1-3. (a) Ar ki sitiasion Etienn pe bizin fer fas, ek kouma li reazir? (b) Ki bann kestion nou pou examine?

 ETIENN pe debout devan lakour. Li dan enn lasal ki bien inpresionan ek ki pre ar tanp dan Zerizalem. Devan Etienn, ena 71 zom ki pe asize an demi-serk. Sa lakour-la, setadir Sanedrin, inn zwenn pou ziz Etienn. Sa bann ziz-la ena boukou pouvwar ek linflians, ek laplipar parmi zot pena okenn respe pou bann disip Zezi. Ofet, sa zom ki’nn rasanble sa lakour-la, se Gran Pret Kaif, ki ti prezidan Sanedrin kan ti kondann Zezi amor inn gagn de-trwa mwa. Eski Etienn pe gagn per?

² Kan bann ziz get Etienn, zot bien etone ar lexpresion so figir. Zot trouve ki so figir “kouma figir enn anz.” (Zist. 6:15) Bann anz partaz mesaz ki sorti kot Zeova, alor li normal ki zot pena okenn laper, ki zot kalm ek ki zot anpe. Se seki Etienn resanti. Mem bann ziz ki ena boukou laenn pou li, trouv sa. Me kouma li kapav res kalm koumsa?

³ Repons sa kestion-la kapav ed bann Kretien azordi. Me nou bizin osi konpran kouma Etienn ti retrouv li dan sa sitiasion difisil la. Kouma eski li ti koz lor so lafwa avek kouraz, avan ki li pas devan sa lakour-la? Ek kouma nou kapav imit li?

4, 5. (a) Kifer Etienn ti itil pou lasanble? (b) Dan ki sans Etienn ena “faver Bondie ek pwisans an-abondans”?

⁴ Nou’nn aprann ki Etienn ti bien itil pou lasanble Kretien ki ti fek forme. Kouma nou ti trouve dan sapit avan, Etienn ti parmi sa set zom ki ti ena limilite la, ek ki ti aksepte mision spesial ki bann zapot ti done. Dan Zistwar Bann Zapot 6:8, nou trouve ki Bondie donn li pouvwar pou fer “bann kitsoz extraordiner ek bann mirak,” parey kouma bann zapot. Seki inpresionan, se ki mem si Bondie donn Etienn boukou kapasite, li ena boukou limilite. Nou trouve osi ki li ena “faver Bondie ek pwisans an-abondans.” Ki savedir sa?

⁵ Kapav tradir mo grek ki’nn servi pou “faver Bondie” par “bonte.”  Alor, sa montre ki Etienn zanti ek ena enn karakter dou, ek sa atir bann dimounn ver li. Fason ki li koze, konvink bann ki ekout li ki li sinser, ek ki zot pou gagn bann bienfe ar bann verite ki li ansegne. Li ena pwisans an-abondans parski, avek limilite, li les Zeova So lespri gid li. Olie ki li les lorgey trap li parski li ena boukou kapasite, li donn tou laglwar Zeova, ek li montre ki li vremem interese ar tou bann dimounn ar ki li koze. Alor nou konpran kifer so bann lennmi konsider li kouma enn menas!

6, 7. Ki de lakizasion Etienn so bann lennmi met lor li, ek kifer?

⁶ Sertin zom diskit ar Etienn, me ‘zot pa kapav reponn so bann largiman akoz sazes ek lespri sin ki li ena kan li koze.’ a Akoz sa, ‘an sekre zot konvink’ sertin zom pou met bann fos sarz lor sa disip Lekris ki inosan la. Zot osi “mont latet lepep, bann ansien, ek bann exper Lalwa” pou fors Etienn pou pas devan Sanedrin. (Zist. 6:9-12) So bann lennmi met de sarz lor li: Li pe koz kont Bondie ek kont Moiz. Dapre so bann lennmi, dan ki sans Etienn pe fer sa?

⁷ Sa bann zom-la dir ki Etienn pena respe pou Bondie, parski li dir bann move kitsoz kont “sa plas ki sin la,” setadir tanp ki dan Zerizalem. (Zist. 6:13) Zot dir ki li koz kont Lalwa Moiz, parski li sanz bann tradision ki Moiz ti ansegn lepep. Sa bann lakizasion-la bien grav parski pou bann Zwif sa lepok-la, tanp, Lalwa Moiz, ek bann tradision ki zot ti azoute dan Lalwa ti pli inportan ki ninport ki kitsoz. Alor, sa bann lakizasion-la montre ki Etienn enn dimounn danzere ek ki li merit lamor!

8. Kifer lexanp Etienn itil pou bann Kretien azordi?

⁸ Malerezman, mem ziska azordi, bann sef relizie abitie servi bann mem taktik pou fer bann serviter Bondie gagn problem. Parfwa, bann sef relizie mont latet bann gouvernman pou ki zot persekit bann Temwin Zeova. Ki nou bizin fer kan bann dimounn met bann fos lakizasion lor nou? Nou pou aprann boukou kitsoz lor la gras-a lexanp Etienn.

9, 10. Ki sertin dimounn ti dir konsernan diskour ki Etienn ti fer devan Sanedrin, ek ki nou bizin rapel?

⁹ Kouma nou’nn trouve dan koumansman sa sapit-la, kan Etienn tann bann lakizasion ki’nn met lor li, li kalm ek so figir parey kouma enn anz. Lerla, Kaif demann li: “Eski sa bann kitsoz-la vre?” (Zist. 7:1) Aster-la, ariv Etienn so tour pou koze. Ek kan Etienn koze, li fer enn diskour ki bien zoli.

 ¹⁰ Sertin dimounn ti kritik diskour Etienn. Zot ti dir ki mem si so diskour ti long, li pa ti reponn okenn lakizasion ki bann-la ti fer kont li. Me an realite, Etienn inn kit enn zoli lexanp pou nou. Li’nn montre nou kouma nou kapav “defann” bon nouvel. (1 Pier 3:15) Rapel ki bann-la ti dir ki Etienn ti mank respe pou Bondie, parski li ti koz kont tanp, ek ki li pa ti montre respe pou Moiz, parski li ti koz kont Lalwa. Dan so diskour, Etienn fer enn rezime trwa lepok dan listwar bann Izraelit. Ek li met laksan lor sertin pwin presi. Anou examinn sa trwa lepok-la enn par enn.

11. Kifer Etienn servi lexanp Abraam?

¹¹ Lepok bann patriyars, setadir bann sef fami dan Izrael. (Zist. 7:1-16) Etienn koumans koz lor Abraam, ki bann Zwif bien respekte akoz so lafwa. Li koumans koz lor sa size-la, parski li kone ki se enn size lor ki li ek bann-la pou tom dakor. Sa permet li met laksan lor lide ki se dan Mezopotami ki pou premie fwa Zeova, “Bondie Laglwar,” ti fer Abraam konn Li. (Zist. 7:2) Sa lepok-la, Abraam ti enn etranze dan Later Promiz. Li pa ti ena ni tanp, ni Lalwa Moiz. Alor, personn pa kapav dir ki enn dimounn bizin tanp ouswa Lalwa Moiz pou ki li kapav res fidel anver Bondie.

12. Kifer Etienn koz lor Zozef dan so diskour?

¹² Bann dimounn ki pe ekout Etienn, bien respekte Zozef osi, enn desandan Abraam. Me Etienn rapel zot, ki Zozef so bann prop frer, bann anset tribi Izrael, ti persekit sa zom drwat la ek ti vann li kouma enn esklav. Pourtan, Bondie ti servi li pou sov Izrael kan ti ena enn lafaminn. Etienn trouve ki ena boukou resanblans ant seki Zezi ek Zozef ti viv. Me li pa koz lor la dan so diskour, pou ki bann dimounn ki la, kontign ekout li.

13. Kouma seki Etienn dir lor Moiz montre ki so bann lennmi ena tor, ek gras-a sa, lor ki pwin inportan li met laksan?

¹³ Lepok Moiz. (Zist. 7:17-43) Etienn koz boukou lor Moiz. Sa bien apropriye, parski parmi bann manb Sanedrin, ena bann Sadisein, ki aksepte zis bann liv Labib ki Moiz ti ekrir. Fode pa nou bliye ki Etienn so bann lennmi, ti dir ki li pena respe pou Moiz. Me kan li montre ki li ena enn gran respe pou Moiz ek pou Lalwa, li montre so  bann lennmi ki zot ena tor. (Zist. 7:38) Li dir osi ki kan Moiz ti ena 40 an ek ki li ti esey sov bann Izraelit, bann-la ti rezet li. Plis ki 40 an apre, plizir fwa bann Izraelit ti konteste so lotorite. b Nou trouve ki toutlong so diskour, Etienn met laksan lor enn pwin inportan: Bien souvan, pep Bondie finn rezet bann dimounn ki Zeova finn swazir pou diriz zot.

14. Gras-a lexanp Moiz, lor ki pwin inportan Etienn met laksan?

¹⁴ Etienn rapel bann ki pe ekout li, ki Moiz ti predir ki Bondie ti pou avoy enn profet ki sorti dan Izrael ek ki ti pou parey kouma Moiz. Kisann-la sa profet-la, ek kouma bann Izraelit ti pou akeyir li? Etienn gard repons sa bann kestion-la pou lafin so diskour. Li met laksan lor enn lot pwin inportan: Moiz ti aprann ki ninport ki later kapav vinn sakre. Se seki ti arive kan Zeova ti koz ar li kot sa touf pikan ki ti pe pran dife la. Alor, eski Zeova anvi ki nou ador Li zis dan enn batiman, kouma par exanp tanp dan Zerizalem? Anou gete ki repons Etienn pou done.

15. Kifer Etienn koz lor tabernak?

¹⁵ Tabernak ek tanp. (Zist. 7:44-50) Etienn rapel lakour, ki avan ki ti ena tanp dan Zerizalem, Bondie ti donn Moiz lord pou konstrir enn tabernak, ki ti enn latant ki ti kapav bouze ek kot ti kapav ador Bondie. Parmi bann ki pe ekout Etienn, kisann-la pou oze dir ki tabernak mwin inportan ki tanp, alor ki Moiz ti ador Bondie laba?

16. Kouma Etienn servi lexanp tanp Salomon dan so diskour?

¹⁶ Plitar, kan Salomon ti ranz tanp dan Zerizalem, li ti dir enn kitsoz inportan dan so lapriyer. Ek Etienn repran bann parol Salomon dan so diskour, kan li dir: “Sa Kikenn ki Pli Lao la pa res dan bann lakaz ki’nn fer ar lame.” (Zist. 7:48; 2 Kro. 6:18) Zeova kapav servi enn tanp pou akonpli so proze, me pou ki so proze akonpli, Li pa depann zis lor la. Alor, kifer bann adorater Zeova panse ki zot bizin ador Zeova dan enn batiman ki’nn ranze par bann dimounn? Etienn fini so diskour avek enn largiman bien for, kan li sit liv Izai: “Zeova dir, Lesiel se mo tronn, ek later se ti ban kot mo poz mo lipie. Ki kalite lakaz zot pou aranze pou mwa? Ouswa eski ena enn plas kot mo kapav reste? Eski pa mo lame ki’nn fer sa bann kitsoz-la?”​—Zist. 7:49, 50; Iza. 66:1, 2.

17. Kouma diskour Etienn montre dan enn fason kler ki (a) so bann lennmi ena enn move latitid ek ki (b) li pa’nn fer nanye demal?

¹⁷ Kan to examinn diskour ki Etienn inn fer devan Sanedrin, eski to pa pou dakor pou dir ki Etienn inn montre dan enn fason bien kler ki so bann lennmi ti ena enn move latitid? Zeova, Li enn Bondie ki soup, ki pa depann lor bann tradision, ek ki pa pou ezite fer bann sanzman  ki bizin pou akonpli so proze! Bann dimounn ki ekout Etienn bien kontan tanp ek bann tradision ki bann dimounn ti azoute dan Lalwa Moiz. Me zot pa vremem konpran kifer Zeova ti donn Lalwa ek kifer Li ti fer ranz tanp. Se koumadir Etienn pe poz sa kestion inportan-la: Eski obeir Zeova, se pa pli bon fason pou montre respe pou Lalwa ek tanp? Bann parol Etienn montre ki li pa’nn fer nanye demal, parski li ti fer tou seki li kapav pou obeir Zeova.

18. Kouma nou kapav imit Etienn?

¹⁸ Ki nou kapav aprann ar diskour Etienn? Etienn ti konn bien bann Lekritir. Nou osi, nou bizin vinn bann bon etidian Labib, si nou anvi servi “parol laverite kouma bizin.” (2 Tim. 2:15) Lexanp Etienn montre nou kouma nou kapav koz avek bann dimounn dan enn bon fason, san ki nou bles zot. Bann dimounn ki pe ekout li, vremem pa dakor ar li! Me otan ki posib, li koz lor bann kitsoz ki bien inportan pou sa bann zom-la, ek lor ki bann-la ek li pou dakor. Li osi koz avek sa bann dimounn ki ena lotorite la avek respe, kan li apel zot “gran dimounn.” (Zist. 7:2) Nou osi nou bizin koz lor laverite ki ena dan Parol Bondie “avek douser ek profon respe.”​—1 Pier 3:15.

19. Kouma avek kouraz, Etienn fer Sanedrin konn mesaz zizman Zeova?

¹⁹ Selman, fode pa nou retenir nou pou partaz bann verite ki ena dan Labib, parski nou per pou ofans bann dimounn. Fode pa osi ki nou sanz mesaz zizman Zeova zis pou fer lezot plezir. Etienn finn les enn bon lexanp pou nou. Li ti kone ki bann prev ki li ti prezant devan Sanedrin, pa ti pou sanz fason panse sa bann ziz ki bien fier la. Alor, lespri sin pous Etienn pou fini so diskour ek pou dir zot avek kouraz ki zot parey kouma zot bann anset, ki ti rezet Zozef, Moiz, ek tou bann profet. (Zist. 7:51-53) An realite, mem si Moiz ek bann profet ti predir ki Lemesi ti pou vini, bann ziz dan Sanedrin ti touy Lemesi! Samem kitsoz pli pir ki zot inn kapav fer pou dezobeir Lalwa Moiz.

20, 21. Kouma Sanedrin reazir ar seki Etienn dir, ek kouma Zeova ankouraz Etienn?

²⁰ Bann ziz sap lor kal kan zot trouve ki zot pa pou kapav konteste tou bann verite ki Etienn dir. Zot nepli kapav tini, zot koumans grins zot ledan kont Etienn. Sa zom fidel la trouve ki bann-la pa pou ena okenn pitie pou li, parey kouma zot pa ti ena okenn pitie pou so Met, Zezi.

²¹ Etienn pou bizin kouraz pou andir seki pou ariv li. Pena dout ki li gagn lankourazman gras-a vizion ki Zeova donn li: Li trouv laglwar Bondie ek li trouv Zezi ki pe debout dan kote drwat Zeova! Kan Etienn dekrir sa vizion-la, bann ziz bous zot zorey. Kifer zot fer sa? Inpe letan  avan, Zezi ti dir sa mem lakour-la ki limem Lemesi, ek ki biento li pou dan kote drwat so Papa. (Mark 14:62) Vizion ki Etienn gagne, enn prev ki Zezi ti dir laverite. Vremem, Sanedrin ti trayir Lemesi ek ti touy li! Zot tou sot lor Etienn ek fer touy li kout ros. c

22, 23. Dan ki fason lamor Etienn parey kouma lamor so Met, ek kifer bann Kretien azordi kapav ena konfians dan Zeova parey kouma Etienn?

²² Parey kouma so Met, kan Etienn mor, li anpe, li ena foul konfians dan Zeova, ek li pardonn bann zom ki pe touy li. Lerla, Etienn dir: “Segner Zezi, pran mo lavi.” Kitfwa li dir sa bann parol-la, parski li ankor pe trouv Garson limanite akote ar Zeova dan sa vizion-la. Pena dout ki Etienn konn bien bann parol ankourazan ki Zezi ti dir: “Momem rezireksion ek lavi.” (Zan 11:25) Finalman, Etienn priye Bondie bien for: “Zeova, pa kondann zot pou sa pese-la.” Kan li fini dir sa, li mor.​—Zist. 7:59, 60.

²³ Etienn ti premie disip Kris ki’nn mor akoz so lafwa. (Get lankadre “ Etienn Ti Mor Parski Li Ti enn Temwin Zezi.”) Malerezman, se pa dernie dimounn ki ti pou mor akoz so lafwa. Mem ziska azordi, sertin serviter Zeova ki fidel finn mor akoz bann sef relizie, bann politisien ki extremis, ek bann lezot lennmi ki kriel. Me parey kouma Etienn, nou kapav ena foul konfians ki Zezi pou tini so promes pou resisit bann mor. Aster-la, Zezi pe regne kouma Lerwa, ek Zeova inn donn li enn gran pouvwar. Nanye pa kapav anpes li pou resisit so bann disip ki fidel.​—Zan 5:28, 29.

24. Kouma Sol partisip dan lamor Etienn, ek ki lefe pozitif lamor sa zom fidel la ena?

²⁴ Kan bann-la touy Etienn, ena enn zenom ki apel Sol ki pe gete, ek li dakor ki bann-la touy Etienn. Li mem vey linz bann dimounn ki pe avoy ros lor Etienn. Inpe letan apre, Sol koumans persekit bann Kretien dan enn fason bien kriel. Me lamor Etienn pou ena bann lefe pozitif. So lexanp pou ed bann lezot Kretien pou res fidel ar Zeova ziska lamor. Anplis, Sol ki plitar pou apel Pol, pou bien regrete kan li pou mazinn rol ki li ti ena dan lamor Etienn. (Zist. 22:20) Li ti ede pou fer touy Etienn, me plitar li pou dir: “Mo ti koz kont Bondie, mo ti persekit so pep ek mo ti enn zom insolan.” (1 Tim. 1:13) Li kler ki Pol zame pa finn bliye Etienn ek zoli diskour ki li ti fer sa zour-la. Avredir, dan sertin diskour ek let ki Pol pou ekrir, li pou repran sertin pwin inportan ki Etienn ti devlope dan so diskour. (Zist. 7:48; 17:24; Ebre 9:24) Etienn ti enn zom ki ti ena “faver Bondie ek pwisans an-abondans,” ek avek letan, Pol ti swiv bon lexanp lafwa ek kouraz ki Etienn ti montre. Aster-la, kestion ki nou bizin demann nou se: Eski nou osi, nou pou swiv lexanp Etienn?