1-3. (a) Ki nou aprann dan Proverb 13:20? (b) Kifer nou bizin swazir bien nou bann kamarad?

 ESKI to finn deza remarke kouma enn ti-baba get so bann paran? Avan mem ki li koumans koze, li kapte tou seki li trouve ek tande. Amezir ki li grandi, li koumans imit so bann paran san fer expre. Alor, li pa etonan ki bann adilt osi koumans pans ek azir parey kouma bann dimounn avek ki zot pas boukou letan.

² Proverb 13:20 dir: “Enn kikenn ki mars avek bann dimounn ki ena lasazes pou gagn lasazes.” Dan sa verse-la, lexpresion “mars avek” enn kikenn inplik ki nou swazir pou pas letan avek li. Sa pa vedir ki nou zis ansam avek li. Dapre enn spesialis Labib, mars avek enn kikenn vedir kontan sa dimounn-la ek ena enn relasion bien pros avek li. Bann ki ena enn pli gran linflians lor nou, se bann dimounn avek ki nou pas boukou letan, sirtou si nou santi nou bien pros ar zot.

³ Nou bann kamarad kapav ena enn bon linflians ouswa enn move linflians lor nou. Proverb 13:20  azoute: “Enn kikenn ki gagn zafer avek bann dimounn bet, sa pou mal fini pou li.” Dan langaz Ebre, “gagn zafer avek” enn kikenn kapav tradir par “fer kamarad” avek li. (Proverb 22:24; Ziz 14:20) Bann kamarad ki kontan Bondie pou ankouraz nou pou res fidel ar Li. Pou ed nou swazir bien nou bann kamarad, anou gete ki kalite dimounn Zeova swazir kouma so kamarad.

4. Kifer li enn gran loner pou vinn kamarad Bondie? Kifer Zeova ti apel Abraam “mo kamarad”?

⁴ Zeova, Souverin Liniver, donn nou posibilite pou vinn so kamarad. Se vremem enn gran loner! Zeova pa swazir ninport kisannla pou vinn so kamarad. Li swazir bann dimounn ki kontan Li ek ki ena lafwa an Li. Mazinn lexanp Abraam. Li ti pre pou fer tou seki Bondie ti demann li. Toutlong so lavi, Abraam ti res fidel ek obeisan. Li ti mem pre pou sakrifie so garson Izaak. Abraam ti sir ki “Bondie kapav redonn lavi dimoun ki finn mor.” (Ebre 11:17-19; Zenez 22:1, 2, 9-13) Parski Abraam ti fidel ek obeisan, Zeova ti apel li “mo kamarad.”​—Izai 41:8; Zak 2:21-23.

5. Kouma Zeova konsider bann dimounn ki fidel anver Li?

⁵ Pou Zeova, so bann kamarad ena enn gran valer. Ek seki pli inportan pou zot, se pou res fidel ar Li. (Lir 2 Samiel 22:26.) Zot fidel ek obeisan parski zot kontan Li. Labib dir ki Bondie, Li “enn kamarad bien pros avek bann dimounn ki drwat,” setadir bann dimounn ki obeir Li. (Proverb 3:32) Zeova invit  so bann kamarad pou vinn dan so “latant” kouma bann invite spesial. Li ankouraz zot pou ador Li ek pou priye Li ninport kan.​—Psom 15:1-5, NW.

6. Kouma nou kapav montre ki nou kontan Zezi?

⁶ Zezi ti dir: “Si vremem kikenn kontan mwa, li pou met mo parol anpratik, mo Papa pou kontan Li.” (Zan 14:23) Alor, pou vinn kamarad Zeova, nou bizin kontan Zezi osi ek fer tou seki li’nn ansegn nou. Par exanp, nou obeir lord ki Zezi inn donn nou pou pres bonn nouvel ek pou fer bann disip. (Matie 28:19, 20; Zan 14:15, 21) Ek parski nou kontan Zezi, nou “swiv bien so tras.” (1 Pier 2:21, NW) Zeova bien kontan kan li trouv nou fer nou maximum pou imit so Garson dan tou seki nou dir ek fer.

7. Kifer nou bizin fer sir ki nou bann kamarad zot kamarad Zeova osi?

⁷ Bann kamarad Zeova zot fidel, obeisan, ek zot kontan so Garson. Kan nou swazir bann kamarad, eski nou swazir parey kouma Zeova? Si to bann kamarad imit Zezi ek ki zot bien okipe dan travay predikasion, zot kapav ed twa pou vinn enn pli bon dimounn ek pou res fidel ar Zeova.

8. Ki kitsoz to apresie ar lamitie ki ti ena ant Rut ek Noemi?

⁸ Dan Labib, nou trouv boukou lexanp lor lamitie, kouma lamitie ki ti ena ant Rut ek so belmer Noemi. Sa de madam-la ti sorti dan de pei diferan ek zot pa ti ena mem kiltir. Anplis, Noemi ti boukou pli vie ki Rut. Me zot ti vinn bann bon kamarad parski toulede ti kontan Zeova. Kan Noemi ti anvi kit pei  Moab ek retourn dan Izrael, “Rut ti res avek li.” Rut ti dir Noemi: “To pep pou vinn mo pep, ek to Bondie, mo Bondie.” (Rut 1:14, 16) Rut ti bien zanti avek Noemi. Kan zot ti ariv dan Izrael, Rut ti travay bien dir pou okip so kamarad. Noemi ti bien kontan Rut ek li ti donn li bann bon konsey. Rut ti ekout so bann konsey, ek zot toulede ti gagn boukou benediksion.​—Rut 3:6.

9. Ki kitsoz inpresionn twa dan lamitie ki ti ena ant David ek Zonatan?

⁹ Enn lot bon lexanp lamitie se David ek Zonatan. Toulede ti fidel ar Zeova. Zonatan ti apepre 30 an pli gran ki David, ek li ti bizin vinn prosin lerwa lor Izrael. (1 Samiel 17:33; 31:2; 2 Samiel 5:4) Selman, kan li ti aprann ki Zeova ti swazir David pou vinn lerwa, Zonatan pa ti zalou ek li pa ti rod pran plas David. Okontrer, Zonatan ti fer tou seki li ti kapav pou soutenir David. Par exanp, kan David ti an danze, Zonatan ti ed li “pou ena plis konfians an Zeova.” Li ti mem riske so lavi pou David. (1 Samiel 23:16, 17) David osi ti enn kamarad bien fidel. Li ti promet Zonatan ki li ti pou pran swin so fami, ek li ti tini so promes mem apre lamor Zonatan.​—1 Samiel 18:1; 20:15-17, 30-34; 2 Samiel 9:1-7.

10. Ki bon lexanp sa trwa zenn Ebre la inn donn nou konsernan lamitie?

¹⁰ Shadrak, Meshak, ek Abed-Nego ti trwa zenn Ebre ek zot ti kamarad. Zot ti ankor zanfan kan ti fors zot kit zot lakaz ek ti amenn zot dan Babilonn. Akoz zot ti lwin ar zot fami, zot ti ed sakenn zot kamarad pou res fidel ar Zeova. Plitar, kan zot ti vinn  gran, enn leprev ti teste zot lafwa. Lerwa Naboukodonozor ti donn zot lord pou ador enn stati an-or. Shadrak, Meshak, ek Abed-Nego ti refiz ador sa stati-la ek zot ti dir lerwa: “Nou pa pou servi to bann bondie ouswa ador sa stati an-or ki to’nn aranze la.” Dan sa leprev ki ti teste zot lafwa la, sa trwa kamarad-la ti res fidel ar zot Bondie.​—Daniel 1:1-17; 3:12, 16-28.

11. Kouma nou kone ki Pol ek Timote ti bann bon kamarad?

¹¹ Kan lapot Pol ti fer konesans Timote, Timote ti ankor zenn. Pol ti trouve ki Timote ti kontan Zeova ek ki li ti vremem pran swin bann frer ek ser. Alor, Pol ti form Timote pou ed bann frer ek ser ki ti dan diferan lasanble. (Zistwar Bann Apot 16:1-8, NW; 17:10-14, NW) Timote ti travay telman dir ki Pol ti dir: “Li ti travay kouma enn esklav avek mwa pou fer bonn nouvel progrese.” Pol ti kone ki Timote ti pou “vremem pran kont” bann frer ek ser. Amezir ki zot ti travay dir ansam pou servi Zeova, Pol ek Timote ti vinn bann bon kamarad.​—Filipien 2:20-22, NW; 1 Korintien 4:17, NW.

12, 13. (a) Kifer nou bizin fer bien atansion kan nou swazir nou bann kamarad, mem dan lasanble? (b) Kifer lapot Pol ti donn lavertisman ki ena dan 1 Korintien 15:33?

¹² Dan lasanble, nou kapav aprann boukou kitsoz ar nou bann frer ek ser, ek sakenn kapav ed so kamarad pou res fidel ar Zeova. (Lir Romin 1:11, 12, NW.) Me mem dan lasanble, nou bizin get bien kisannla nou swazir pou vinn nou bann bon kamarad. Nou  ena bann frer ek ser ki sorti dan diferan kiltir ek lanvironnman. Sertin nouvo dan lasanble, ek lezot pe servi Zeova depi bien-bien lontan. Parey kouma enn frwi pran letan pou mir, relasion ki enn kikenn ena avek Zeova pran letan pou grandi. Alor, nou bizin ena pasians ek lamour anver lezot, ek nou bizin touletan swazir nou bann kamarad avek sazes.​—Romin 14:1, NW; 15:1; Ebre 5:12–6:3, NW.

¹³ Parfwa, enn sitiasion bien grav kapav arive dan lasanble, ek nou pou bizin fer bien atansion. Kitfwa  enn frer ouswa enn ser pe fer bann kitsoz ki Labib kondane. Ouswa enn kikenn kapav devlop enn tandans pou kritik lezot, ek sa kapav fer boukou ditor dan lasanble. Me fode pa ki sa etonn nou, parski mem dan premie siek, parfwa ti ena bann problem dan lasanble. Se pou sa rezon-la ki lapot Pol ti averti bann Kretien sa lepok-la: “Pa anbet zotmem. Bann move frekantasion gat bann bon labitid.” (1 Korintien 15:12, 33, NW) Pol ti osi dir Timote fer bien atansion kisannla li swazir kouma so bann bon kamarad. Azordi, nou osi nou bizin fer bien atansion.​—Lir 2 Timote 2:20-22, NW.

14. Kouma bann kamarad ki nou swazir kapav ena enn lefe lor nou relasion avek Zeova?

¹⁴ Nou relasion avek Zeova, samem kitsoz ki ena plis valer pou nou ek nou bizin protez li. Alor, fode pa ki nou vinn bann kamarad pros ar bann dimounn ki kapav fer nou lafwa vinn feb ek gat nou relasion avek Zeova. Par exanp, kan nou tranp enn leponz dan vineg, nou pa kapav atann ki li absorb delo. Li parey osi pou bann kamarad ki nou frekante. Si nou ena bann kamarad ki fer bann move kitsoz, nou pa kapav atann ki li pou fasil pou nou fer bann bon kitsoz. Nou bizin swazir bien nou bann bon kamarad.​—1 Korintien 5:6; 2 Tesalonisien 3:6, 7, 14, NW.

15. Pou ki to ena bann bon kamarad dan lasanble, ki to kapav fer?

¹⁵ Dan lasanble, to pou trouve ki ena bann dimounn ki vremem kontan Zeova. Zot kapav vinn to bann bon kamarad. (Psom 133:1) Pa rod fer  kamarad zis ar bann dimounn ki ena mem laz ki twa, ouswa ki sorti dan mem kiltir ki twa. Pa bliye ki Zonatan ti boukou pli gran ki David, ek ki Rut ti boukou pli zenn ki Noemi. Nou anvi swiv sa konsey Labib la: “Ouver zot leker bien gran.” (2 Korintien 6:13, NW; lir 1 Pier 2:17, NW.) Plis to imit Zeova, plis lezot pou anvi vinn to kamarad.

16, 17. Si enn kikenn dan lasanble inn desevwar nou, ki kitsoz fode pa nou fer?

¹⁶ Dan enn fami, sakenn ena so personalite, so lopinion, ek so fason fer bann kitsoz. Li parey osi dan enn lasanble. Sa bann diferans-la rann lavi pli interesan, ek sakenn kapav aprann boukou ar so kamarad. Me parfwa, akoz nou bann diferans, nou kapav mal konpran nou bann frer ek ser, ek sa kapav agas nou. Parfwa, nou kapav ofanse ouswa santi nou blese. (Proverb 12:18) Eski nou pou les sa bann problem-la dekouraz nou, ouswa fer nou aret frekant lasanble?

¹⁷ Non. Mem si enn kikenn inn desevwar nou, nou bizin kontign frekant lasanble. Se pa Zeova ki’nn ofans nou. Li’nn donn nou lavi ek osi tou lezot kitsoz. Alor, Zeova merite ki nou kontan Li ek ki nou res fidel anver Li. (Revelasion 4:11) Nou lasanble se enn kado ki Zeova inn donn nou ki ed nou pou gard nou lafwa bien for. (Ebre 13:17, NW) Fode zame ki nou rezet kado Zeova zis parski enn kikenn inn desevwar nou.​—Lir Psom 119:165.

18. (a) Ki kapav ed nou pou ena enn bon relasion avek nou bann frer ek ser? (b) Kifer nou bizin pardonn lezot?

 ¹⁸ Nou kontan nou bann frer ek ser, ek nou anvi ena enn bon relasion avek zot. Zeova pa atann ki nou parfe. Alor, fode pa ki nou osi nou atann ki lezot parfe. (Proverb 17:9; 1 Pier 4:8, NW) Nou tou nou fer bann erer, me lamour pou ed nou pou kontign ‘pardonn nou kamarad avek tou nou leker.’ (Kolosien 3:13, NW) Lamour pou anpes nou fer enn ti bizbiz vinn enn gro problem. Li vre ki, kan enn kikenn inn desevwar nou, li kapav difisil pou aret pans sa. Li bien fasil pou ankoler ek pou gard sa dimounn-la dan leker. Me si nou fer sa, nou pou res tris ek negatif. Parkont, kan nou pardonn enn kikenn ki’nn ofans nou, nou pou gagn lape lespri, nou pou ena linite dan lasanble, me pli inportan, nou pou ena enn bon relasion avek Zeova.​—Matie 6:14, 15; Lik 17:3, 4; Romin 14:19.

19. Dan lasanble, kan eski nou bizin aret frekant enn kikenn?

¹⁹ Dan enn fami kot ena lamour, sakenn fer so par pou ki lezot ere. Me mazine ki enn manb lafami vinn rebel. Tou dimounn dan lafami kontign fer bann zefor pou ed li, me li rezet zot led. Kitfwa li desid pou kit lakaz, ouswa kitfwa se sef fami-la ki demann li pou kit lakaz. Enn sitiasion koumsa kapav arive dan lasanble. Kitfwa enn kikenn swazir pou kontign fer bann kitsoz ki pa fer Zeova plezir ek ki kapav fer ditor lasanble. Li rezet led ki pe donn li, ek li montre par so bann aksion ki li nepli anvi fer  parti dan lasanble. Kitfwa li desid par limem pou kit lasanble, ouswa kitfwa pou bizin exkli li. Si enn sitiasion koumsa arive, Labib dir dan enn fason bien kler ki nou bizin “aret frekant” sa dimounn-la. (Lir 1 Korintien 5:11-13, NW; 2 Zan 9-11) Sa kapav bien difisil si se enn manb nou fami ouswa enn kamarad ki’nn exkli. Me dan enn sitiasion koumsa, nou fidelite ar Zeova bizin pli for ki nou fidelite ar ninport kisannla.​—Get Not 8.

20, 21. (a) Kouma dispozision ki Zeova inn pran pou exkli enn kikenn, se prev ki Li kontan nou? (b) Kifer li inportan ki nou swazir bien nou bann kamarad?

²⁰ Dispozision ki Zeova inn pran pou exkli enn kikenn, se enn prev ki Li kontan nou. Kifer? Parski sa dispozision-la protez lasanble kont bann dimounn ki pa pran kont bann prinsip Zeova. (1 Korintien 5:7; Ebre 12:15, 16, NW) Kan nou soutenir sa dispozision-la, nou montre lamour pou Zeova, pou so nom, ek pou so bann prinsip ki bien ot. (1 Pier 1:15, 16) Sa dispozision-la, li osi montre lamour anver sa kikenn ki nepli enn manb lasanble. Sa disiplinn bien ferm la kitfwa kapav ed li pou realize ki seki li pe fer pa bon ek motiv li pou sanze. Avek letan, boukou dimounn ki ti exkli inn retourn ar Zeova, ek bann manb lasanble inn bien akeyir zot avek lazwa.​—Ebre 12:11.

²¹ Dan tou domenn nou lavi, nou bann kamarad ena enn linflians lor nou. Alor, li inportan ki nou swazir zot bien. Si nou kontan bann dimounn ki Zeova kontan, nou pou antoure ar bann dimounn ki kapav ed nou pou res fidel ar Li pou touletan.