1, 2. Ki Zeova resanti kan li trouv nou fer zefor pou res onet?

 ENN zour, kan enn garson pe sorti lekol ek pe retourn so lakaz, li trouv enn portfey ranpli ar kas lor semin. Ki li pou fer? Li ti kapav gard sa pou li. Me plito, li desid pou retourn portfey-la so proprieter. Kan so mama tann seki li’nn fer, li bien fier.

² Laplipar bann paran kontan kan zot zanfan onet. Zeova, nou Papa ki dan lesiel, Li “Bondie laverite,” ek li kontan kan nou onet. (Psom 31:5, NW) Nou anvi fer Li plezir ek “res onet dan tou kitsoz.” (Ebre 13:18, NW) Anou examinn kat domenn dan nou lavi kot parfwa li kapav difisil pou res onet. Apre sa, nou pou gete ki bann bienfe nou pou gagne kan nou res onet.

3-5. (a) Kouma nou kapav malonet ar noumem? (b) Ki pou ed nou pou onet ar noumem?

³ Pou ki nou onet avek lezot, nou bizin avan tou onet avek noumem. Li pa touletan fasil. Dan premie siek, bann frer dan lasanble Laodise ti anbet zotmem  parski zot ti krwar ki zot ti pe fer Bondie plezir, me an realite zot pa ti pe fer sa. (Revelasion 3:17) Nou osi nou kapav anbet noumem lor ki kalite dimounn nou ete vremem.

⁴ Disip Zak ti explike: “Si kikenn krwar li enn relizie [adorater Bondie, NW] e li pa vey so lalang, li pe tronp limem, so larelizion [ladorasion, NW] pena okenn valer.” (Zak 1:26) Nou pou anbet noumem si nou panse ki, akoz nou pe fer bann bon aksion, Bondie pa pou pran kont kan nou koz kontrer (ouswa sarkastik), nou koz manti ouswa koz brit. Ki kapav ed nou pou nou pa anbet noumem?

⁵ Kan nou get nou dan laglas, nou kapav trouve kouma nou ete andeor. Me, kan nou lir Labib, nou kapav trouve seki nou ete andan. Labib kapav ed nou pou konn nou bann pwin for ek nou bann febles. Lerla, nou pou kone ki bann sanzman nou bizin fer dan nou fason panse, azir ek koze. (Lir Zak 1:23-25.) Me si nou panse ki nou pena okenn defo, nou pa pou kapav fer bann sanzman neseser pou amelior noumem. Alor, nou bizin servi Labib pou examinn noumem dan enn fason onet. (Lamantasion 3:40; Aze 1:5) Lapriyer osi ed nou pou trouve seki nou ete vremem. Nou kapav priye Zeova pou ki Li examinn nou ek ed nou pou trouv nou bann defo pou ki nou kapav koriz zot. (Psom 139:23, 24, NW) Nou rapel ki “Zeova deteste enn dimounn ipokrit, me Li vinn enn kamarad bien pros avek bann dimounn ki drwat.”​—Proverb 3:32.

6. Kifer enn mari ek enn fam bizin onet ar zot kamarad?

⁶ Li bien inportan ki nou onet dan lafami. Kan enn mari ek enn fam onet ar zot kamarad, zot santi zot an sekirite ek zot kapav fer zot kamarad vremem konfians. Enn dimounn kapav montre ki li pa onet dan so maryaz dan diferan fason. Par exanp, enn kikenn ki marye kapav koumans ena bann ti regar ouswa fer zes ar enn lot dimounn ki pa so konzwin. Li kapav osi get pornografi ouswa devlop enn santiman amoure pou enn kikenn an sekre. Remark seki enn ekrivin Psom ti dir: “Mo pa frekant dimoun  malonet, ni mars ar bann ipokrit.” (Psom 26:4) Si nou malonet ar nou konzwin dan nou bann panse, sa kapav afekte nou maryaz.

7, 8. Kouma to kapav servi Labib pou ansegn to bann zanfan linportans ki zot onet?

⁷ Bann zanfan osi bizin aprann ki li inportan ki zot onet. Alor, bann paran kapav servi Labib pou ansegn zot sa lide-la. Labib koz lor bann move lexanp kot sertin dimounn ti malonet. Par exanp, Akann ti vinn enn voler, Geazi ti koz manti pou gagn kas, ek Zida ti kokin kas ek plitar li ti trayir Zezi pou 30 pies larzan.​—Zozwe 6:17-19; 7:11-25; 2 Lerwa 5:14-16, 20-27; Matie 26:14, 15; Zan 12:6.

⁸ Labib koz osi lor bann bon lexanp kot bann dimounn ti onet. Par exanp, Zakob ti sipliy so bann garson pou retourn kas ki zot ti trouve, Zefte ek so tifi ti respekte promes ki zot ti fer Bondie, ek Zezi ti onet mem dan bann sitiasion difisil. (Zenez 43:12; Ziz 11:30-40; Zan 18:3-11) Sa bann lexanp-la kapav ed bann zanfan pou konpran kifer li inportan ki zot onet.

9. Kan bann paran onet, ki bienfe zot zanfan pou gagne?

⁹ Bann paran kapav aprann ar sa prinsip Labib inportan la: “Me, twa ki ansegn lot dimounn, eski to pa ansegn tomem? Twa, ki prese: Fode pa kokin, eski tomem to kokin?” (Romin 2:21, NW) Bann zanfan konn bien kan zot paran dir enn kitsoz, me apre zot fer lekontrer. Si nou dir nou bann zanfan ki zot bizin onet, me ki noumem nou pa onet, zot pou nepli kone ki bizin krwar. Ek si bann zanfan remarke ki zot paran koz manti, mem pou bann ti zafer, kitfwa zot  pou fer parey. (Lir Lik 16:10.) Parkont, kan bann zanfan trouve ki zot paran onet, sa kapav ed zot pou swiv lexanp zot paran. Lerla, si enn zour, zotmem zot vinn paran, zot zanfan pou kapav fer zot konfians.​—Proverb 22:6; Efezien 6:4.

10. Kouma nou kapav onet kan nou koz avek nou bann frer ek ser Kretien?

¹⁰ Nou bizin onet osi avek nou bann frer ek ser Kretien. Li fasil pou bann ti konversasion toulezour vinn bann palab, ek sa kapav al mem ziska gat repitasion enn dimounn. Nou kapav fann bann mansonz, si nou repet enn koze san ki nou kone si li vre ouswa non. Akoz samem, li pli bon ki nou ‘kontrol nou lalang.’ (Proverb 10:19) Kan nou onet, sa pa vedir ki nou bizin dir tou seki nou panse, seki nou kone ouswa seki nou’nn tande. Mem si seki nou anvi dir li vre, kitfwa sa pa konsern nou, ouswa mem ki li pa neseser ek li pa bon ki nou repet li. (1 Tesalonisien 4:11) Sertin dimounn dir : “Mwa mo fran mwa.” Lerla, zot servi sa kouma enn exkiz pou koz dan enn fason blesan. Me antan ki pep Zeova, nou touletan anvi dir bann parol zanti ek koz dan enn bon fason.​—Lir Kolosien 4:6.

11, 12. (a) Kouma enn dimounn ki’nn fer pese kapav fer so sitiasion vinn pli grav kan li pa onet? (b) Si to al dekouver ki to kamarad inn fer enn fot grav, ki kalite rezonnman to bizin rezete, ek kifer? (c) Kouma nou kapav onet avek lorganizasion Zeova?

¹¹ Zeova inn donn bann ansien responsabilite pou ed lasanble. Kan nou onet avek bann ansien, li pli fasil pou zot ed nou. Kifer? Si to malad ek to al get enn  dokter, eski to pou kasiet li sertin to bann sintom? Si to fer sa, kouma li pou ed twa? Parey, si nou’nn fer enn fot grav, fode pa nou kasiet nanye ni koz manti. Okontrer, nou bizin al get bann ansien ek nou bizin onet kan nou koz sa avek zot. (Psom 12:2; Zistwar Bann Apot 5:1-11, NW) Aster, mazinn enn lot sitiasion: To aprann ki to kamarad inn fer enn fot grav. Ki to pou fer? (Levitik 5:1) Eski to pou dir tomem: “Si mo enn vre kamarad, mo pou gard sa sekre”? Ouswa to pou rapel ki bann ansien zot la pou donn li led ki li bizin pou li regagn ek ranforsi so relasion avek Zeova?​—Ebre 13:17, NW; Zak 5:14, 15, NW.

¹² Nou bizin osi onet anver lorganizasion Zeova kan nou pe ranpli bann form, par exanp kan nou ranpli nou rapor, enn form pou fer pionie ouswa lezot form servis.​—Lir Proverb 6:16-19.

13. Kouma nou kapav onet kan nou fer biznes avek enn Kretien?

¹³ Bann Kretien bizin pa melanz biznes ar ladorasion. Par exanp, nou pa pou fer biznes kan nou dan Lasal ouswa dan nou minister. Ek nou pa pou profit lor nou bann frer ek ser kan nou fer biznes avek zot. Si enn Temwin travay pou twa, pey li dan ler, donn li kantite kas ki to’nn promet li, ek permet li pou profit bann lavantaz ki lalwa demande, kouma anrezistre bann travayer ouswa ranbours bann lokal. (1 Timote 5:18; Zak 5:1-4) Ek si to patron enn Temwin, pa atann pou gagn enn faver spesial. (Efezien 6:5-8) Travay kantite letan ki zot inn tom dakor ek fer tou travay pou seki pe pey twa.​—2 Tesalonisien 3:10.

14. Ki bann Kretien bizin fer avan ki zot koumans enn biznes ansam?

 ¹⁴ Ki nou pou fer si nou pe koumans enn biznes ansam avek enn frer ouswa enn ser? Sa kapav inplik fer enn linvestisman ouswa pran enn loan. Dan bann sitiasion koumsa, ena enn prinsip Labib ki kapav bien ed nou: Met tou lor papie! Kan profet Zeremi ti aste enn terin, li ti ekrir de kopi sa kontra-la, li ti fer enn kopi signe par bann temwin, ek li ti gard toulede dokiman pou kapav servi zot plitar. (Zeremi 32:9-14; get osi Zenez 23:16-20.) Sertin kapav panse ki kan met tou lor papie, savedir ki zot pa fer zot frer ek ser konfians. Me an realite, kan ekrir tou lor papie, sa kapav evit bann problem, desepsion, ek bann dezakor. Mem dan biznes, rapel ki lape dan lasanble pli inportan ki ninport ki laranzman ki zot inn fer.​—1 Korintien 6:1-8, NW; get Not 30.

15. Ki Zeova panse lor bann pratik malonet dan biznes?

¹⁵ Nou bizin onet avek tou dimounn, mem anver bann ki pa Temwin Zeova. Pou Zeova, li inportan ki nou onet. “Zeova deteste bann balans ki’nn trike, me enn pwa ki exakt fer Li plezir.” (Proverb 11:1; 20:10, 23) Dan lepok Biblik, ti abitie servi bann balans pou aste ouswa vann kitsoz. Me sertin marsan ti kokin zot bann klian kan ti pe donn zot mwins ki bizin ouswa ti pe demann zot pey plis ki bizin. Azordi, parey kouma dan lepok Biblik, ena boukou dimounn malonet dan biznes. Ek parey kouma lontan, Zeova touzour deteste bann pratik malonet azordi.

16, 17. Ki bann pratik malonet nou bizin rezete?

 ¹⁶ Nou tou nou fer fas ar bann sitiasion kot nou kapav malonet, kouma par exanp, kan nou fer aplikasion pou enn travay, nou ranpli bann form gouvernman, ouswa nou ena lexame dan lekol. Boukou panse ki pena nanye demal pou koz manti, pou exazere, ouswa pou donn bann fos linformasion. Sa pa etonn nou. Labib ti predir ki pandan bann dernie zour sa lemond-la, dimounn pou “konn zis zotmem ek zot larzan. . . . Zot pou kont seki bien.”​—2 Timote 3:1-5.

¹⁷ Parfwa, li kapav paret ki se bann dimounn malonet ki reisi dan sa lemond-la. (Psom 73:1-8) Enn Kretien kapav mem perdi so travay, perdi kas, ouswa gagn enn move tretman dan travay akoz li onet. Me li vo lapenn res onet. Kifer?

18. Kifer enn bon repitasion ena boukou valer?

¹⁸ Bann dimounn ki ena enn bon repitasion parski zot onet ek kapav fer zot konfians, li bien rar ek ena boukou valer dan sa lemond-la azordi. Me, sakenn parmi nou ena posibilite pou fer zefor pou gagn enn repitasion koumsa. (Mishe 7:2) Parfwa, akoz to onet, sertin dimounn kapav boufonn twa ek dir ki to bet. Me pou ena lezot ki pou apresie ki to onet ek lerla, zot pou fer twa konfians. Partou dan lemond, bann dimounn konn bann Temwin Zeova kouma bann dimounn ki onet. Sertin patron prefer pran bann Temwin pou travay parski zot kone ki zot pou onet. Ek mem kan bann lezot travayer inn perdi zot travay  akoz zot ti malonet, bann Temwin inn souvan gard zot travay.

19. Kan to onet, ki lefe sa ena lor to lamitie avek Zeova?

¹⁹ Kan to onet dan tou kitsoz, to pou ena enn bon konsians ek lape lespri. Nou kapav vinn kouma Pol, ki ti ekrir: “Nou sir ki nou ena enn konsians ki drwat.” (Ebre 13:18, NW) Pli inportan ankor, Zeova, to Papa ki kontan twa pou remark ek apresie tou to bann zefor pou res onet dan tou kitsoz.​—Lir Psom 15:1, 2, NW; Proverb 22:1.