ti arive dan bann Laplenn Moab?

⁵ Lemond nouvo bien pre. Dan enn sertenn fason, nou parey kouma bann Izraelit ki pre pou rant dan Later Promiz. (1 Korintien 10:11) Dan lemond ki nou pe viv azordi, bann dimounn pli obsede par sex ki bann Moabit. Li bien fasil ki sa latitid-la inflians bann serviter Zeova. An realite, labwet pli efikas ki Lediab servi se limoralite sexiel.​—Nonb 25:6, 14; 2 Korintien 2:11; Zid 4.

⁶ Alor, demann tomem: ‘Eski mo prefer satisfer mo dezir egois zis akoz enn ti moman plezir, ouswa eski mo prefer viv ere pou touletan dan lemond  nouvo?’ Li vremem vo lapenn fer zefor pou obeir lord Zeova: “Sove devan limoralite sexiel!”​—1 Korintien 6:18.

7, 8. Ki ete limoralite sexiel? Kifer li inportan pou aret pratik limoralite sexiel?

⁷ Azordi, boukou dimounn pa obeir bann lalwa Bondie lor sexialite ek zot fer li san okenn laont ek dan enn fason provokan. Dan Labib, limoralite sexiel se bann aktivite sexiel ant de dimounn ki pa marye sivil sakenn avek so kamarad. Limoralite sexiel se osi bann aktivite sexiel ant bann dimounn mem sex ek osi ant dimounn ek zanimo. Bann aktivite sexiel inplik bann relasion sexiel, sex oral, sodomi, ouswa kares sex enn lot dimounn pou fer gagn enn exsitasion. Sa size-la kapav bien anbarasan, me nou bizin bien konpran li pou ki nou pa fer bann kitsoz ki Bondie deteste.​—Get Not 23.

⁸ Labib explik nou dan enn fason bien kler ki si enn kikenn kontign pratik limoralite sexiel, li pou bizin exkli dan lasanble. (1 Korintien 6:9; Revelasion 22:15) Anplis, enn kikenn ki imoral perdi respe pou limem ek lezot osi nepli fer li konfians. Limoralite touletan amenn bann problem. Bien souvan, se enn konsians ki repros nou, tom ansint san ki atann, problem dan maryaz, bann maladi, ouswa mem lamor. (Lir Galat 6:7, 8.) Si enn dimounn pran letan pou reflesi lor bann konsekans limoralite, kitfwa li pa pou anvi fer sa pese-la. Me bien souvan, kan enn kikenn pe al komet limoralite, se parski li pe anvi satisfer so  prop dezir. Ek souvan, premie letap avan limoralite se pornografi.

9. Kifer pornografi danzere?

⁹ Lobzektif pornografi se pou exsit bann dezir sexiel. Azordi, partou ena pornografi: dan bann magazinn, bann liv, lamizik, televizion, ek osi lor Internet. Boukou dimounn panse ki pornografi pa fer okenn ditor, me an realite li bien danzere. Enn kikenn ki get pornografi kapav vinn obsede ar sex ek li devlop bann dezir imoral. Enn fwa ki enn kikenn koumans les li antrene ar pornografi, li kapav pran labitid pou mastirbe, gagn bann problem dan so maryaz ek mem divorse.​—Romin 1:24-27; Efezien 4:19; get Not 24.

10. Kouma prinsip ki ena dan Zak 1:14, 15 kapav ed nou pou rezet limoralite?

¹⁰ Li bien inportan ki nou konpran kouma limoralite sexiel kapav vinn atiran pou nou. Zak 1:14, 15 donn nou sa lavertisman-la: “Enn dimoun, li tante par so prop dezir ki sedwir li, e ki antrenn li dan lemal. Lerla, kan sa dezir la finn forme, li donn nesans pese, e kan pese grandi li donn lamor.” Alor, kan bann move panse vinn dan to lespri, tir zot deswit. Si enn kout koumsa to trouv bann zimaz erotik, vir to figir! Tengn to ordinater, ouswa sanz senn televizion. Pa les bann move dezir rant dan to leker. Sinon, to bann move dezir kapav vinn telman for ki li pou vinn bien difisil pou to kontrol zot.​—Lir Matie 5:29, 30, NW.

11. Kouma Zeova kapav ed nou kan nou ena bann move panse?

 ¹¹ Zeova konn nou pli bien ki noumem. Li kone ki nou inparfe. Me Li kone osi ki nou kapav rezet nou bann move dezir. Zeova dir nou: “Alor detrir net bann manb zot lekor ki lor later, konsernan limoralite sexiel, linpirte, bann dezir sexiel ki pa kontrole, bann dezir ki fer ditor, ek bann lanvi exazere, ki enn idolatri.” (Kolosien 3:5, NW) Mem si li pa fasil pou lit kont nou bann move dezir, Zeova ena pasians avek nou ek Li pou ed nou. (Psom 68:19) Anou pran lexanp enn zenn frer ki ti ena labitid pou get pornografi ek mastirbe. Pou so bann kamarad lekol, li ti normal pou fer sa bann kitsoz-la amezir ki zot pe grandi. Me zenn frer-la ti dir: “Sa ti fer mo konsians vinn insansib ek mo ti koumans viv enn lavi imoral.” Li ti konpran ki li ti bizin kontrol so bann dezir.  Avek led Zeova, li ti reisi lit kont sa bann move labitid-la. Si to ena bann panse imoral, demann Zeova “pwisans ki plis ki seki normal” pou ed twa gard to bann panse prop.​—2 Korintien 4:7, NW; 1 Korintien 9:27.

12. Kifer nou bizin ‘protez nou leker’?

¹² Salomon ti ekrir: “Plis ki tou kitsoz ki to bizin proteze, protez to leker, parski ladan mem ki bann lasours lavi sorti.” (Proverb 4:23) Nou “leker,” se seki nou vremem ete andan, ek se samem ki Zeova trouve. Bann kitsoz ki nou gete kapav ena enn gran linflians lor nou. Zob, enn fidel serviter Bondie, ti dir: “Mo’nn fer enn lalians avek mo lizie. Alor, kouma mo kapav get enn vierz avek enn move lintansion?” (Zob 31:1) Parey kouma Zob, nou bizin fer bien atansion ar seki nou gete ek seki nou panse. Ek parey kouma sa ekrivin Psom-la, nou bizin demann Bondie: “Fer mo lizie aret get bann kitsoz ki pa vo nanye.”​—Psom 119:37, NW.

13. Ki kalite kamarad Dina ti swazir?

¹³ Nou bann kamarad kapav ena enn gran linflians lor nou, ki li dan enn bon ouswa enn move fason. Si to swazir bann kamarad ki swiv bann prinsip Bondie, zot kapav ed twa pou fer parey kouma zot. (Proverb 13:20; lir 1 Korintien 15:33, NW.) Lexanp Dina montre nou kifer li inportan ki nou swazir bien nou bann kamarad. Dina ti enn parmi bann tifi Zakob. Alor, li ti grandi dan enn fami ki ti ador Zeova. Dina pa ti enn tifi imoral, me li ti fer kamarad avek  bann tifi Kananeen, ki pa ti ador Zeova. Bann Izraelit ti ena bann bon prinsip moral, me bann Kananeen ti bien imoral. (Levitik 18:6-25) Kan Dina ti avek so bann kamarad, li ti zwenn enn zenn Kananeen ki ti apel Sishem. Sishem ti trouve ki Dina ti enn zoli tifi. Sishem ti zom “pli respektab” dan so fami. Me li pa ti kontan Zeova.​—Zenez 34:18, 19.

14. Ki ti ariv Dina?

¹⁴ Sishem ti fer enn kitsoz ki ti normal ek akseptab pou li. Li ti trouve ki Dina ti enn zoli tifi, alor li “ti pran li ek ti viol li.” (Lir Zenez 34:1-4.) Sishem ti fer enn kitsoz bien grav. Sa pese-la ti kree bann sitiasion ki ti fer Dina ek so fami bien soufer.​—Zenez 34:7, 25-31; Galat 6:7, 8.

15, 16. Kouma nou kapav gagn sazes?

¹⁵ Nou pa bizin fer bann mem erer ki Dina pou nou konpran ki bann prinsip Zeova bon pou nou. “Enn kikenn ki mars avek bann dimounn ki ena lasazes pou gagn lasazes, me enn kikenn ki gagn zafer avek bann dimounn bet, sa pou mal fini pou li.” (Proverb 13:20) Fer sa vinn to lobzektif pou konpran “semin ki amenn ver seki bon” gras-a Labib. Lerla, to pa pou gagn bann soufrans initil.​—Proverb 2:6-9; Psom 1:1-3.

¹⁶ Nou kapav gagn sazes kan nou etidie Labib, priye Zeova avan ki nou pran enn desizion, ek swiv bann bon konsey lesklav fidel ek saz. (Matie 24:45, NW; Zak 1:5) Biensir, nou tou nou feb ek inparfe. (Zeremi 17:9) Me kouma to pou reazir si enn kikenn averti twa ki to dan enn sitiasion kot to riske komet  limoralite? Eski to pou ofanse? Ouswa eski to pou aksepte so led avek limilite?​—2 Lerwa 22:18, 19.

17. Donn enn lexanp ki montre kouma konsey enn lot Kretien kapav ed nou.

¹⁷ Anou pran enn lexanp. Dan so travay, enn ser ena enn koleg ki pe koumans fer so letour ek invit li pou dine. Misie-la pa servi Zeova, me li paret bien zanti. Enn lot ser trouv zot ansam ek plitar li esey averti sa ser-la. Kouma ser-la pou reazir? Eski li pou dir ki li kone seki li pe fer, ouswa eski li pou trouv sazes ki ena dan sa konsey-la? Kitfwa ser-la kontan Zeova ek li anvi fer seki bon. Me si li kontign sorti avek sa misie-la, eski li pe “sove devan limoralite sexiel” ouswa eski li pe fer “konfians dan so prop leker”?​—Proverb 22:3; 28:26; Matie 6:13; 26:41.

18, 19. Kouma Zozef ti sove devan limoralite, ek ki kitsoz ti ed li fer sa?

¹⁸ Kan Zozef ti zenn, li ti enn esklav dan Lezip. Toulezour, madam so met ti demann li pou gagn relasion avek li. Me Zozef ti kone ki sa ti enn move kitsoz. Zozef ti kontan Zeova ek li ti anvi fer Li plezir. Alor, sak fwa ki madam-la ti esey sedwir li, Zozef ti refize. Akoz li ti enn esklav, li pa ti kapav kit lakaz so met. Enn zour, kan madam so met ti esey fors li pou gagn relasion avek li, Zozef “ti sove ek ti al deor.”​—Lir Zenez 39:7-12.

¹⁹ Sa sitiasion-la ti kapav mal fini si Zozef ti abitie pans bann kitsoz imoral, ouswa si li ti pas so letan mazinn bann kitsoz imoral ki li ek sa madam-la ti kapav fer. Me kitsoz ki ti pli inportan pou Zozef, se so relasion avek Zeova. Li ti dir madam-la: “Mo met . . . pa finn refiz mwa nanye, apart twa, parski to so fam. Alor, kouma mo kapav fer enn move kitsoz koumsa ek vremem fer pese kont Bondie?”​—Zenez 39:8, 9.

20. Kouma nou kone ki Zeova ti kontan Zozef?

²⁰ Mem si Zozef ti lwin ar so fami ek so lakaz, li ti touletan res fidel ar Bondie, ek Zeova ti beni li. (Zenez 41:39-49) Zeova ti bien kontan fidelite Zozef. (Proverb 27:11) Li kapav bien difisil pou reziste kont limoralite. Me rapel sa bann parol-la: “Zot ki kontan Zeova, zot bizin ena laenn pou seki move. Li protez lavi so bann fidel; Li sap zot dan lame bann move dimounn.”​—Psom 97:10, NW.

21. Kouma enn zenn frer ti imit Zozef?

²¹ Avek kouraz, toulezour bann serviter Zeova montre  ki zot “ena laenn pou seki move” ek ki zot “kontan seki bon.” (Amos 5:15) Ninport ki laz to ena, to kapav res fidel ar Zeova. Anou get lexanp enn zenn frer ki ti pas par enn sitiasion dan lekol ki ti teste so lafwa. Enn tifi ti dir li ki li pou gagn relasion sexiel ar li si frer-la ed li pou enn test matematik. Ki sa frer-la ti fer? Li ti fer parey kouma Zozef. Li explike: “Deswit mo ti refize. Kan mo’nn res fidel, mo’nn gard mo dignite ek respe pou momem.” Enn kikenn ki pratik limoralite “fer so leker kontan par plezir pese.” Me sa plezir-la zis pou enn ti moman ek bien souvan li amenn soufrans ek enn leker kase. (Ebre 11:25) Parkont, obeir Zeova pou rann nou ere pou touletan.​—Proverb 10:22.

22, 23. Kouma Zeova kapav ed nou mem si nou’nn fer enn pese grav?

²² Satan pou esey servi limoralite sexiel pou fer nou tonbe. Li kapav bien difisil pou reziste sa tantasion-la. Kitfwa nou tou nou ena bann move panse detanzantan. (Romin 7:21-25) Zeova konpran ek Li “kone ki nou sorti dan lapousier.” (Psom 103:14) Alor, ki pou arive si enn Kretien komet limoralite sexiel? Eski pena okenn lespwar pou li? Si li vremem repanti, Zeova pou ed li. Bondie “dispoze pou pardone.”​—Psom 86:5, NW; Zak 5:16; lir Proverb 28:13.

²³ Zeova inn osi donn nou “bann zom kouma bann don,” setadir bann ansien ki kontan nou ek pran nou swin. (Efezien 4:8, 12, NW; Zak 5:14, 15, NW) Li’nn donn nou bann ansien pou ed nou retabli nou relasion avek Li.​—Proverb 15:32.

24, 25. Kouma “bon sans” kapav ed nou pou rezet limoralite?

²⁴ Pou nou pran bann bon desizion, nou bizin konpran ki bann lalwa Zeova zot bon pou nou. Nou pa anvi resanble sa zenn zom ki mansione dan Proverb 7:6-23. Li pa ti ena “bon sans,” akoz sa li ti tom dan piez limoralite sexiel. Ena bon sans, se pa zis ena lintelizans. Kan nou ena bon sans, nou esey konpran fason panse Bondie ek aplik sa dan nou lavi. Rapel sa bann parol ranpli ar sazes la: “Enn kikenn ki kiltiv bon sans kontan limem. Enn kikenn ki akord boukou valer disernman pou reisi.”​—Proverb 19:8.

²⁵ Eski to vremem sir ki bann prinsip Zeova zot bon? Eski to vremem krwar ki si to swiv bann prinsip Zeova, to pou ere? (Psom 19:7-10; Izai 48:17, 18) Si to ankor ena bann dout, mazinn tou bann bon kitsoz ki Zeova inn fer pou twa. “Goute e gete konbien LESEGNER [“Zeova,” NW] li bon.” (Psom 34:8) Plis to medit lor seki Zeova inn fer pou twa, plis to lamour pou Li pou grandi. Kontan seki Zeova kontan, ek deteste seki Li deteste. Nouri to lespri avek bann bon panse, bann kitsoz ki vre, ki zis, ki prop, ki merite ki nou kontan zot, ek ki bon moralman. (Filipien 4:8, 9, NW) Lerla, nou pou vinn kouma Zozef, ki ti gagn bann bienfe gras-a sazes Zeova.​—Izai 64:8.

26. Ki nou pou gete dan de prosin sapit?

²⁶ Ki to marye ouswa selibater, Zeova anvi ki to ere dan to lavi. De prosin sapit pou donn nou bann konsey pou nou kapav reisi nou lavi maryaz.