1, 2. Ki arive kan bann lennmi esey anpes pep Bondie pres bon nouvel?

 BANN Kretien koumans gagn boukou persekision. Sol koumans fer lasanble “ditor.” Dan lang orizinal, sa lexpresion-la montre ki persekision ki lasanble ti gagne, ti bien kriel. (Zist. 8:3) Akoz sa, bann disip sove depi Zerizalem. Kitfwa, sertin dimounn mem krwar ki Sol pou reisi fer bann Kretien aret prese. Me selman, kan bann Kretien sove, enn kitsoz extraordiner arive. Ki ete sa?

² Bann Kretien ki’nn sove depi Zerizalem koumans “anons bon nouvel lor parol Bondie” dan bann landrwa kot zot ale. (Zist. 8:4) To rann twa kont! Persekision pa’nn anpes bann disip koz lor Parol Bondie. Ofet li ena lefe kontrer, li ede pou ki bon nouvel fane partou! Kan bann dimounn ki persekit bann disip fors zot pou kit zot lakaz, san ki zot rann zot kont, zot pe ede pou ki bon nouvel ariv dan bann landrwa ki bien-bien lwin. Kouma nou pou trouve dan sa sapit-la, se enn kitsoz ki’nn arive dan nou lepok osi.

3. (a) Kisann-la Filip? (b) Kifer laplipar dimounn dan Samari pa’nn tann koz lor bon nouvel, ek ki Zezi ti predir konsernan Samari?

³ Filip a form parti ‘bann disip ki’nn disperse.’ (Zist. 8:4; get lankadre “ Filip, ‘enn Predikater.’”) Li al Samari, enn lavil kot laplipar dimounn pa’nn tann koz lor bon nouvel. Kifer? Parski Zezi ti donn so bann zapot sa lord-la: “Pa rant dan okenn lavil samariten; me parkont, kontign al get bann mouton perdi ki dan nasion Izrael.” (Mat. 10:5, 6) Me Zezi ti kone ki plitar, bann Samariten ti pou tann koz lor bon nouvel, parski avan ki li ti mont dan lesiel, li ti dir: “Zot pou vinn mo bann temwin dan Zerizalem, partou dan Zide ek Samari, ek ziska dan bann landrwa pli lwin lor later.”​—Zist. 1:8.

4. Kouma bann Samariten reazir ar predikasion Filip, ek ki kitsoz kitfwa pous zot pou ekout Filip?

 ⁴ Filip trouve ki Samari “pare pou rekolt.” (Zan 4:35) Kan bann Samariten tann mesaz ki Filip anonse, sa fer zot dibien. Sa lepok-la bann Zwif pa ti kontan gagn zafer ar bann Samariten ek zot ti mem mepriz bann-la. Me la, bann Samariten trouve ki mesaz bon nouvel konsern tou dimounn ek bien diferan avek seki bann Farizien ansegne. Bann Farizien ti ena bann prezize ek ti panse ki zot pli bon ki lezot dimounn. Filip montre ki li pena okenn prezize kouma bann Zwif, parski li anons bann Samariten bon nouvel avek boukou devouman. Alor, sa pa etonn nou ki ‘tou bann Samariten dan lafoul’ ekout bien seki Filip dir.​—Zist. 8:6.

5-7. Sit bann lexanp ki montre kouma bon nouvel inn fane partou, mem si bann Kretien inn bizin kit landrwa kot zot ti pe reste.

⁵ Azordi, parey kouma dan premie siek, bann serviter Bondie pa’nn les persekision anpes zot aret prese. Plizir fwa, inn fors bann Kretien pou al dan bann nouvo landrwa ouswa mem inn avoy zot dan prizon. Me ki lefe sa finn ena? Ofet, sa finn permet ki plis dimounn tann koz lor bon nouvel. Par exanp, pandan Deziem Lager Mondial, bann Temwin Zeova finn kapav rann enn bon temwaniaz  dan bann kan konsantrasion Nazi. Enn Zwif ki’nn zwenn bann Temwin Zeova dan enn sa bann kan-la dir: “Kouraz ki bann prizonie Temwin Zeova ti ena, inn konvink mwa ki zot lafwa baze lor Labib. Gras-a sa, mo’nn vinn enn Temwin Zeova.”

⁶ Dan sertin ka, mem bann ki ti persekit bann frer ek ser, finn tann ek aksepte mesaz bon nouvel. Par exanp, anou get seki ti ariv Frer Franz Desch. Ti avoy li dan kan konsantrasion Gusen, ki trouv dan Lotris. Laba, li ti koumans etidie Labib avek enn ofisie dan larme Nazi. Mazine ki kantite sa de zom-la ti extra kontan, kan de-trwa lane apre, zot ti zwenn dan enn lasanble rezional bann Temwin Zeova ek ki zot toule-de ti bann proklamater bon nouvel!

⁷ Nou trouve osi ki bon nouvel inn reisi fane partou, kan bann Kretien ti bizin kit zot pei akoz persekision. Par exanp, dan bann lane 1970, kan bann Temwin dan Malawi ti bizin sove pou al dan Mozanbik, zot ti sezi sa lokazion-la pou koz lor bon nouvel. Mem apre, kan ti gagn persekision dan Mozanbik, predikasion pa ti arete. Francisco Coana dir: “Plizir fwa bann-la ti aret sertin parmi nou, parski nou ti pe prese. Me pourtan, kan nou ti trouve ki kantite dimounn ti pe aksepte mesaz lor Rwayom Bondie, nou ti ena konfians ki Bondie ti pe ed nou, parey kouma Li ti ed bann Kretien dan premie siek.”

8. Kouma lager ek bann problem ekonomik finn permet ki pli boukou dimounn tann bon nouvel?

⁸ Me se pa zis akoz persekision ki boukou dimounn finn aksepte bon nouvel dan bann lezot landrwa. Sa bann dernie lane-la, akoz lager ouswa bann problem ekonomik, boukou dimounn finn kit zot pei. Lerla, zot finn kapav tann bon nouvel ek etidie Labib dan bann pei kot zot finn ale. Parski sa bann dimounn-la koz enn lot lang, nou bizin pres avek zot dan zot lang. Eski to pe fer zefor pou pres avek bann dimounn dan to teritwar “ki sorti dan tou nasion, tribi, pep, ek lang”?​—Rev. 7:9.

9. Kisann-la Simon, ek kifer seki Filip fer, kitfwa atir li?

⁹ Filip fer boukou mirak dan Samari. Par exanp, li geri bann dimounn ki andikape ek mem pous bann move lespri. (Zist. 8:6-8) Ena enn zom ki bien inpresione ar don ki Filip ena pou fer bann mirak. Sa zom-la apel Simon, ek li enn mazisien. Bann dimounn telman respekte li, ki zot dir: “Sa zom-la limem Pwisans Bondie.” Gras-a bann mirak ki Filip fer, Simon kapav trouv vre pouvwar Bondie avek so prop lizie. Apre sa, Simon vinn enn krwayan. (Zist. 8:9-13) Me enn sitiasion  pou arive ek pou montre si Simon inn vinn enn krwayan pou bann bon rezon ouswa non. Anou get sa.

10. (a) Ki Pier ek Zan fer dan Samari? (b) Ki Simon fer kan li trouve ki bann disip gagn lespri sin apre ki Pier ek Zan poz lame lor zot?

¹⁰ Kan bann zapot tande ki boukou Samariten inn vinn bann Kretien, zot avoy Pier ek Zan laba. (Get lankadre “ Pier Servi ‘Bann Lakle Rwayom.’”) Kan sa de zapot-la ariv dan Samari, zot poz lame lor bann nouvo disip, ek lerla, bann-la gagn lespri sin. b Kan Simon trouv bann zapot fer sa, li bien inpresione. Lerla, li dir bann zapot: “Donn mwa osi sa pouvwar-la pou ki tou bann dimounn lor ki mo poz mo lame kapav gagn lespri sin.” Simon mem propoz bann zapot pou donn zot kas. Li panse ki li kapav aste sa privilez-la!​—Zist. 8:14-19.

11. Ki konsey bien ferm Pier donn Simon, ek kouma Simon reazir?

¹¹ Pier reponn Simon dan enn fason bien ferm. Li dir li: “Twa ek to larzan pou detrir ansam, parski to’nn panse ki avek larzan to kapav gagn kado ki Bondie done gratwitman. To pena ni par ni porsion ladan, parski devan lizie Bondie to pena enn leker drwat.” Apre sa, Pier ankouraz Simon pou repanti ek priye Bondie pou gagn so pardon. Pier dir li: “Sipliy Zeova pou ki si posib, li kapav pardonn twa pou move lintansion ki to ena dan to leker.” Simon pa enn move dimounn; li anvi  fer seki drwat, me dan sa ler-la, li swiv so bann move dezir. Lerla, li demann bann zapot: “Sipliy Zeova pou mwa pou ki nanye dan seki zot finn dir pa ariv mwa.”​—Zist. 8:20-24.

12. Ki ete “simonia,” ek kouma sa finn vinn enn piez pou bann relizion ki swadizan Kretien?

¹² Seki Pier ti dir Simon pou koriz li, li enn lavertisman pou bann Kretien azordi, konsernan aste ouswa vann bann privilez dan lasanble. Mo latin “simonia” baze lor seki Simon inn fer, ek li fer referans ar aste ouswa vann bann pozision ouswa bann privilez dan enn kontex relizie. Se enn kitsoz ki bann relizion ki swadizan Kretien abitie fer. Par exanp, enn ansiklopedi (The Encyclopædia Britannica) ki’nn pibliye an 1878, dir ki li paret ki bann Lepap ki ti nome, ti peye pou gagn sa pozision-la. Sa ansiklopedi-la dir osi ki boukou pa ti gagn onte pou fer sa, ek ki zot pa ti mem esey kasiet sa.

13. Dan ki sans bann Kretien bizin fer atansion pou pa pratik “simonia”?

¹³ Bann Kretien bizin fer atansion ki zot pa pratik “simonia,” parski sa li enn pese. Par exanp, fode pa ki nou donn bann kado ouswa fer bann konpliman exazere ar bann ki ena enn sertenn lotorite dan lasanble, zis pou gagn bann faver, lezot privilez, ouswa plis responsabilite. Me bann ki ena enn sertenn lotorite, zot osi zot bizin fer atansion. Fode pa zot donn faver ouswa fer preferans anver bann dimounn ki ena kas. Toule-de fason azir pa bon, parski nou pe swa aste swa vann bann privilez. Tou bann serviter Zeova bizin konport zot kouma “enn kikenn ki pli tipti,” ek les lespri sin Zeova swazir kisann-la pou asim bann responsabilite dan lasanble. (Lik 9:48) Bann dimounn ki rod zot “prop laglwar,” pena zot plas dan lorganizasion Bondie.​—Prov. 25:27.

14. Kisann-la sa “ofisie lakour etiopien” la, ek kotsa Filip zwenn li?

¹⁴ Aster-la, anz Zeova demann Filip pou al lor sime ki sorti Zerizalem pou al Gaza. Eski Filip pe demann limem kifer li bizin al laba? Si wi, li gagn so repons kan li zwenn enn ofisie etiopien ki “pe lir liv profet  Izai for.” (Get lankadre “ Kisann-la Sa ‘Ofisie Lakour’ Etiopien La?”) Lespri sin Zeova pous Filip pou koste kot kales sa zom-la. Pandan ki Filip pe galoupe akote kales-la, li demann Etiopien-la: “Eski vremem to konpran seki to pe lir?” Etiopien-la dir li: “Be kouma mo pou konpran si personn pa gid mwa?”​—Zist. 8:26-31.

15. Kouma sa Etiopien-la reazir ar mesaz Filip, ek kifer nou kapav dir ki li pa’nn pran batem lor enn kout tet? (Get not.)

¹⁵ Apre sa, Etiopien-la fer Filip mont lor so kales. Esey mazinn sa zoli konversasion ki zot gagne la! Parey kouma boukou dimounn, sa Etiopien-la pa kone kisann-la sa “mouton,” ouswa sa “serviter,” lor ki profet Izai ti pe koze la. (Iza. 53:1-12) Pandan ki zot pe vwayaze, Filip explik sa ofisie lakour etiopien la, ki sa profesi Izai la pe koz lor Zezi Kris. Sa Etiopien-la, ki ti deza konverti dan relizion zwif, kone ki li bizin fer, parey kouma bann ki ti pran batem pandan Lapantkot 33 N.L. Li dir Filip: “Gete! Ala delo; ki anpes mwa pran batem?” Deswit, Filip batiz sa Etiopien-la! c (Get lankadre “ Batize dan ‘enn Plas Kot Ti Ena Delo.’”) Apre sa, lespri sin Zeova diriz Filip dan so nouvo afektasion, dan Asdod. Laba, li kontign pres lor bon nouvel.​—Zist. 8:32-40.

16, 17. Azordi, kouma bann anz ed nou dan predikasion?

¹⁶ Azordi, bann Kretien ena privilez pou fer mem travay ki Filip. Souvan, zot kapav koz lor Rwayom Bondie avek bann dimounn ki zot zwenn toulezour, kouma par exanp kan zot vwayaze. Dan boukou ka, li paret ki se pa enn kwinsidans kan zot zwenn bann dimounn ki sinser. Sa pa etonn nou, parski Labib montre ki bann anz pe diriz travay predikasion, pou ki bann dimounn dan “tou bann nasion, tribi, lang, ek pep” tann mesaz  bon nouvel. (Rev. 14:6) Zezi ti dir osi ki bann anz ti pou gid bann ki pe pres bon nouvel. Kan Zezi ti servi lexanp dible ek move-zerb, li ti dir ki pandan peryod rekolt, setadir peryod lafin sa lemond-la, “bann ki fer rekolt se bann anz.” Li ti dir osi ki sa bann anz-la pou “tir dan so Rwayom tou bann kitsoz ki fer lezot fer pese ek bann dimounn ki pratik bann move kitsoz.” (Mat. 13:37-41) Zeova pe servi bann anz pou rasanble bann ki ena lesperans pou al regne dan lesiel, ek “enn gran lafoul” bann “lezot mouton” pou form parti so pep.​—Rev. 7:9; Zan 6:44, 65; 10:16.

¹⁷ Ki prev nou ena ki bann anz pe vremem diriz travay predikasion? Souvan kan nou prese, boukou dimounn dir nou ki zot ti pe priye Bondie pou gagn led. Anou pran enn lexanp. De Temwin ti pe prese ansam avek enn zanfan. Kan sa de Temwin-la ti pe pans pou aret prese, zanfan-la ti bien anvi al tap prosin laport. Enn kout, zanfan-la inn kit zot ek inn al tap laport-la li tousel! Enn madam inn sorti ek sa de Temwin-la inn koste. Zot ti etone kan madam-la ti dir zot ki li ti pe priye Bondie pou avoy enn kikenn pou ed li konpran Labib. Bann-la inn koumans enn letid Labib avek li!

18. Kifer fode zame ki nou konsider nou predikasion kouma enn kitsoz ki banal?

¹⁸ Twa ki form parti lasanble, to ena privilez pou travay ansam avek bann anz dan predikasion ki pe fer partou dan lemond. Fode zame ki to konsider sa privilez-la kouma enn kitsoz ki banal. Alor, nou ankouraz twa pou kontign fer zefor pou prese, lerla to pou gagn boukou lazwa pou anons “bon nouvel konsernan Zezi.”​—Zist. 8:35.