1, 2. Kifer lapot Pol pa etone ki li pe gagn persekision dan Zerizalem?

 APRE ki Pol reisi sap dan lame enn lafoul ki bien ankoler dan Zerizalem, ankor enn fwa bann dimounn aret li. Sa zapot ki bien devwe la pa etone ki li pe gagn persekision isi dan Zerizalem. Ti fini dir li ki se dan sa lavil-la, ki li ti pou al dan ‘prizon ek gagn persekision.’ (Zist. 20:22, 23) Ek mem si Pol pa kone exakteman ki pe atann li apre, li kone ki li pou kontign soufer akoz nom Zezi.​—Zist. 9:16.

² Mem bann profet ki ti bann Kretien, ti averti Pol ki ti pou atas li ek livre li “dan lame bann dimounn lezot nasion.” (Zist. 21:4, 10, 11) Pa tro lontan, bann Zwif ti esey touy li, ek inpe apre sa, li paret ki bann manb Sanedrin ki ti pe diskite akoz li, ti pre pou “touy” li. Aster-la, sa zapot-la enn prizonie ek se bann solda romin ki pe vey li. Li pou bizin osi repas devan lakour ek defann li kont bann lakizasion ki’nn met lor li. (Zist. 21:31; 23:10) Vremem, lapot Pol bien bizin lankourazman!

3. Kotsa nou gagn lankourazman pou kontign nou travay predikasion?

³ Nou kone ki dan lepok lafin, “tou bann ki anvi res atase ar Bondie ek viv dan linite avek Kris Zezi pou gagn persekision zot osi.” (2 Tim. 3:12) Nou osi detanzantan nou bizin bann lankourazman pou kapav kontign prese. Nou bien rekonesan anver “esklav fidel ek saz,” parski li donn nou bann lankourazman dan bann renion ek dan bann piblikasion ek sa, dan moman ki bizin! (Mat. 24:45) Zeova donn nou lasirans ki okenn lennmi bon nouvel pa pou reisi. Zot pa pou kapav eliminn so bann serviter antan-ki enn group ouswa aret zot travay predikasion. (Iza. 54:17; Zer. 1:19) Me ki nou kapav dir konsernan lapot Pol? Eski li pou gagn lankourazman pou kontign rann temwaniaz afon malgre persekision? Si wi, ki sa lankourazman-la sa, ek kouma li reazir?

4, 5. Ki lankourazman Pol gagne, ek kifer sa arive dan bon moman?

⁴ Lanwit kot Pol reisi sap dan lame Sanedrin, li gagn lankourazman ki bizin. Labib dir: ‘Lesegner debout akote li ek dir: “Pran  kouraz! Parski parey kouma to’nn rann temwaniaz lor mwa afon dan Zerizalem, koumsa mem to pou bizin rann temwaniaz dan Rom.”’ (Zist. 23:11) Seki Zezi dir bien ankouraz Pol, parski sa donn li lasirans ki li pou libere. Pol kone ki li pou reisi al Rom, ek li laba li pou gagn privilez pou rann temwaniaz lor Zezi.

⁵ Pol gagn sa lankourazman-la dan bon moman. So landemin mem, plis ki 40 Zwif ‘fer enn konplo ek fer enn serman ki zot pa pou ni manze ni bwar, tanki zot pa touy Pol.’ Konplo ek serman ki sa bann Zwif-la inn fer montre ki kantite zot determine pou touy lapot Pol. Zot panse ki si zot pa reisi fer sa, pou ariv zot enn maler, ouswa zot pou gagn enn malediksion. (Zist. 23:12-15) Sa bann zom-la inn manigans enn plan ek bann sef pret ek bann ansien dakor ar sa. Ki sa plan-la sa? Zot pe anvi ki Pol repas devan Sanedrin, pou ki swadizan bann-la poz li plis kestion konsernan so case. Lerla, kan Pol pou lor sime pou repas devan Sanedrin, sa bann zom-la pou sot lor li ek pou touy li.

6. Kouma Pol tann koz lor konplo ki ena kont li, ek kouma bann zenn kapav swiv lexanp Pol so neve?

⁶ Me selman, Pol so neve tann koz lor sa konplo-la, ek al sa rakont Pol. Lerla, Pol demann sa zenom-la pou al rakont sa Klod Lizias, komandan larme. (Zist. 23:16-22) Zeova vremem kontan bann zenn, ki azir parey kouma neve Pol. Avek kouraz sa bann zenn-la fer lintere pep Bondie pas avan zot prop lintere, ek avek fidelite, zot fer tou seki zot kapav pou fer Rwayom Bondie pas an premie dan zot lavi.

7, 8. Ki bann laranzman Klod Lizias fer pou ki Pol res an sekirite?

⁷ Klod Lizias enn komandan larme ki diriz 1,000 zom. Deswit kouma li tann konplo ki ena kont Pol, li donn lord 470 solda, bann zom arme ar lans, ek bann kavalie pou ki aswar mem zot kit Zerizalem avek Pol, pou amenn li Sezare. Enn fwa ki zot ariv laba, zot bizin amenn Pol ar Gouverner Felix. a Sezare se landrwa kot bann reprezantan gouvernman romin pou Zide dirize, ek mem si ena boukou Zwif laba, laplipar bann dimounn ki res laba, bann non-Zwif. Anplis, kartie zeneral larme romin pou Zide trouv laba. Dan Sezare ena lord ek lape, ek sa bien diferan ar Zerizalem. Bann abitan Zerizalem ena boukou prezize ek souvan zot violan anver bann dimounn lezot relizion.

⁸ An-akor avek lalwa romin, Lizias avoy Felix enn let pou explik Pol so sitiasion. Lizias dir ki kan li’nn aprann ki Pol enn sitwayen romin, li’nn sov Pol ar bann Zwif ki ti “pre pou touy” li. Lizias dir osi ki li pa’nn trouv Pol koupab okenn kitsoz ki “merit lamor ouswa prizon.”  Me kan li’nn tann dir ki pe fer enn konplo kont Pol, li’nn avoy Pol ar Felix, pou ki gouverner kapav tann bann ki pe akiz Pol ek pran enn desizion konsernan so sitiasion.​—Zist. 23:25-30.

9. (a) Kouma Lizias pa’nn respekte drwa ki Pol ena antan-ki sitwayen romin? (b) Kifer nou kapav servi bann drwa ki nou ena antan-ki enn sitwayen?

⁹ Eski tou seki Lizias ekrir vre? Non, pa san poursan. Li paret ki Lizias fer li pas pou bon devan gouverner. Avredir, Lizias pa’nn vinn sov Pol parski li’nn rann li kont ki Pol enn sitwayen romin. Anplis, Lizias pa’nn dir ki li’nn fer “atas [Pol] avek de lasenn” ek ki plitar li’nn lord pou “fwet [Pol] pou li koze.” (Zist. 21:30-34; 22:24-29) Kan Lizias inn fer sa, li pa’nn respekte drwa ki Pol ena antan-ki enn sitwayen romin. Azordi, Satan servi bann fanatik relizie pou persekit pep Bondie, ek parfwa zot esey anpes nou servi liberte ki nou ena pou ador Bondie. Me parey kouma Pol, souvan pep Bondie pa ezite pou servi drwa ki zot ena antan-ki sitwayen pou gagn proteksion ki bizin.

10. Ki bann lakizasion bien grav bann-la met lor Pol?

¹⁰ Dan Sezare, gouverner fer ‘bann gard met Pol dan pale Erod pou vey li,’ an-atandan ki bann ki akiz Pol vinn depi Zerizalem. (Zist. 23:35) Sink zour plitar, Gran Pret Ananias, Tertilis ki enn avoka, ek enn group ansien desann Sezare pou koz kont Pol. Tertilis koumans par remersie Felix pou tou seki li pe fer pou bann Zwif. Li kler ki li pe fer sa pou flat Felix ek pou gagn so faver. b Apre sa, kan Tertilis koumans koz lor case Pol, li dir: Pol “enn nwizans, ki pe provok bann rebelion parmi bann Zwif partou lor later, ek limem ki sef dan sekt bann Nazareen. Li’nn osi esey fer tanp vinn inpir, alor nou’nn trap li.” Bann lezot Zwif ‘donn koudme pou akiz Pol ek zot konfirme ki sa bann kitsoz-la vre.’ (Zist. 24:5, 6, 9) Kan bann-la dir ki li’nn esey rebel kont gouvernman, ki li sef enn sekt ki danzere, ek ki li’nn fer tanp vinn inpir, se bann lakizasion ki bien grav, parski ti kapav kondann enn dimounn amor akoz sa.

11, 12. Kouma Pol defann li kont bann lakizasion ki’nn met lor li?

¹¹ Apre sa, Pol gagn permision pou koze. Pou koumanse, li dir: “Mo kontan pou defann mwa devan twa.” Apre sa, li dir ki tou sa bann lakizasion  ki’nn mete kont li la, fos. Lapot Pol pa’nn ni fer tanp vinn inpir, ni esey fer bann dimounn lev kont gouvernman. Li montre ki ofet, pandan “boukou lane” li pa ti dan Zerizalem ek ki li ti’nn vini pou amenn “larzan,” setadir bann kontribision pou bann Kretien ki kitfwa ti vinn pov akoz lafaminn ek persekision. Pol montre bien ki avan ki li ti rant dan tanp, li ti “fini fer seremoni pirifikasion” ek ki li ti fer boukou zefor pou “gard enn konsians kler devan Bondie ek bann zom.”​—Zist. 24:10-13, 16-18.

¹² Me selman, Pol rekonet ki ‘kan li pe swiv seki bann-la apel enn sekt,’ li pe ador Bondie so bann anset. Ek li presize ki li krwar dan “tou seki finn ekrir dan Lalwa ek dan liv bann Profet,” ek ki parey kouma bann dimounn ki pe akiz li, li krwar dan “rezireksion bann dimounn ki drwat ek bann dimounn ki inzis toule-de.” Apre sa, Pol demann bann ki pe akiz li pou donn bann prev pou bann lakizasion ki’nn met lor li: “Les sa bann zom ki isi la dir zotmem pou ki move kitsoz zot ti trouv mwa koupab kan mo ti devan Sanedrin, apart enn sel kitsoz ki mo ti dir bien for kan mo ti pe debout devan zot: ‘Azordi pe ziz mwa akoz mo krwar dan rezireksion bann mor!’”​—Zist. 24:14, 15, 20, 21.

13-15. Kifer nou kapav swiv bon lexanp Pol kan bizin rann temwaniaz ar bann lotorite?

¹³ Pol inn les enn bon lexanp pou nou, si arive enn zour nou bizin pas devan bann lotorite akoz nou ladorasion pou Bondie. Kitfwa nou bann lennmi kapav dir ki nou pe revolte kont gouvernman, ouswa ki  nou pe ankouraz bann dimounn pou vinn violan, ouswa ki nou bann manb enn “sekt ki danzere.” Pol pa parey kouma Tertilis, li pa dir gouverner bann parol ki pou flat li. Pol res kalm ek montre respe. Avek takt, li rann enn temwaniaz ki kler ek onet. Pol dir ki bann “Zwif ki sorti dan provins Lazi” ek ki ti dir ki li’nn fer tanp vinn inpir, pa la azordi. Li dir osi ki dapre lalwa, li gagn drwa afront sa bann dimounn-la ek ekout bann lakizasion ki zot ena kont li.​—Zist. 24:18, 19.

¹⁴ Me seki pli inportan, Pol pa gagn per pou koz lor so bann krwayans. Avek kouraz, Pol ankor enn fwa koz lor so krwayans lor rezireksion, mem si sa size-la ti kree divizion kan li ti pas devan Sanedrin. (Zist. 23:6-10) Kan Pol pe defann li, li met laksan lor lesperans rezireksion. Kifer? Parski Pol pe rann temwaniaz lor Zezi ek lor so rezireksion, enn kitsoz ki so bann lennmi pa aksepte. (Zist. 26:6-8, 22, 23) Avredir, se parski Pol krwar dan rezireksion ek sirtou dan rezireksion Zezi, ki li pe pas devan lakour.

¹⁵ Parey kouma Pol, nou kapav rann temwaniaz avek kouraz ek vinn for gras-a seki Zezi ti dir so bann disip: “Tou dimounn pou ena laenn pou zot akoz mo nom. Me sa kikenn ki’nn andire ziska lafin la pou sape.” Eski nou bizin trakase ar seki nou bizin dir? Non. Parski Zezi donn nou sa lasirans-la: “Kan bann-la pou amenn zot devan bann lotorite, pa gagn traka ki zot pou dir avan ler; dan sa ler-la zot pou kone ki pou dir, parski se pa zot ki pou koze, me lespri sin.”​—Mark 13:9-13.

16, 17. (a) Ki Felix fer ek dir kan Pol pas devan lakour? (b) Kifer kitfwa Felix per, me pou ki rezon li kontign fer apel Pol pou koz avek li?

¹⁶ Se pa premie fwa ki Gouverner Felix tann koz lor bann krwayans bann Kretien. Labib dir: ‘Felix ki konn boukou kitsoz lor sa Semin-la [lexpresion ki servi pou koz lor bann premie Kretien], ranvway sa ka-la pou plitar ek dir: “Kan komandan Lizias pou desann, mo pou pran enn desizion lor zot ka.” Ek li donn lord ofisie larme pou gard Pol dan prizon me pou donn li enn sertin liberte, ek permet so bann kamarad donn li seki li bizin.’​—Zist. 24:22, 23.

¹⁷ De-trwa zour plitar, Felix ek so fam Drisil, ki enn Zwiv, fer apel Pol ek “ekout li koz lor so krwayans lor Kris Zezi.” (Zist. 24:24) Selman, kan Pol “koz lor lazistis, lor kontrol lor noumem ek lor zizman ki pou vini,” Felix gagn per. Kitfwa so konsians pe fatig li, parski li’nn fer boukou move kitsoz. Alor, li fer Pol ale ek dir li: “To kapav ale aster, me kan mo gagn lokazion mo pou fer apel twa ankor.” Apre sa, Felix re-apel Pol plizir fwa pou koz avek li, me pa parski li anvi konn laverite, me parski li espere ki Pol pou donn li enn brayb.​—Zist. 24:25, 26.

18. Kifer Pol koz “lor lazistis, lor kontrol lor noumem ek lor zizman ki pou vini” ar Felix ek so madam?

 ¹⁸ Kifer Pol koz “lor lazistis, lor kontrol lor noumem ek lor zizman ki pou vini” ar Felix ek so madam? Rapel ki zot fer apel Pol pou kone ki sa inplike pou ‘krwar dan Kris Zezi.’ Pol kone ki Felix ek so madam zot imoral, kriel, ek inzis, ek li fer zot konpran dan enn fason kler seki Bondie atann ar tou bann ki anvi swiv Zezi. Seki Pol dir montre diferans ki ena ant bann prinsip Bondie lor lazistis ek fason ki Felix ek so madam pe viv. Sa bizin ed Felix ek so madam pou konpran ki tou dimounn ena bann kont pou rann Bondie lor seki zot panse, dir, ek fer. Ek desizion ki zot pou pran konsernan Pol, li nanye ditou konpare ar zizman ki zot pou gagne ar Bondie. Akoz samem Felix “gagn per”!

19, 20. (a) Kan nou prese, ki nou kapav fer kan nou zwenn bann dimounn ki paret interese, me ki pa anvi sanze? (b) Kouma nou kone ki Felix pa vremem Pol so kamarad?

¹⁹ Kan nou prese, kitfwa nou pou zwenn bann dimounn ki parey kouma Felix. O-koumansman, zot paret interese ar laverite, me an realite zot pa anvi obeir Bondie ek sanz zot fason viv. Nou bizin fer atansion kan nou esey ed zot. Me parey kouma Pol, avek takt nou kapav montre zot ki zot bizin fer pou fer Bondie plezir. Kitfwa sa bann verite-la pou tous zot leker. Selman, si nou trouve ki zot pena lintansion pou aret fer seki Zeova pa kontan, nou pa pou fors zot pou sanze ek nou pou al rod bann dimounn ki vremem anvi konn laverite.

²⁰ Dan ka Felix, seki Labib dir ed nou pou trouve seki vremem ena dan so leker: ‘Me apre ki de-z-an inn pase, Porsis Festis ranplas Felix; ek parski Felix anvi gagn faver bann Zwif, li les Pol dan prizon.’ (Zist. 24:27) Felix pa vremem Pol so kamarad. Felix kone ki bann ki swiv “Semin Bondie” pa pe esey revolte kont gouvernman ouswa pa pe pous lezot pou fer sa. (Zist. 19:23) Li kone osi ki Pol pa’nn fer nanye kont lalwa romin. Kanmem sa, Felix les lapot Pol dan prizon pou “gagn faver bann Zwif.”

21. Ki ariv Pol apre ki Porsis Festis vinn gouverner, ek ki kitsoz nou sir fer Pol kontign res for?

²¹ Kouma nou trouve dan dernie verse dan Zistwar Bann Zapot sapit 24, Pol touzour dan prizon kan Porsis Festis ranplas Felix kouma gouverner. Ek apartir sa moman-la, li pas devan diferan ofisie gouvernman. Vremem, avek kouraz sa zapot-la pas “devan bann lerwa ek bann gouverner.” (Lik 21:12) Kouma nou pou trouve apre, li pou rann temwaniaz devan pli gran dirizan ki ti ena dan so lepok. Me pandan tou sa bann leprev-la, Pol so lafwa kontign res for. Pena dout ki li kontign vinn for gras-a bann parol ki Zezi ti dir li: “Pran kouraz!”