1. Azordi, dan ki sans bann Temwin Zeova parey kouma bann Kretien dan premie siek?

 PAREY kouma bann Kretien dan premie siek, bann Temwin Zeova rann temwaniaz avek enn gran devouman. Avek limilite, zot aksepte led ek direksion ki lespri sin donn zot. Zot pa les persekision aret zot travay predikasion. Ek Bondie pe bien beni zot.

2, 3. Ki kitsoz extraordiner ena avek liv Zistwar Bann Zapot?

² Dan liv Zistwar Bann Zapot, ena bann zistwar ki bien interesan, dinamik, ek ki extraordiner, ek nou sir ki sa inn ankouraz twa ek fortifie twa! Pena okenn lot liv ki koumsa, parski se sel liv kot Bondie finn fer ekrir listwar bann premie Kretien.

³ Liv Zistwar Bann Zapot sit nom 95 dimounn, 32 pei ek landrwa, 54 lavil, ek 9 zil. Sa liv-la koz lor bann diferan dimounn: bann dimounn ordiner, bann sef relizie ki orgeye, bann politisien ki fier, ek bann persekiter ki araze. Me seki pli inportan, se ki li rakont zistwar nou bann frer ek ser dan premie siek. Nou trouve ki zot inn gagn bann problem ki bann dimounn gagne dan lavi toulezour me sirtou, kouma zot inn pres bon nouvel avek enn gran devouman.

4. Kifer nou santi nou pros avek bann dimounn kouma lapot Pol, Tabita, ek bann lezot temwin fidel dan lepase?

⁴ Liv Zistwar Bann Zapot koz lor lapot Pier ek lapot Pol ki ti bien devwe, Lik ki ti enn dokter ki bann dimounn ti bien kontan, Barnabas ki ti zenere, Etienn ki ti ena boukou kouraz, Tabita ki ti ena boukou lamour, Lidi ki ti montre lospitalite, ek lezot temwin fidel ankor. Mem si sa fer preske 2000 an ki sa bann dimounn-la inn viv, kanmem sa, nou santi nou bien pros avek zot. Kifer? Parski parey kouma zot, nou osi nou’nn gagn mision pou fer bann disip. (Mat. 28:19, 20) Wi se vremem enn gran loner pou kapav partisip dan sa mision-la!

5. Kotsa bann premie disip Zezi ti koumans prese?

⁵ Anou reflesi lor mision ki Zezi ti donn so bann disip. Li ti dir: “Zot pou gagn pwisans kan lespri sin pou desann lor zot, ek zot pou vinn mo bann temwin dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:8) Pou koumanse, lespri sin ti pou donn bann disip pwisans pou rann temwaniaz “dan Zerizalem.” (Zist. 1:1–8:3)  Apre sa, lespri sin ti pou diriz zot pou ki zot rann temwaniaz “partou dan Zide ek Samari.” (Zist. 8:4–13:3) Ek lerla, zot ti pou koumans pres bon nouvel “ziska dan bann landrwa pli lwin lor later.”​—Zist. 13:4–28:31.

6, 7. Kan nou prese, ki lavantaz nou ena konpare avek nou bann frer ek ser dan premie siek?

⁶ Nou bann frer ek ser dan premie siek pa ti ena zot prop kopi bann Lekritir Sakre pou rann temwaniaz. Zot pa ti ena osi bann diferan piblikasion pou kit avek bann dimounn ki interese. Liv Zistwar Bann Zapot ti fini ekrir ver lane 61 N.L. Avan sa, Pol ti ekrir zis de-trwa let ek Levanzil Matie ti disponib ver lane 41 N.L. Avan ki sertin Zwif vinn bann disip Zezi, zot ti abitie al sinagog, ek se laba ki zot ti tann lir bann Lekritir Ebre. (2 Kor. 3:14-16) Mem si laplipar parmi zot pa ti ena zot prop kopi bann Lekritir Ebre, zot ti bann bon etidian Labib parski kan zot ti prese, zot ti sit bann verse Lekritir ki zot ti rapel.

⁷ Azordi, laplipar parmi nou ena so prop kopi Labib ek enn kantite piblikasion ki baze lor Labib. Nou pe pres bon nouvel dan 240 pei ek dan boukou lang, seki permet nou akonpli nou mision pou fer bann disip.

8, 9. (a) Ki kitsoz lespri sin ti permet bann disip Zezi fer? (b) Ki kitsoz esklav fidel pe fer gras-a led lespri sin?

⁸ Kan Zezi ti donn so bann disip mision pou rann temwaniaz, li ti dir zot: “Zot pou gagn pwisans kan lespri sin pou desann lor zot.” Gras-a direksion lespri sin Bondie, ouswa lafors aktif Bondie, alafin bann disip Zezi ti pou reisi rann temwaniaz lor later antie. Gras-a lespri sin, Pier ek Pol ti geri bann malad, ti expilse bann demon, ek ti mem resisit bann dimounn! Me lespri sin ti donn bann premie Kretien pouvwar pou fer enn travay bien pli inportan ankor. Li ti permet bann zapot ek bann lezot disip donn bann lezot dimounn enn konesans exakt ki ti pou permet zot gagn lavi pou touletan.​—Zan 17:3.

⁹ Zour Lapantkot 33 N.L., bann disip Zezi ti “koz dan diferan lang, dapre seki lespri sin ti permet zot koze.” Lerla gras-a sa, zot finn kapav rann temwaniaz konsernan “bann kitsoz extraordiner ki Bondie inn fer.” (Zist. 2:1-4, 11) Li vre ki azordi Bondie pa fer enn mirak pou ki so bann serviter koz plizir lang. Me selman, gras-a lespri sin Bondie, esklav fidel pe prodir bann piblikasion ki baze lor Labib dan boukou lang. Par exanp, toule mwa nou inprim bann milyon kopi Latour Degard ek Leve!, ek lor nou sit Internet jw.org, nou ena bann piblikasion ki baze lor Labib ek bann video dan plis ki 1,000 lang. Tousala permet nou pou anons bann dimounn dan tou nasion, tribi, ek lang, “bann kitsoz extraordiner ki Bondie inn fer.”​—Rev. 7:9.

10. Depi 1989, ki finn fer konsernan tradiksion Labib?

¹⁰ Depi 1989, esklav fidel ek saz inn fer enn zefor bien spesial pou ki Tradiksion Lemond Nouvo. Bann Lekritir Sakre disponib dan boukou lang. Sa  Labib-la finn deza tradir dan plis ki 200 lang ek finn deza inprim plis ki 240 milyon kopi. Ek dan lavenir pou ena ankor boukou ki pou inprime. Se zis Bondie ek so lespri sin ki finn kapav fer sir ki Labib disponib pou tou sa bann dimounn-la.

11. Kouma nou bann piblikasion pe tradir?

¹¹ Azordi, dan plis ki 150 pei, ena bann milye Kretien ki port zot volonter pou fer sa travay tradiksion-la. Fode pa sa etonn nou, parski pena okenn lot lorganizasion ki lespri sin pe ede pou “rann temwaniaz afon” partou dan lemond konsernan Zeova, so Rwayom Mesianik, ek Rwayom ki finn deza etabli dan lesiel!​—Zist. 28:23.

12. Kouma Pol ek bann lezot Kretien ti kapav rann temwaniaz?

¹² Kan Pol ti rann temwaniaz ar bann Zwif ek bann non-Zwif dan Antios dan Pisidi, “bann ki ti ena enn bon kondision leker pou gagn lavi eternel ti vinn bann krwayan.” (Zist. 13:48) Alafin liv Zistwar Bann Zapot, Lik ekrir ki Pol pe “pres lor Rwayom Bondie . . . avek enn gran kouraz, san ki nanye anpes li.” (Zist. 28:31) Kotsa lapot Pol pe rann temwaniaz? Dan Rom, kapital pwisans mondial sa lepok-la! Bann disip Zezi dan premie siek ti servi diferan mwayin pou rann temwaniaz, par exanp parfwa zot ti pe fer li atraver bann diskour. Me si zot ti pe reisi fer tousala, se gras-a led ek direksion ki lespri sin ti donn zot.

13. Kifer nou bizin priye kan nou gagn persekision?

¹³ Kan bann disip Zezi dan premie siek ti gagn persekision, zot ti sipliy Zeova pou gagn kouraz. Kouma Zeova ti reponn zot lapriyer? Zot ti ranpli ar lespri sin ek lespri sin ti donn zot lafors pou prese avek kouraz. (Zist. 4:18-31) Nou osi nou priye pou gagn sazes ek lafors pou kontign rann temwaniaz mem kan nou gagn persekision. (Zak 1:2-8) Gras-a benediksion Bondie ek led so lespri sin, nou pe reisi kontign prese. Ek nanye pa kapav anpes nou kontign sa travay-la, ki bann dimounn pa kontan ki nou fer li ouswa ki zot persekit nou. Alor kan nou gagn persekision, nou bizin priye pou gagn lespri sin, sazes, ek kouraz pou kontign anons bon nouvel.​—Lik 11:13.

14, 15. (a) Ki’nn arive “akoz persekision ki ti ena apre lamor Etienn”? (b) Dan nou lepok, kouma boukou dimounn dan Siberi finn konn laverite?

¹⁴ Etienn ti rann temwaniaz avek boukou kouraz avan ki li mor dan lame so bann lennmi. (Zist. 6:5; 7:54-60) Akoz “gran persekision” ki ti ena sa lepok-la, tou bann disip, apart bann zapot, ti disperse partou dan Zide ek Samari. Me sa pa’nn anpes zot pou kontign rann temwaniaz. Filip ti al Samari pou “pres avek zot konsernan Lekris,” ek li ti gagn bann bon rezilta. (Zist. 8:1-8, 14, 15, 25) Anplis, Labib dir: “Bann ki ti’nn disperse akoz persekision ki ti ena apre lamor Etienn ti al ziska Fenisi, Sip ek Antios, me zot ti anons laparol zis ar bann Zwif. Selman, sertin zom parmi zot ki ti sorti Sip ek Sirenn ti vinn Antios ek ti koumans koz avek bann dimounn ki ti koz Grek. Zot ti  anons bon nouvel konsernan Lesegner Zezi.” (Zist. 11:19, 20) Sa lepok-la gras-a persekision, bon nouvel lor Rwayom Bondie finn fane partou.

¹⁵ Dan nou lepok, enn kitsoz ki inpe parey finn arive kan ansien Linion Sovietik ti pe dirize. Dan bann lane 1950 ti deport bann milye Temwin Zeova dan Siberi ek ti avoy zot dan diferan vilaz. Gras-a sa, bon nouvel ti kontign fane dan sa gran teritwar-la. Pena sime ki tou sa bann Temwin-la ti pou ena kas pou fer enn vwayaz anviron 10,000 kilomet pou al anons bon nouvel! Finalman, se gouvernman limem ki’nn avoy zot partou dan pei. Enn frer ti dir: “Kan nou gete, se bann lotorite zotmem ki’nn permet bann milyon dimounn ki sinser dan Siberi pou konn laverite.”

16, 17. Kouma liv Zistwar Bann Zapot donn nou bann prev ki Zeova ti pe beni travay pou rann temwaniaz?

¹⁶ Li kler ki Zeova ti pe beni bann Kretien dan premie siek. Pol ek lezot ti pe plante ek aroze, ‘me se Bondie ki ti kontign fer pouse.’ (1 Kor. 3:5, 6) Liv Zistwar Bann Zapot donn nou bann prev ki se parski Zeova ti pe beni bann-la zot travay predikasion, ki pli ale, pli boukou dimounn ti pe servi Zeova. Par exanp, Labib dir ki “parol Bondie ti pe kontign fane partou, ek kantite disip ti pe kontign ogmante deplizanpli dan Zerizalem.” (Zist. 6:7) Amezir ki bann Kretien ti pe kontign prese dan pli boukou landrwa, “tou bann lasanble dan Zide, Galile, ek Samari ti konn enn peryod lape ek ti pe vinn for. Ek parski zot ti kontign ena enn gran respe pou Zeova ek ki zot ti pe gagn konsolasion ar lespri sin, zot ti kontign ogmante.”​—Zist. 9:31.

¹⁷ Bann Zwif ek bann dimounn ki koz Grek dan Antios dan Siri ti reisi tann laverite gras-a bann Temwin ki ti ena kouraz. Labib dir: “Anplis, Zeova ti avek zot, ek enn gran kantite dimounn ti vinn krwayan ek ti koumans swiv Lesegner.” (Zist. 11:21) Konsernan progre ki ti ena dan sa lavil-la, liv Zistwar Bann Zapot dir: “Parol Zeova ti pe kontign fane ek boukou dimounn ti pe vinn bann krwayan.” (Zist. 12:24) Gras-a gran temwaniaz ki Pol ek bann lezot Kretien inn donn bann non-Zwif, “dan enn fason extraordiner, parol Zeova ti pe kontign fane partou ek ti pe vinn pli for.”​—Zist. 19:20.

18, 19. (a) Kifer nou kone ki ‘Zeova so lame avek nou’? (b) Donn enn lexanp ki montre ki Zeova soutenir so pep.

¹⁸ Azordi osi, nou pena okenn dout ki ‘Zeova so lame avek nou.’ Se akoz sa ki boukou dimounn vinn krwayan ek pran batem pou montre ki zot inn ofer Zeova zot lavi. Anplis, se selman gras-a led Zeova ek so benediksion ki nou pe kapav tini ferm kan bann dimounn pa dakor avek nou ouswa mem persekit nou. Ek se osi gras-a sa ki nou pe reisi prese parey kouma Pol ek bann Kretien dan premie siek. (Zist. 14:19-21) Zeova touletan la pou nou. So “lebra eternel” pou touletan la pou soutenir nou dan nou bann difikilte. (Det. 33:27) Fode pa ki nou bliye, ki akoz so gran nom, Zeova zame pa pou abandonn so pep.​—1 Sam. 12:22; Ps. 94:14.

 ¹⁹ Anou get enn lexanp ki montre ki Zeova soutenir so pep: Pandan Deziem Lager Mondial, bann Nazi ti avoy Frer Harald Abt dan kan konsantrasion Sachsenhausen parski li ti pe kontign prese. An Me 1942, Gestapo ti al pran so tifi, ti aret so madam Elsa, ek ti avoy so madam dan diferan kan konsantrasion. Ser Abt dir: “Tou bann lane ki mo’nn pase dan bann kan konsantrasion alman finn ansegn mwa enn leson bien inportan: Lespri Zeova vremem fortifie twa kan to pas dan bann leprev ki bien difisil! Avan ki ti aret mwa, mo ti lir enn let kot enn ser ti dir ki kan li ti pas dan bann gran leprev, lespri Zeova ti ed li pou santi li anpe. Mo ti panse ki sa ser-la ti pe exazere. Me kan momem mo’nn pas dan bann leprev, mo’nn trouve ki seki sa ser-la ti dir ti vre. Sa ti arive parey kouma li ti dir. Li difisil pou konpran sa si to pa’nn pas ladan. Wi, mo’nn fer sa lexperyans-la.”

20. Ki Pol ti fer kan li ti prizonie dan enn lakaz, ek kouma sa kapav ankouraz sertin nou bann frer ek ser?

²⁰ Alafin liv Zistwar Bann Zapot, nou trouve ki avek enn gran devouman, Pol pe “pres lor Rwayom Bondie.” (Zist. 28:31) Dan Rom, Pol ti enn prizonie dan enn lakaz, ek akoz sa li pa ti kapav prese lakaz-lakaz. Me kanmem sa, li ti pe kontign rann temwaniaz ar tou dimounn ki ti vinn get li. Azordi, sertin parmi nou bann frer ek ser ki nou bien kontan, konfine kot zot, kitfwa mem alite, ouswa pe viv dan bann home parski zot aze, parski zot malad, ouswa parski zot andikape. Kanmem sa, zot ankor ena enn gran lamour pou Bondie ek enn gran dezir pou rann temwaniaz. Nou priye pou zot ek nou kapav mem demann nou Papa ki dan lesiel pou ed zot pou zwenn bann dimounn ki anvi konn Li ek konn So bann proze ki extraordiner.

21. Kifer li bien inportan ki nou rann temwaniaz depi aster-la mem?

²¹ Laplipar parmi nou kapav prese lakaz-lakaz ouswa partisip dan bann lezot form predikasion pou fer bann disip. Alor, ki sakenn parmi nou fer tou seki li kapav pou akonpli travay ki li ena antan-ki proklamater Rwayom Bondie, ek rann temwaniaz “ziska dan bann landrwa pli lwin lor later.” Li bien inportan ki nou fer sa travay-la aster-la, parski nou pe trouv “sign” ki montre prezans Lekris. (Mat. 24:3-14) Anou servi nou letan avek sazes, parski azordi ena “boukou pou fer dan travay Lesegner.”​—1 Kor. 15:58.

22. Ki nou bizin determine pou fer pandan ki nou pe atann zour Zeova?

²² Amezir ki nou pe atann ki “gran zour Zeova ki fer per” vini, anou determine pou kontign rann temwaniaz avek kouraz ek fidelite. (Zoel 2:31) Nou ankor kapav zwenn boukou dimounn ki kouma bann Bereen, ki “pa ti tarde pou aksepte laparol.” (Zist. 17:10, 11) Wi, anou kontign rann temwaniaz ziska ki nou tann sa bann parol-la: “Bien bon. To enn esklav bon ek fidel!” (Mat. 25:23) Si azordi, nou kontign fer tou seki nou kapav pou kontign fer bann disip ek ki nou res fidel anver Zeova, nou kapav sir ki nou leker pou dan lazwa pou touletan parski nou’nn gagn loner pou “rann temwaniaz afon konsernan Rwayom Bondie”!