SAPIT 6
Kouma Swazir Nou Bann Divertisman
“Fer tou pou laglwar Bondie.”—1 KORINTIEN 10:31, NW.
1, 2. Kifer nou bizin fer bien atansion kan nou swazir nou bann divertisman?
MAZINE ki to pe al manz enn frwi, zis kouma to pe fer sa, to remarke ki enn bout dan frwi-la gate. Ki to pou fer? Eski to pou manz frwi-la kanmem? Eski to pou zet li? Ouswa eski to pou koup sa bout ki gate-la ek manz parti ki bon-la?
2 Bann divertisman inpe parey kouma sa frwi-la. Sertin divertisman kapav bon, me laplipar zot pouri parski zot ranpli ar limoralite, laviolans, ouswa bann kitsoz demoniak. Alor, kan to swazir enn divertisman, eski to dir: “Se mwa ki deside. Mo kapav swazir seki mo anvi”? Ouswa eski to dir: “Tou bann divertisman pa bon”? Ouswa eski to swazir bien to bann divertisman, to rezet seki pa bon ek swazir seki bon?
3. Lor ki kitsoz nou bizin reflesi kan nou swazir nou bann divertisman?
3 Nou tou nou bizin rilax ek amize inpe, me nou bizin bien swazir nou bann divertisman. Alor, nou bizin demann noumem: “Bann divertisman ki mo swazir, ki lefe zot ena lor mo ladorasion pou Zeova?”
“FER TOU POU LAGLWAR BONDIE”
4. Ki prinsip Labib kapav ed nou pou swazir nou bann divertisman?
4 Kan nou vwe nou ar Zeova, nou promet Li ki nou pou servi nou lavi pou fer So volonte. (Lir Ekleziast 5:4.) Nou promet ki nou pou “fer tou pou laglwar Bondie.” (1 Korintien 10:31, NW) Savedir ki sa ve ki nou’nn fer ar Zeova la, li pa valab zis kan nou dan renion ouswa predikasion, me osi dan bann moman kot nou pe rilax ek amize.
5. Ki kalite ladorasion nou bizin donn Zeova?
5 Dan nou lavi, tou seki nou fer ena enn lefe lor nou ladorasion pou Zeova. Pol ti explik sa kan li ti dir: “Ofer zotmem kouma bann sakrifis vivan, sin e agreab” pou Bondie. (Romin 12:1) Zezi ti dir: “To pou kontan Lesegner [“Zeova,” NW] to Bondie avek tou to leker, tou to lam, tou to lespri ek tou to lafors.” (Mark 12:30) Nou touletan anvi fer nou best pou Zeova. Dan lepase, kan enn Izraelit ti sakrifie enn zanimo pou Zeova, li ti bizin donn enn zanimo ki pa ti malad. Si zanimo-la ti malad, Bondie pa ti aksepte sakrifis-la. (Levitik 22:18-20) Dan mem fason, li kapav arive ki Zeova pa aksepte nou ladorasion. Kouma?
6, 7. Kouma nou bann divertisman kapav afekte nou ladorasion pou Zeova?
6 Zeova dir nou: “Zot bizin sin parski mo sin.” (1 Pier 1:14-16; 2 Pier 3:11) Zeova pou aksepte nou ladorasion zis si li sin, ouswa san tas. (Deteronom 15:21) Nou ladorasion pa pou sin si nou fer bann kitsoz ki Zeova deteste, kouma limoralite, laviolans, ouswa bann kitsoz demoniak. (Romin 6:12-14, NW; 8:13) Zeova pa pou kontan osi si nou aksepte sa bann kitsoz-la dan nou bann divertisman. Sa pou fer nou ladorasion vinn inpir ek Zeova pa pou aksepte li. Sa kapav osi detrir nou relasion avek Zeova.
7 Kouma nou kapav swazir nou bann divertisman avek sazes? Ki bann prinsip pou ed nou pou kone si enn divertisman li akseptab ouswa non?
DETESTE SEKI MOVE
8, 9. Ki kalite divertisman nou bizin rezete? Kifer?
8 Azordi, ena tou kalite divertisman. Sertin akseptab pou bann Kretien, me boukou pa akseptab. Pou koumanse, anou gete ki kalite divertisman nou bizin rezete.
9 Dan boukou fim, sit Internet, program televizion, video game, ek sante, ena limoralite, laviolans, ek bann kitsoz demoniak. Ek bien souvan, zot fer krwar ki bann move kitsoz ki zot prezante, pa danzere ek mem komik. Me bann Kretien fer bien atansion ek zot rezet bann divertisman ki pa an-akor avek bann prinsip Zeova ki sin. (Zistwar Bann Apot 15:28, 29; 1 Korintien 6:9, 10) Kan nou rezet sa bann kalite divertisman-la, nou montre Zeova ki nou ena laenn pou seki move.—Psom 34:14; Romin 12:9.
10. Ki kapav arive si nou swazir bann move divertisman?
10 Sertin panse ki bann divertisman kot ena laviolans, limoralite, ouswa bann kitsoz demoniak, zot pa move. Zot dir: ‘Ki pa bon ladan? Zame mo pa pou fer sa bann kitsoz-la mwa.’ Si nou pans koumsa, nou pe anbet noumem. Labib dir: “Leker pli tret ki ninport ki lezot kitsoz ek li bien move.” (Zeremi 17:9) Si nou aksepte bann divertisman ki Zeova pa kontan, kouma nou kapav dir ki nou deteste sa bann kitsoz-la? Plis nou aksepte sa bann divertisman-la, plis nou pou koumans panse ki sa bann kitsoz-la normal. Avek letan, nou konsians pou vinn feb ek li pou aret averti nou kan nou pe al fer enn move swa.—Psom 119:70, NW; 1 Timote 4:1, 2.
11. Kouma Galat 6:7 kapav ed nou pou swazir nou bann divertisman?
11 Labib dir: “Enn dimoun li rekolte seki li finn seme.” (Galat 6:7) An realite, si nou aksepte bann divertisman ki pa bon, avek letan, li kapav arive ki nou fer sa bann move kitsoz-la. Par exanp, sertin Kretien ki ti kontign get bann kitsoz imoral, avek letan, zotmem finn pratik limoralite. Me Zeova ed nou pou swazir nou bann divertisman avek sazes.
SERVI BANN PRINSIP LABIB POU PRAN BANN DESIZION
12. Kan nou bizin swazir nou bann divertisman, ki kitsoz pou ed nou pran bann bon desizion?
12 Li kler ki ena sertin divertisman ki Zeova pa aksepte, ek nou kone ki nou bizin rezet zot. Me ki nou pou fer si nou pa tro sir? Zeova pa donn nou enn lalis bann kitsoz ki nou kapav ouswa pa kapav gete, ekoute, ouswa lir. Parkont, Li anvi ki nou servi nou konsians ki forme par Labib. (Lir Galat 6:5.) Zeova donn nou bann prinsip ki explik nou So fason panse. Sa bann prinsip-la ed nou pou form nou konsians. Zot ed nou pou konn ‘volonte Zeova’ pou ki nou kapav pran bann desizion ki fer Li plezir.—Efezien 5:17.
Bann prinsip Labib ed nou swazir nou bann divertisman
13. Konsernan bann divertisman, kifer bann Kretien pa pran mem desizion? Me ki kitsoz pli inportan pou tou bann Kretien?
13 Bien souvan, sak Kretien swazir so prop divertisman. Kifer? Parski nou pa kontan mem kitsoz. Ek seki akseptab pou sertin, kitfwa pa akseptab pou lezot. Me kanmem sa, sak Kretien bizin swiv bann prinsip Labib pou ki li reisi pran bann bon desizion. (Filipien 1:9) Sa bann prinsip-la pou ed nou swazir bann divertisman ki Bondie aksepte.—Psom 119:11, 129; 1 Pier 2:16.
14. (a) Konsernan nou letan, lor ki kitsoz nou bizin fer bien atansion? (b) Ki konsey Pol ti donn bann Kretien?
14 Nou bizin osi fer atansion ar kantite letan ki nou pase dan bann divertisman. Kifer? Parski sa pou montre ki linportans bann divertisman ena pou nou. Antan ki Kretien, nou servis pou Zeova samem kitsoz pli inportan dan nou lavi. (Lir Matie 6:33, NW.) Me san ki nou rann nou kont, nou kapav pas tro boukou letan dan bann divertisman. Pol ti donn bann Kretien sa lavertisman-la: “Fer bien atansion ki zot kondwit pa parey kouma bann dimounn ki pena okenn sazes, me plito kouma bann dimounn ki ena sazes, servi zot letan dan meyer fason posib.” (Efezien 5:15, 16, NW) Alor, nou bizin fixe bann limit lor kantite letan ki nou pase dan bann divertisman. Nou bizin touletan fer nou servis pou Zeova pas an premie dan nou lavi.—Filipien 1:10, NW.
15. Kouma nou kapav protez noumem kont bann divertisman ki kapav gat nou relasion avek Zeova?
15 Nou kone ki Zeova pa kontan sertin divertisman, ek li kler ki nou bizin rezet zot. Me ki nou pou fer si nou ena bann dout lor sertin divertisman? Eski nou bizin kanmem fer atansion? Mazine ki to lor enn montagn ek ki ena enn falez akote twa, eski to pou mars pli pre posib ar bor sa falez-la? Non. Si to kontan to lavi, to pou res lwin ar sa danze-la. Li parey kan nou swazir nou bann divertisman. Parol Bondie dir nou: “Fer to lipie res lwin ar seki move.” (Proverb 4:25-27) Alor, kan nou sir ki enn divertisman pa bon, nou bizin rezet li. Me nou bizin osi res lwin ar bann divertisman ki kitfwa pa paret bon ek ki kapav gat nou relasion avek Zeova.
KONTIGN ROD KONN PANSE ZEOVA
16. (a) Sit sertin kitsoz ki Zeova deteste. (b) Kouma nou kapav montre ki nou deteste seki Zeova deteste?
16 Enn ekrivin Psom ti ekrir: “Zot ki kontan Zeova, zot bizin ena laenn pou seki move.” (Psom 97:10, NW) Labib ansegn nou seki Zeova panse ek resanti. Demann tomem: “Kouma seki mo pe aprann kapav ed mwa pou ena mem fason panse ki Zeova?” Par exanp, Labib dir nou ki Zeova deteste “enn lalang ki koz manti ek bann lame ki vers disan inosan, enn leker ki manigans bann proze ki fer ditor, bann lipie ki galoupe pou al fer seki pa bon.” (Proverb 6:16-19) Li dir nou osi ki nou bizin rezet “limoralite, . . . lidolatri, sorselri, . . . zalouzi, koler, . . . lanvi, soulezon, fiesta [“bann fet kot pena okenn kontrol,” NW]” ek bann lezot kitsoz ki parey koumsa. (Galat 5:19-21) Eski to trouve kouma sa bann prinsip-la kapav ed twa pou swazir to bann divertisman? Nou anvi swiv bann prinsip Zeova dan tou domenn nou lavi, mem kan nou tousel ouswa kan nou avek lezot. (2 Korintien 3:18) An realite, bann swa ki nou fer kan nou tousel montre ki kalite dimounn nou ete vremem.—Psom 11:4; 16:8.
17. Avan ki nou swazir nou bann divertisman, ki bann kestion nou bizin demann noumem?
17 Alor, kan to swazir to bann divertisman, demann tomem: ‘Ki lefe sa pou ena lor mo relasion avek Zeova? Ki lefe sa pou ena lor mo konsians?’ Anou get bann lezot prinsip ki kapav ed nou kan nou swazir bann divertisman.
18, 19. (a) Ki konsey Pol ti donn bann Kretien? (b) Sit bann prinsip ki pou ed nou swazir nou bann divertisman.
18 Kan nou swazir nou bann divertisman, nou pe swazir seki nou pe met dan nou lespri. Pol ti ekrir: “Tou kitsoz ki vre, tou kitsoz ki serye, tou kitsoz ki drwat, tou kitsoz ki san tas, tou kitsoz ki merite ki nou kontan zot, tou kitsoz ki dimounn koz an bien, tou kitsoz ki bon lor plan moral ek ki merit gagn loner, kontign pran bien kont sa bann kitsoz-la.” (Filipien 4:8, NW) Kan nou ranpli nou lespri ar bann bon kitsoz koumsa, nou kapav dir: “Fer ki parol mo labous e meditasion mo leker zot akseptab devan twa, O SEGNER [“Zeova,” NW].”—Psom 19:14.
19 Demann tomem: ‘Ki kitsoz mo pe met dan mo lespri? Apre ki mo’nn get enn fim ouswa enn program televizion, eski mo ena bann bon panse ki fer mwa dibien? Eski mo santi mwa anpe, ek mo ena enn bon konsians? (Efezien 5:5; 1 Timote 1:5, 19) Eski mo santi mwa alez pou priye Zeova? Ouswa eski mo santi mwa koupab? Eski sa divertisman-la fer mwa ena bann panse ki violan ouswa imoral? (Matie 12:33; Mark 7:20-23) Eski mo pe “rant dan moul sa lemonn la” akoz bann divertisman ki mo swazir?’ (Romin 12:2) Si nou reponn sa bann kestion-la dan enn fason onet, sa pou ed nou trouve ki kitsoz nou bizin fer pou gard enn lamitie solid avek Zeova. Nou anvi priye parey kouma sa ekrivin Psom-la: “Fer mo lizie aret get bann kitsoz ki pa vo nanye.” *—Psom 119:37, NW.
NOU BANN DESIZION ENA ENN LEFE LOR LEZOT
20, 21. Kan nou pe swazir nou bann divertisman, kifer nou bizin pran kont santiman lezot?
20 Ena enn lot prinsip inportan ki fode pa nou bliye: “Nou gagn drwa fer tou kitsoz, me pa tou kitsoz ki ankourazan. Ki sakenn kontign rod lintere so kamarad, pa so prop lintere.” (1 Korintien 10:23, 24, NW) Se pa parski nou lib pou fer enn kitsoz ki nou oblize fer li. Nou bann desizion kapav ena enn lefe lor nou bann frer ek ser. Alor, nou bizin bien reflesi avan ki nou pran enn desizion.
21 Tou dimounn zot konsians pa parey. Par exanp, to konsians kapav permet twa get enn program televizion. Me apre, to aprann ki sa program-la sok konsians enn to bann frer. Ki to pou fer? Mem si to ena drwa get sa program-la, kitfwa to pou deside pou pa get li. Kifer? Parski to pa anvi ‘fer pese kont to bann frer,’ ni “fer pese kont Lekris.” (1 Korintien 8:12) Nou pa anvi fer nanye ki pou fer nou bann frer ek ser tonbe.—Romin 14:1, NW; 15:1; 1 Korintien 10:32, NW.
22. Kouma nou kapav montre ki nou rezonab kan twa ek enn lot Kretien pena mem lopinion lor seki akseptab ouswa non?
22 Mazine asterla ki to konsians pa permet twa pou lir, get, ouswa fer enn kitsoz ki enn lot Kretien aksepte. Akoz to kontan to frer ek to ena respe pou li, to pa pou met presion lor li pou swazir parey kouma twa. Si to enn sofer, to kone ki pa tou sofer roul mem vites. Mem si sertin roul pli vit ek ki lezot roul pli dousman, sa pa vedir ki zot bann move sofer. Dan mem fason, twa ek enn lot frer ki pe swiv bann prinsip Labib, zot kapav ena bann lopinion ki inpe diferan lor bann divertisman ki akseptab ouswa non.—Ekleziast 7:16; Filipien 4:5, NW.
23. Ki pou ed nou pou swazir bien nou bann divertisman?
23 Alor, ki pou ed nou pou swazir bien nou bann divertisman? Kan nou ekout nou konsians ki forme par bann prinsip Labib ek ki nou pran kont santiman nou bann frer ek ser, nou pou fer bann bon swa. Lerla, nou pou ere parski nou pe fer “tou pou laglwar Bondie.”
^ Ena lezot prinsip ki kapav ed twa pou swazir to bann divertisman. To kapav trouv zot dan Proverb 3:31; 13:20; Efezien 5:3, 4; ek Kolosien 3:5, 8, 20.