Zeova ti dir Samiel: ‘Al kot Zese. Enn parmi so bann garson pou vinn prosin lerwa Izrael.’ Lerla, Samiel ti al kot Zese. Kan Samiel ti trouv premie garson Zese, li ti panse: ‘Sirman limem prosin lerwa Izrael.’ Me Zeova ti dir Samiel ki se pa li ki ti pou vinn lerwa. Zeova ti dir li: ‘Mo get seki ena dan leker enn dimounn, pa zis so laparans.’

Zese ti amenn ankor sis parmi so bann garson ar Samiel. Me Samiel ti dir: ‘Zeova pa finn swazir okenn parmi zot. Eski to ena lezot garson ankor?’ Zese ti dir li: ‘Mo ena ankor enn, mo pli zenn garson, David. Li deor ek li pe okip mo bann mouton.’ Kan David ti rantre, Zeova ti dir Samiel: ‘Limem sa!’ Alor, Samiel ti vers delwil lor latet David, ek ti etabli li kouma prosin lerwa Izrael.

Inpe letan apre, bann Izraelit ti al lager kont bann Filistin. Bann Filistin ti ena enn gerye zean. Li ti apel Goliat. Toulezour, Goliat ti pe boufonn bann Izraelit. Li ti kriye: ‘Avoy enn zom pou lager kont mwa. Si li gagne, nou pou vinn zot bann esklav. Me si mo gagne, zot pou vinn nou bann esklav.’

David ti vinn dan kan bann Izraelit pou amenn manze pou so bann frer ki ti bann solda. Li ti tann seki Goliat ti dir. Alor, David ti dir: ‘Mo pou lager kont li!’ Me Lerwa Sail ti reponn: ‘To tro zenn.’ Lerla, David ti dir: ‘Zeova pou ed mwa.’

 Sail ti anvi ki David servi so larmir, me David ti dir: ‘Mo pa pou kapav lager ar sa larmir-la.’ David ti pran so fronde ek li ti al kot enn larivier. Li ti swazir sink ros bien lis ek li ti met zot dan so sak. Apre sa, David ti galoup dan direksion Goliat. Sa zean-la ti kriye: ‘Vini, ti garson. Mo pou fer twa vinn manze pou zwazo ek zanimo sovaz.’ Me David pa ti gagn per. Li ti reponn: ‘To vinn avek enn lepe ek enn lans, me mwa mo vinn o-nom Zeova. To pa pe lager kont nou, me to pe lager kont Bondie. Tou dimounn ki la pou trouve ki Zeova pli for ki enn lepe ouswa enn lans. Li pou donn nou laviktwar.’

David ti met enn ros dan so fronde (enn zarm ki servi pou avoy ros) ek li ti avoy sa ar tou so lafors. Avek led Zeova, sa ros-la ti fons dan fron Goliat. Sa zean-la ti tom anba ek li ti mor sek. Lerla, bann Filistin ti sove. Eski to ena konfians an Zeova, parey kouma David?