Zeova ti dir Moiz: ‘Vinn lor montagn. Mo pou ekrir mo bann lalwa lor bann tablet an ros ek mo pou donn twa.’ Moiz ti mont lor montagn ek li ti res 40 zour ek 40 lanwit laba. Sa bann lalwa-la ti apel Dis Komannman.

Apre inpe letan, bann Izraelit ti panse ki Moiz ti abandonn zot. Alor, zot ti dir Aaron: ‘Nou anvi ki enn kikenn gid nou. Fer enn bondie pou nou!’ Aaron ti dir: ‘Donn mwa zot lor.’ Li ti fonn sa lor-la ek li ti fer enn vo an-or. Bann Izraelit ti dir: ‘Sa vo-la se nou Bondie ki’nn fer nou sorti depi Lezip!’ Lerla, zot ti koumans ador sa vo-la, ek zot ti fer enn fet. Eski sa ti move? Wi, parski zot ti promet pou ador zis Zeova. Me zot ti kas zot promes.

Zeova ti trouv seki ti pe arive, ek Li ti dir Moiz: ‘Desann, al get lepep. Zot pe dezobeir mwa ek zot pe ador enn fos  bondie.’ Moiz ti desann lor montagn, ek li ti amenn sa de tablet-la ar li.

Kan li ti pe koste ar kan bann Izraelit, Moiz ti tann zot pe sante. Apre sa, li ti trouv zot pe danse ek pe prosterne devan sa vo-la. Moiz ti bien ankoler. Li ti zet sa de tablet-la anba, ek zot ti kraze. Li ti kraz sa vo-la deswit. Lerla, li ti demann Aaron: ‘Kouma lepep inn konvink twa pou fer sa move kitsoz-la?’ Aaron ti reponn: ‘Pa ankoler. To kone kouma sa pep-la ete. Zot ti anvi enn bondie. Alor, mo’nn zet zot lor dan dife ek inn gagn sa vo-la!’ Aaron pa ti bizin fer sa. Moiz ti remont lor montagn ek li ti sipliy Zeova pou pardonn lepep.

Lerla, Zeova ti pardonn bann ki ti anvi obeir Li. Eski to konpran kifer li ti inportan ki bann Izraelit obeir Moiz?