1. Ki lasirans Pol ek so bann konpagnon ena, ek kifer?

 NOU ver lane 59 N.L. Enn gro bato pe kit Malt, dan Lamer Mediterane, pou al Litali. Lor lavan bato-la, ena skilptir “Bann Garson Zeis” ek sa bato-la pe sarye enn kargezon sereal. Parmi bann pasaze ena osi Pol, ki touzour enn prizonie anba lagard enn ofisie romin, ek Lik ek Aristark, so bann konpagnon. (Zist. 27:2) Konpare ar bann manb lekipaz, sa bann predikater-la pa rod bann zimo Kastor ek Polix zot proteksion. Kastor ek Polix ti bann garson Zeis, enn bondie grek. (Get not pou letid pou Zistwar Bann Zapot 28:11 dan mwbr19.01.) Parkont, Pol ek so bann konpagnon servi Zeova, ek Zeova ti fer Pol kone ki li pou rann temwaniaz lor laverite dan Rom ek devan Sezar.​—Zist. 23:11; 27:24.

2, 3. Kotsa Pol so bato pase, ek pandan tou sa letan-la kisann-la soutenir Pol?

² Trwa zour apre zot ariv Sirakiz. Sirakiz enn zoli lavil ki trouv dan Sisil ek ki osi inportan ki lavil Atenn ek Rom. Apre sa, bato-la al Regiom, dan Lesid Litali. Regiom, trouv 320 kilomet ar lepor Piteoli (pa lwin ar Nap azordi), dan Litali. Enn divan ki sorti Lesid pous bato-la telman vit, ki li ariv Piteoli dan de zour.​—Zist. 28:12, 13.

³ Nou’nn ariv dan dernie parti Pol so vwayaz pou al Rom, ek laba li pou pas devan Lanperer Neron. Toutlong so vwayaz “Bondie ki konsol bann dimounn” ti la pou Pol. (2 Kor. 1:3) Kouma nou pou trouve, Zeova kontign soutenir Pol, ek antan-ki enn misioner, Pol kontign montre enn gran devouman.

4, 5. (a) Kouma bann frer dan Piteoli montre lospitalite anver Pol ek so bann konpagnon, ek kifer kitfwa Pol gagn sa kantite liberte-la? (b) Ki bienfe bann Kretien kapav gagne gras-a zot bon kondwit, mem kan zot dan prizon?

⁴ Kan Pol ek so bann konpagnon ariv Piteoli, zot ‘zwenn bann frer ek bann-la insiste pou ki zot res avek zot pandan set zour.’ (Zist. 28:14) Sa bann frer-la vremem enn zoli lexanp lospitalite pou bann Kretien! Pena dout ki sa bann frer-la rekonpanse pou zot lospitalite, parski zot gagn boukou lankourazman avek Pol ek so bann konpagnon. Kouma li posib  ki enn prizonie kapav gagn sa kantite liberte-la? Kitfwa bann solda fer Pol konfians parski li ena enn bon kondwit.

⁵ Azordi osi parey, bann serviter Bondie ki dan prizon gagn bann privilez ouswa sertin liberte, gras-a zot bon kondwit. Par exanp, dan Roumani enn zom ki ti kondane pou 75 an prizon parski li ti enn voler, ti koumans etidie Labib ek ti fer bann gran sanzman dan so personalite. Gardien prizon ti remark bann sanzman ki li ti fer ek ti fer li konfians. Gardien-la ti telman fer li konfians ki li ti les li al dan lavil pou aste bann kitsoz pou prizon, san ki personn vey li. Kitsoz ki pli inportan, se ki nou bon kondwit donn laglwar Zeova!​—1 Pier 2:12.

6, 7. Kouma bann frer dan Rom montre ki zot bien kontan Pol?

⁶ Depi Piteoli, kitfwa Pol ek so bann konpagnon mars anviron 50 kilomet lor Semin Apienn pou al Kapoue. Sa semin-la al Rom ek li’nn fer ar bann gro ros lalav (lava) ki plat. Bann ki pran sa semin-la kapav trouv bann zoli vi dan Litali ek Lamer Mediterane. Sa semin-la pas dan enn landrwa kot ena bann marekaz, ki apel Marekaz Pontin, ek Bazar Apiyis trouv laba. Sa landrwa-la trouv anviron 60 kilomet ar Rom. Lik dir ki kan bann frer dan Rom ‘tann dir ki nou pe vini,’ sertin frer vinn zwenn nou kot Bazar Apiyis, ek lezot atann nou kot Trwa Loberz, enn plas kot bann dimounn abitie arete pou repoze, ek ki trouv anviron 50 kilomet ar Rom. Seki sa bann frer-la fer, montre ki kantite zot kontan Pol!​—Zist. 28:15.

⁷ Bazar Apiyis pa enn plas kot bann vwayazer ki fatige kapav repoze. Oras, enn poet romin, dekrir Bazar Apiyis kouma enn plas ki “ranpli ar bann marin ek bann proprieter loberz ki ti brit.” Li ti osi  ekrir ki laba “delo-la ti degelas,” ek li ti mem refiz pou manz laba! Malgre sa bann move kondision-la, sa bann frer ki sorti Rom la atann Pol ek so bann konpagnon avek lazwa. Zot fer sa parski zot anvi akonpagn Pol ziska Rom.

8. Kifer Pol remersie Bondie kan ‘li trouv’ so bann frer?

⁸ Labib dir: ‘Kan Pol trouv so bann frer, li remersie Bondie ek li pran kouraz.’ (Zist. 28:15) Kouma Pol trouv so bann frer, sa rekonfort li ek donn li kouraz, ek kitfwa parmi sa bann frer-la, ena ki li kone personelman. Kifer Pol remersie Bondie? Parski li kone ki lamour form parti frwi lespri sin. (Gal. 5:22) Azordi osi, lespri sin pous bann Kretien pou fer bann sakrifis pou sakenn zot kamarad ek pou rekonfort bann ki bizin led.​—1 Thess. 5:11, 14.

9. Kouma nou kapav imit lespri sakrifis bann frer ki’nn al zwenn Pol?

⁹ Par exanp, lespri sin pous bann frer ek ser pou montre lospitalite anver bann responsab sirkonskripsion, bann misioner, ek bann lezot serviter aplintan. Boukou parmi zot finn fer bann gran sakrifis pou fer plis pou Zeova. Demann tomem: ‘Eski mo kapav fer plis kan responsab sirkonskripsion vizit mo lasanble, par exanp kan mo montre lospitalite anver li ek so madam, si li marye? Eski mo kapav fer bann laranzman pou pres ansam avek zot?’ To kapav sir, ki to pou gagn boukou benediksion. Par exanp, mazinn lazwa ki bann frer dan Rom resanti kan Pol ek so bann konpagnon rakont bann lexperyans ki bien ankourazan.​—Zist. 15:3, 4.

10. Dan ki sitiasion Pol ete dan Rom, ek ki li fer inpe apre ki li ariv laba?

¹⁰ Kan Pol ek bann ki vwayaz ansam avek li ariv Rom, ‘Pol gagn permision pou res dan enn lakaz li tousel avek solda ki pe vey li.’ (Zist. 28:16) Normalman, enn prizonie ki ti res dan enn lakaz ti ansene ansam avek ofisie ki ti vey li, pou ki li pa sove. Kanmem sa, Pol ki enn proklamater bon nouvel, pa les sa bann lasenn-la anpes li pres bon nouvel. Apre ki Pol repoz li pandan trwa zour, li fer apel bann zom inportan parmi bann Zwif ki trouv dan Rom, pou fer zot kone kisann-la li ete ek pou rann temwaniaz.

11, 12. Ki Pol dir bann Zwif dan Rom pou ki li kapte zot latansion?

¹¹ Pol dir: “Mo bann frer, mem si mo pa’nn fer nanye kont lepep ek kont bann koutim nou bann anset, finn met mwa dan prizon dan Zerizalem ek finn livre mwa dan lame bann Romin. Ek apre ki zot ti examinn mo ka, zot ti anvi larg mwa, parski pa ti ena okenn rezon pou kondann mwa amor. Me kan bann Zwif pa ti dakor, mo ti oblize fer apel ar Sezar, me mo pa ti ena okenn lintansion pou akiz mo nasion.”​—Zist. 28:17-19.

 ¹² Kan Pol koz avek bann Zwif li apel zot “mo bann frer.” Pol fer sa pou montre ki li ena enn kitsoz an komin avek zot ek pou tir bann prezize ki zot kapav ena. (1 Kor. 9:20) Anplis, li montre zot dan enn fason kler ki li la, pa pou akiz bann Zwif, me ki li la parski li’nn fer apel ar Sezar. Selman, bann Zwif ki res Rom pa kone ki Pol inn fer apel ar Sezar. (Zist. 28:21) Kifer bann Zwif dan Zide pa’nn fer bann Zwif dan Rom konn sa? Enn liv referans dir ki ‘apre liver, enn parmi bann premie bato ki ti ariv Litali se bato lor ki Pol ti vwayaze. Bann Zwif dan Zerizalem pa’nn kapav avoy personn ouswa avoy enn let konsernan Pol, parski pandan liver bann bato pa ti abitie navige.’

13, 14. Kouma Pol koumans koz lor Rwayom Bondie, ek kouma nou kapav imit li?

¹³ Apre sa, Pol koumans koz lor mesaz Rwayom dan enn fason ki fer bann-la anvi konn plis. Li dir: “Ala kifer mo’nn demann pou trouv zot ek pou koz ar zot, parski se akoz lesperans ki pep Izrael ena ki mo ena sa lasenn-la.” (Zist. 28:20) Biensir sa lesperans ki bann Izraelit ena la konsern Lemesi ek so Rwayom, ek se lor lamem ki bann Kretien pe prese. Bann Zwif dir li: “Nou panse ki li bon nou tann seki to ena pou dir, parski nou kone ki partou bann dimounn pe koz an mal lor sa group dan ki to ete la.”​—Zist. 28:22.

¹⁴ Kan nou prese, nou kapav imit Pol kan nou servi bann kestion ouswa dir bann kitsoz ki pou fer bann dimounn anvi konn plis lor Labib. Nou gagn bann bon sigzesion dan bann piblikasion kouma:  Comment raisonner à partir des Écritures, Tirez profit de l’École du ministère théocratique, Amelior To Lektir ek To Lansegnman, ek Kaye Renion Lavi Kretien ek Predikasion. Eski to pe bien servi sa bann zouti-la?

15. Ki kat kitsoz nou kapav aprann ar fason ki Pol prese?

¹⁵ Pol fer bann laranzman pou zwenn bann Zwif enn lot zour. Kan sa zour-la arive, zot vinn kot Pol “avek boukou plis dimounn.” Pol explik zot bann Lekritir ‘depi gramatin ziska aswar ek rann temwaniaz afon konsernan Rwayom Bondie ek li servi Lalwa Moiz ek liv bann Profet pou konvink zot pou krwar dan Zezi.’ (Zist. 28:23) Nou kapav aprann kat kitsoz ar fason ki Pol prese. Premie, so mesaz tourn otour Rwayom Bondie. Deziem, li koz dan enn fason ki konvink bann ki pe ekout li. Trwaziem, li rezonn avek zot lor bann Lekritir. Katriem, li fer lintere bann ki pe ekout li pas avan so prop lintere, kan li pres avek zot “depi gramatin ziska aswar.” Pol vremem enn bon lexanp pou nou! Apre ki Pol inn rann temwaniaz, ki lefe sa ena? ‘Sertin koumans krwar,’ alor ki lezot pa krwar. Lik dir bann dimounn koumans diskite ant zot ek sertin “koumans ale.”​—Zist. 28:24, 25a.

16-18. Kifer sa pa enn sirpriz pou Pol ki bann Zwif dan Rom rezet so mesaz, ek ki santiman nou bizin ena kan bann dimounn rezet nou mesaz?

¹⁶ Seki arive pa enn sirpriz pou Pol, parski li kone ki Labib ti dir ki sa ti pou arive, ek sa ti deza ariv li avan. (Zist. 13:42-47; 18:5, 6; 19:8, 9) Alor, li dir bann dimounn ki rezet so mesaz: “Lespri sin ti ena rezon kan li ti dir zot bann anset par mwayin profet Izai, ‘Al dir sa pep-la: “Zot pou tande me zot pa pou konpran nanye, ek zot pou gete me zot pa pou trouv nanye. Leker sa pep-la inn vinn dir kouma ros.”’” (Zist. 28:25b-27) Lexpresion ki’nn servi dan lang orizinal pou “vinn dir kouma ros” fer referans ar enn leker ki’nn “vinn epe,” ouswa ki’nn “angrese.” (Zist. 28:27) Li bien tris ki sa bann dimounn-la inn rezet laverite!

¹⁷ Pou fini, Pol dir bann Zwif ki rezet so mesaz: ‘Pena dout ki bann dimounn lezot nasion pou ekoute.’ (Zist. 28:28; Ps. 67:2; Iza. 11:10) Ek Pol kone ki seki li dir vre, parski li’nn deza trouv boukou non-Zwif aksepte mesaz lor Rwayom Bondie!​—Zist. 13:48; 14:27.

¹⁸ Parey kouma Pol, fode pa nou ofanse kan bann dimounn rezet bon nouvel. Anplis, nou kone ki bien tigit dimounn pou trouv semin ki amenn ver lavi. (Mat. 7:13, 14) Ek kan bann dimounn sinser pran pozision pou laverite, nou kontan, ek nou akeyir zot avek tou nou leker.​—Lik 15:7.

19. Malgre so sitiasion, kouma Pol fer so maximum?

¹⁹ Bann dernie parol ki Lik dir dan Zistwar Bann Zapot bien ankourazan. Li dir: ‘Pol res laba pandan de-z-an dan enn lakaz ki li lwe, ek li bien akeyir tou bann ki vinn get li. Li pres lor Rwayom Bondie ar zot ek ansegn lor Lesegner Zezi Kris avek enn gran kouraz, san ki nanye anpes li.’ (Zist. 28:30, 31) Wi, vremem Pol enn lexanp konsernan lospitalite, lafwa, ek devouman!

20, 21. Sit sertin dimounn ki Pol ede kan li dan Rom.

²⁰ Enn parmi bann dimounn ki Pol akeyir apel Onezim, enn esklav ki’nn sove depi Kolos. Pol ed Onezim pou vinn enn Kretien, ek Onezim vinn enn ‘frer ki fidel ek ki Pol bien kontan.’ Kan Pol koz lor Onezim li dir: “Mo zanfan Onezim. Mo’nn vinn kouma enn papa pou li.” (Kol. 4:9; File. 10-12) Alor, nou sir ki Onezim inn bien ankouraz Pol! a

²¹ Lezot osi gagn bann bienfe gras-a bon lexanp Pol. Pol ti dir bann Filipien: “Mo sitiasion inn permet lavansman bon nouvel, parski tou bann Gard Lanperer ek lezot dimounn kone ki mo dan prizon parski mo enn disip Kris. Laplipar parmi bann frer dan Lesegner inn gagn plis konfians parski mo dan prizon, ek zot pe montre ankor plis kouraz pou koz lor parol Bondie san okenn laper.”​—Fil. 1:12-14.

22. Kouma Pol servi so letan mem si li konfine dan Rom?

²² Pol konfine dan Rom, ek li servi sa letan-la pou ekrir bann let inportan, ki azordi form parti bann Lekritir Grek Kretien. b Sa bann let-la bien ed bann Kretien dan premie siek. Nou osi nou gagn bann bienfe ar sa bann let-la, parski bann konsey ki ena ladan zot inspire par Bondie ek zot ankor itil pou nou azordi.​—2 Tim. 3:16, 17.

23, 24. Parey kouma Pol, azordi kouma bann Kretien kontign gard zot lazwa mem si zot al dan prizon?

²³ Mem si liv Zistwar Bann Zapot pa koz lor la, Pol libere apre kat-r-an, setadir de-z-an dan Sezare ek de-z-an dan Rom. c (Zist. 23:35; 24:27) Kanmem sa, li res pozitif ek li fer tou seki li kapav pou kontign servi Zeova. Azordi osi boukou serviter Zeova al dan prizon akoz zot lafwa, me zot kontign gard zot lazwa ek kontign prese. Anou get lexanp Adolfo  dan Lespagn. Li ti al dan prizon parski li pa ti anvi fer larme akoz so bann krwayans. Enn ofisie ti dir li: “Nou etone ar twa, parski plis nou ti pe rann to lavi amer ek fer twa boukou ditor, plis to ti souriyan ek dir bann mo zanti.”

²⁴ Avek letan, bann gardien ti telman fer Adolfo konfians, ki zot ti les laport so kaso ouver. Sertin gardien ti mem vinn get li pou poz li bann kestion lor Labib. Enn gardien ti mem vinn dan Adolfo so kaso pou lir Labib, pandan ki Adolfo ti pe veye ki lezot pa trouv gardien-la. Alor, se prizonie-la ki “ti pe veye” pou gardien-la! Anou les lexanp bann frer ki fidel koumsa, pous nou pou “montre ankor plis kouraz pou koz lor parol Bondie,” mem dan bann sitiasion difisil.

25, 26. Ki profesi extraordiner Pol inn trouv realize dan mwins ki 30 an, ek kouma nou pe trouv sa profesi-la realize azordi?

²⁵ Eski li pa ankourazan ki liv Zistwar Bann Zapot fini avek enn zapot Lekris ki enn prizonie, me ki kanmem sa pe “rann temwaniaz afon lor Rwayom Bondie” avek tou bann ki pe vizit li? Dan premie sapit liv Zistwar Bann Zapot, Zezi ti dir so bann disip: “Zot pou gagn pwisans kan lespri sin pou desann lor zot, ek zot pou vinn mo bann temwin dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:8) Mem pa 30 an apre, ‘finn pres mesaz lor Rwayom Bondie dan tou kreasion anba lesiel.’ d (Kol. 1:23) Sa montre nou ki kantite lespri sin Bondie li pwisan!​—Zaka. 4:6.

²⁶ Azordi osi, Bondie so lespri donn bann Kretien ki ena lesperans pou al dan lesiel ek bann “lezot mouton,” lafors pou “rann temwaniaz afon konsernan Rwayom Bondie” dan 240 pei! (Zan 10:16; Zist. 28:23) Eski to pe fer tou seki to kapav pou partisip dan sa travay-la?